ନୂଆଦିଲ୍ଲୀ: ଦିଲ୍ଲୀର ଜନ୍ତରମନ୍ତରରେ ହୋଇଥିବା ପ୍ରଦର୍ଶନ ସମୟରେ ପୋଲିସର ଲାଠିଚାର୍ଜ ଏବଂ ଲୁହାବୁହା ଗ୍ୟାସ ପ୍ରୟୋଗ ମାମଲା ଏବେ ସୁପ୍ରିମକୋର୍ଟରେ ପହଞ୍ଚିଛି। ମଙ୍ଗଳବାର ଦିନ ଏହି ମାମଲାର ଶୁଣାଣି କରି ମୁଖ୍ୟ ବିଚାରପତି ସୂର୍ଯ୍ୟକାନ୍ତ କଡ଼ା ମନ୍ତବ୍ୟ ଦେଇ କହିଛନ୍ତି ଯେ, ସମଗ୍ର ଘଟଣାର ନିରପେକ୍ଷ ତଦନ୍ତ ହେବା ସହିତ ଦୋଷୀଙ୍କର ଉତ୍ତରଦାୟିତ୍ୱ ମଧ୍ୟ ନିର୍ଦ୍ଧାରିତ ହେବା ଜରୁରୀ।

ଶୁଣାଣିବେଳେ ପ୍ରଧାନ ବିଚାରପତି ସୂର୍ଯ୍ୟକାନ୍ତ କହିଛନ୍ତି, "ପ୍ରଥମେ ଆନ୍ଦୋଳନ ସମ୍ପୂର୍ଣ୍ଣ ଶାନ୍ତିପୂର୍ଣ୍ଣ ଭାବେ ଚାଲିଥିଲା, କିନ୍ତୁ ହଠାତ୍ ଗୋଟିଏ ଦିନ ହିଂସାତ୍ମକ ରୂପ ନେଲା। ଏହାର ମୁଖ୍ୟତଃ ଦୁଇଟି କାରଣ ଥାଇପାରେ; ପ୍ରଥମତଃ ପୋଲିସ ଅତ୍ୟଧିକ କଠୋରତା ଆପଣାଇଥିବା ଏବଂ ଦ୍ୱିତୀୟତଃ ପ୍ରଦର୍ଶନକାରୀଙ୍କ ଭାଗରେ ଏପରି କିଛି ଅସାମାଜିକ ବ୍ୟକ୍ତି ପଶିଯାଇଥିଲେ ଯେଉଁମାନେ ଜାଣିଶୁଣି ହିଂସା ଭଡ଼କାଇବାକୁ ଚାହୁଁଥିଲେ।" ସେ ଆହୁରି ମଧ୍ୟ କହିଛନ୍ତି ଯେ, ଏକ ସ୍ପଷ୍ଟ ପ୍ରୋଟୋକଲ୍ ତିଆରି ହୋଇଗଲେ ଆଗାମୀ ଦିନରେ ଦୋଷୀଙ୍କ ଉତ୍ତରଦାୟିତ୍ୱ ଠିକ୍ ଭାବେ ତର୍ଜମା କରାଯାଇପାରିବ।

ଆବେଦନକାରୀଙ୍କ ଓକିଲଙ୍କ ଯୁକ୍ତି

ପୋଲିସ ଚାହିଁଲେ ଉଗ୍ର ଲୋକଙ୍କ ବିରୁଦ୍ଧରେ ମାମଲା  ରୁଜୁ କରିପାରିବ, କିନ୍ତୁ ଯେତେଦୂର ସମ୍ଭବ ବଳ ପ୍ରୟୋଗ କରିବାରୁ ଦୂରେଇ ରହିବା ଉଚିତ୍। ପ୍ରଦର୍ଶନ ସ୍ଥଳରେ ଏପରି କିଛି ପୋଲିସକର୍ମୀ ମଧ୍ୟ ଉପସ୍ଥିତ ଥିଲେ ଯେଉଁମାନେ ପୋଷାକରେ ନଥିଲେ କିନ୍ତୁ ହାତରେ ମାରଣାସ୍ତ୍ର ଧରି ପ୍ରଦର୍ଶନକାରୀଙ୍କୁ ମାଡ଼ ମାରୁଥିଲେ।  ପୂର୍ବତନ ମୁଖ୍ୟ ବିଚାରପତିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏକ ଏସଆଇଟି ଗଠନ କରାଯାଉ। କୋର୍ଟ ଭବିଷ୍ୟତ ପାଇଁ ଉପାୟ ଚିନ୍ତା କରୁଛି, ଯାହାକୁ ଆମେ ସ୍ୱାଗତ କରୁଛୁ, କିନ୍ତୁ ପୂର୍ବ ଘଟଣାଗୁଡ଼ିକର ମଧ୍ୟ ସ୍ୱଚ୍ଛ ତଦନ୍ତ ହେବା ଜରୁରୀ। ଏଥିସହ ପ୍ରଦର୍ଶନକାରୀ ଛାତ୍ରଛାତ୍ରୀ ଏବଂ ନାବାଳକମାନଙ୍କର ଡିଜିଟାଲ୍ ପରିଚୟ ସର୍ବସାଧାରଣ କରିବା ଉପରେ କଟକଣା ଲାଗୁ କରାଯାଉ।

ସୁପ୍ରିମକୋର୍ଟରେ ବିହାରରେ ହୋଇଥିବା ପ୍ରଦର୍ଶନ ପ୍ରସଙ୍ଗ ମଧ୍ୟ ଉଠାଯାଇଥିଲା। ଜଣେ ଓକିଲ ଅଭିଯୋଗ କରିଛନ୍ତି ଯେ ବିହାରରେ ନାବାଳକ, ଏପରିକି ୧୩ ବର୍ଷ ବୟସର କୋମଳମତି ଶିଶୁମାନଙ୍କୁ ମଧ୍ୟ ପୋଲିସ ଅଟକ ରଖିଛି।ଅନ୍ୟପକ୍ଷରେ, ବରିଷ୍ଠ ଆଇନଜ୍ଞ ପ୍ରଶାନ୍ତ ଭୂଷଣ କୋର୍ଟଙ୍କ ଦୃଷ୍ଟି ଆକର୍ଷଣ କରି କହିଛନ୍ତି, ମୁଁ ଜୁନୈଦଙ୍କ ପ୍ରସଙ୍ଗ ମଧ୍ୟ ଏଠାରେ ରଖିବାକୁ ଚାହୁଁଛି, ଯାହାଙ୍କୁ ଅଯଥା ନିର୍ଯାତନା ଦିଆଯାଉଛି। ତେବେ ଏହାର ଜବାବରେ ସଲିସିଟର ଜେନେରାଲ୍ କହିଛନ୍ତି ଯେ ଏହା ଏକ ସମ୍ପୂର୍ଣ୍ଣ ପୃଥକ ମାମଲା।