ଜୟପୁର: ରାଜସ୍ଥାନର ବୁନ୍ଦି ଜିଲ୍ଲାରେ ଏକ ଇକୋ କାର୍ ଓ ଅନ୍ୟ ଏକ ଅଜଣା ଗାଡ଼ି ମୁହାଁମୁହିଁ ଧକ୍କା ହୋଇଛି। ଏଥିରେ ୬ ଜଣ ତୀର୍ଥଯାତ୍ରୀଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୩ ଜଣ ଆହତ ହୋଇଛନ୍ତି। ତୀର୍ଥଯାତ୍ରୀମାନେ ଖଟୁଶ୍ୟାମ ମନ୍ଦିରକୁ ଯାଉଥିଲେ। ଆଜି ଭୋର ସମୟରେ ଏହି ଦୁର୍ଘଟଣା ଘଟିଥିବା ପୁଲିସ କହିଛି। ବୁନ୍ଦି ଅତିରିକ୍ତ ଆରକ୍ଷୀ ଅଧୀକ୍ଷକ ଉମା ଶର୍ମା କହିଛନ୍ତି ଯେ ଏକ ଅଜଣା ଗାଡି ମାରୁତି ସୁଜୁକି ଇକୋକୁ ଧକ୍କା ଦେବାରୁ ୬ ଜଣଙ୍କ ମୃତ୍ୟୁ ଘଟିଛି।
ଆହତମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି। ମୃତଦେହଗୁଡ଼ିକୁ ବ୍ୟବଚ୍ଛେଦ ପାଇଁ ପଠାଯାଇଛି। ଘଟଣାଟି ହିଡୋଲି ଥାନା ଅନ୍ତର୍ଗତ ଜୟପୁର ଜାତୀୟ ରାଜପଥର ବୋଲି ପୁଲିସ କହିଛି। ଆହତଙ୍କ ମଧ୍ୟରୁ ୩ ଜଣ ମଧ୍ୟପ୍ରଦେଶର ବାସିନ୍ଦା ବୋଲି ପୁଲିସ କହିଛି। ଇକୋ କାର୍କୁ ଧକ୍କା ଦେଇଥିବା ଅଜଣା ଗାଡ଼ିକୁ ପୁଲିସ ଖୋଜୁଛି। ରାଜପଥରେ ଲାଗିଥିବା ସିସିଟିଭି କ୍ୟାମେରା ଏବଂ ଟୋଲ୍ ପ୍ଲାଜାରେ ଲାଗିଥିବା ସିସିଟିଭି କ୍ୟାମେରାର ରେକର୍ଡିଂରୁ ଏହି ଅଜଣା ଗାଡିର ଯାଞ୍ଚ କରାଯାଉଛି।
ଅଧିକ ପଢ଼ନ୍ତୁ: ଅଭିଯୁକ୍ତକୁ ବିହାରରୁ ଗିରଫ କଲା ଉତ୍ତର ପ୍ରଦେଶ ପୁଲିସ