ନୂଆଦିଲ୍ଲୀ:  ଡୋନାଲ୍ଡ ଟ୍ରମ୍ପ ଏବଂ ଭ୍ଲାଦିମିର ପୁଟିନଙ୍କ ମଧ୍ୟରେ ଆଲାସ୍କା ଶିଖର ସମ୍ମିଳନୀ ପରେ, ରୁଷ ଯୁଦ୍ଧ ସମାପ୍ତ କରିବା ପାଇଁ ଏକ ପ୍ରସ୍ତାବର ରୂପରେଖା ପ୍ରସ୍ତୁତ କରିଛି। ଶାନ୍ତି ପ୍ରସ୍ତାବ ଅନୁଯାୟୀ, ପୁଟିନ ଚାହୁଁଛନ୍ତି ଯେ ଜେଲେନସ୍କି ୟୁକ୍ରେନର ପୂର୍ବ ଭାଗରେ ଥିବା ଭୂମି ଛାଡିଦିଅନ୍ତୁ, ଯାହା ବଦଳରେ ରୁଷ ୟୁକ୍ରେନରେ କବଜା କରିଥିବା ଛୋଟ ଅଞ୍ଚଳ ଛାଡିଦେବ।

ରଏଟର୍ସର ଏକ ରିପୋର୍ଟ ଅନୁଯାୟୀ, ପୁଟିନଙ୍କ ପ୍ରସ୍ତାବ ଉପରେ ସୋମବାର ଅର୍ଥାତ ଅଗଷ୍ଟ ୧୮ରେ ଟ୍ରମ୍ପ, ଜେଲେନସ୍କି ଏବଂ ୟୁରୋପୀୟ ନେତାଙ୍କ ମଧ୍ୟରେ ଆଲୋଚନା ହେବ। ତଥାପି, ଏହା ପୁଟିନଙ୍କ ଶେଷ ପ୍ରସ୍ତାବ କି ଏହାକୁ ପରିବର୍ତ୍ତନ କରାଯାଇପାରେ ତାହା ସ୍ପଷ୍ଟ ନୁହେଁ। ପୁଟିନଙ୍କ କିଛି ଦାବି ଏପରି ରହିଛି ଯାହାକୁ ୟୁକ୍ରେନୀୟ ନେତୃତ୍ୱ ପାଇଁ ଗ୍ରହଣ କରିବା ସହଜ ନୁହେଁ । 

ପୁଟିନଙ୍କ ପ୍ରସ୍ତାବରୁ ଗୋଟିଏ କଥା ସ୍ପଷ୍ଟ ଯେ ବର୍ତ୍ତମାନ କୌଣସି ଅସ୍ତ୍ରବିରତି ଲାଗୁ ହେଉନି, ଯାହାର ଅର୍ଥ ହେଉଛି ଯେ ରୁଷ ୟୁକ୍ରେନ ଉପରେ ଆକ୍ରମଣ ଜାରି ରଖିବ। ଏହା ଜେଲେନସ୍କି ପାଇଁ ଚିନ୍ତାର ସବୁଠୁ ବଡ କାରଣ ରୁଷ ପ୍ରତିଦିନ ଡ୍ରୋନ ଏବଂ ବାଲିଷ୍ଟିକ୍ କ୍ଷେପଣାସ୍ତ୍ର ସାହାଯ୍ୟରେ ଆକ୍ରମଣ କରୁଛି। ରିପୋର୍ଟ ଅନୁଯାୟୀ, ପ୍ରସ୍ତାବିତ ରୁଷ ଚୁକ୍ତି ଅନୁଯାୟୀ, ୟୁକ୍ରେନକୁ ମସ୍କୋ ପାଇଁ ଡୋନେଟସ୍କ ଏବଂ ଲୁହାନସ୍କ ଅଞ୍ଚଳ ଦେବାକୁ ପଡିବ, ଯାହା ବଦଳରେ ରୁଷ ଖେରସନ ଏବଂ ଜାପୋରିଝିଆର ଦକ୍ଷିଣ ଅଞ୍ଚଳ ଉପରେ ଆକ୍ରମଣ ବନ୍ଦ କରିବ।

ଜେଲେନସ୍କି ପୂର୍ବରୁ ରୁଷକୁ ଡୋନେଟସ୍କ ସମେତ କୌଣସି ଭୂମି ଦେବାକୁ ମନା କରିସାରିଛନ୍ତି।  ୟୁକ୍ରେନ କହିଛି ଯେ ରୁଷ ଆକ୍ରମଣର ଜବାବ ଦେବା ପାଇଁ କିଭ ପାଇଁ ଏହି ଅଞ୍ଚଳ ବହୁତ ଗୁରୁତ୍ୱପୂର୍ଣ୍ଣ। ରିପୋର୍ଟ ଅନୁଯାୟୀ, ରୁଷ ଉତ୍ତର ସୁମି ଏବଂ ଉତ୍ତର-ପୂର୍ବ ଖାରକିଭ ଅଞ୍ଚଳର ଭୂମି ୟୁକ୍ରେନକୁ ଫେରାଇବାକୁ ପ୍ରସ୍ତୁତ, ଯାହା ବର୍ତ୍ତମାନ ପୁଟିନଙ୍କ ସେନା ଅଧିନରେ ରହିଛି । 

ୟୁକ୍ରେନର ଡିପ୍ ଷ୍ଟେଟ୍ ବ୍ୟାଟଫିଲ୍ଡ ମ୍ୟାପିଂ ପ୍ରୋଜେକ୍ଟ ଅନୁଯାୟୀ, ରୁଷ ସୁମି ଏବଂ ଖାରକିଭ ଅଞ୍ଚଳର ପ୍ରାୟ ୪୪୦ ବର୍ଗ କିଲୋମିଟରକୁ କବଜା କରିଛି। ୟୁକ୍ରେନ ଡୋନବାସର ପ୍ରାୟ ୬,୬୦୦ ବର୍ଗ କିଲୋମିଟରକୁ ନିୟନ୍ତ୍ରଣ କରିଥାଏ, ଯେଉଁଥିରେ ଡୋନେଟସ୍କ ଏବଂ ଲୁହାନସ୍କ ଅଞ୍ଚଳ ଅନ୍ତର୍ଭୁକ୍ତ ଏବଂ ଯାହାକୁ ରୁଷ ନିଜର ବୋଲି ଦାବି କରି ଆସୁଛି।