ମୁମ୍ବାଇ: ମୁମ୍ବାଇର ଘାଟକୋପର ଅଞ୍ଚଳର ଏକ ହସ୍ପିଟାଲର ଡାକ୍ତରମାନେ ଜଣେ ୧୪ ବର୍ଷୀୟ 'ଗୋବିନ୍ଦ'ଙ୍କୁ ମୃତ ଘୋଷଣା କରିଛନ୍ତି, ଯାହା ଫଳରେ ଶନିବାର ସହରରେ ଦହି ହାଣ୍ଡି ମହୋତ୍ସବରେ ମୃତ୍ୟୁ ସଂଖ୍ୟା ଦୁଇକୁ ବୃଦ୍ଧି ପାଇଛି। ଜଣେ ଅଧିକାରୀ କହିଛନ୍ତି ଯେ 'ଗାଓଁଦେବୀ ଗୋବିନ୍ଦ ପାଠକ'ର ଅଂଶ ରୋହନ ମୋହନ ମାଲଭି ଅନ୍ଧେରୀ ପୂର୍ବର ଆଦର୍ଶ ନଗର ଅଞ୍ଚଳରେ ଏକ ଟେମ୍ପୋରେ ବସିଥିବା ସମୟରେ ଅଚେତ ହୋଇଯାଇଥିଲେ।

ରୋହନ ସମ୍ପ୍ରତି ଜଣ୍ଡିସରେ ପୀଡିତ ହୋଇଥିଲେ ଯାହା ଫଳରେ ସେ ଦହି-ହାଣ୍ଡି ଭାଙ୍ଗିବା ରୀତିରେ ଅଂଶଗ୍ରହଣ କରିନଥିଲେ। "ରୋହନଙ୍କୁ ଘାଟକୋପରର ରାଜାୱାଡି ହସ୍ପିଟାଲକୁ ପଠାଯାଇଥିଲା ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ," ଅଧିକାରୀ କହିଛନ୍ତି।

ଶନିବାର ଅପରାହ୍ନରେ ମୁମ୍ବାଇର ମାନଖୁର୍ଦରେ ଦହି ହାଣ୍ଡି ବାନ୍ଧୁଥିବା ସମୟରେ ପଡ଼ିଯିବାରୁ ଜଣେ ୩୨ ବର୍ଷୀୟ 'ଗୋବିନ୍ଦ'ଙ୍କ ମୃତ୍ୟୁ ହୋଇଥିଲା। ମୃତକଙ୍କ ନାମ ଜଗମୋହନ ଶିବକିରଣ ଚୌଧୁରୀ।

ନଗର ନିଗମର ଜଣେ ଅଧିକାରୀ ସୂଚନା ଦେଇଛନ୍ତି ଯେ ଜଗମୋହନ ମହାରାଷ୍ଟ୍ର ନଗରରେ ତାଙ୍କ ଘରର ପ୍ରଥମ ମହଲା ଝରକାରୁ ରଶି ସାହାଯ୍ୟରେ 'ଦହି ହାଣ୍ଡି' ବାନ୍ଧିବାକୁ ଚେଷ୍ଟା କରୁଥିଲେ, ଯେତେବେଳେ ହଠାତ୍ ସେ କୋଠାରୁ ତଳକୁ ଖସି ପଡ଼ିଲେ। ଚୌଧୁରୀଙ୍କୁ ନଗର ନିଗମ ଦ୍ୱାରା ପରିଚାଳିତ ଶତାବ୍ଦୀ ଗୋବଣ୍ଡି ହସ୍ପିଟାଲକୁ ନିଆଯାଇଥିଲା, ସେଠାରେ ପହଞ୍ଚିବା ପୂର୍ବରୁ ତାଙ୍କର ମୃତ୍ୟୁ ହୋଇଥିଲା।

ସୂଚନାଯୋଗ୍ୟ, ଜନ୍ମାଷ୍ଟମୀ ଅବସରରେ ସମଗ୍ର ମହାରାଷ୍ଟ୍ରରେ ଉତ୍ସାହର ସହିତ ଦହି ହାଣ୍ଡି ଉତ୍ସବ ପାଳନ କରାଯାଏ। ଶନିବାର ରାତି ୯ଟା ସୁଦ୍ଧା ମହୋତ୍ସବ ସମୟରେ ଆହତଙ୍କ ସଂଖ୍ୟା ୯୫ ଥିଲା, ଯାହା ମଧ୍ୟରୁ ୨ ଜଣଙ୍କ ଅବସ୍ଥା ଗୁରୁତର ଥିଲା। ୯୫ ଜଣ 'ଗୋବିନ୍ଦ'ଙ୍କ ମଧ୍ୟରୁ ୭୬ ଜଣଙ୍କୁ ଚିକିତ୍ସା ପରେ ହସ୍ପିଟାଲରୁ ଡିସଚାର୍ଜ କରାଯାଇଥିଲା, ଯେତେବେଳେ ୧୯ ଜଣ ହସ୍ପିଟାଲରେ ଭର୍ତ୍ତି ହୋଇଛନ୍ତି। 

ଅଧିକ ପଢ଼ନ୍ତୁ: କପଡ଼ା ଠାରୁ ଘିଅ-ବଟର ପର୍ଯ୍ୟନ୍ତ ଏହି ସବୁ ଜିନିଷ ଶସ୍ତା ହେବ