ନୂଆଦିଲ୍ଲୀ: ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ସାକ୍ଷାତ ପୂର୍ବରୁ ଏକ ବଡ଼ ବୟାନ ଦେଇଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ସେ କହିଛନ୍ତି ଯେ ସେ ପୁଟିନଙ୍କ ସହ ସାକ୍ଷାତରେ ଯୁଦ୍ଧବିରତି ଚାହାନ୍ତି ଏବଂ ଯଦି ଏହା ଆଜି ନ ହୁଏ, ତେବେ ସେ ବହୁତ ନିରାଶ ହେବେ। ଟ୍ରମ୍ପ ଏବଂ ପୁଟିନ ଆଲାସ୍କାରେ ୟୁକ୍ରେନରେ ଯୁଦ୍ଧ ସମାପ୍ତ ସମ୍ଭାବନା ଉପରେ ଆଲୋଚନା କରିବାକୁ ଯାଉଛନ୍ତି। ସମଗ୍ର ବିଶ୍ୱ ଏହି ସାକ୍ଷାତ ଉପରେ ନଜର ରଖିଛି।

ଟ୍ରମ୍ପ କହିଛନ୍ତି ଯେ ସେ ଏପର୍ଯ୍ୟନ୍ତ ଜାଣିନାହାନ୍ତି ଯେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ତାଙ୍କର ଶିଖର ସମ୍ମିଳନୀ କିପରି ରହିବ। ଆମେ ଚାହୁଁଛୁ ହତ୍ୟାକାଣ୍ଡ ବନ୍ଦ ହେଉ ଏବଂ ତେଣୁ ଏକ ଅସ୍ତ୍ରବିରତି ବହୁତ ଗୁରୁତ୍ୱପୂର୍ଣ୍ଣ। ରଏଟର୍ସ ରିପୋର୍ଟ ଅନୁଯାୟୀ, ଟ୍ରମ୍ପଙ୍କୁ ପଚରାଯାଇଥିଲା ଯେ ବୈଠକକୁ ସଫଳ କରିବା ପାଇଁ କ'ଣ କରିବାକୁ ପଡିବ? ଏହାର ଉତ୍ତରରେ ଟ୍ରମ୍ପ କହିଥିଲେ, "ମୁଁ ଆପଣଙ୍କୁ ଏହା କହିପାରିବି ନାହିଁ। ମୁଁ ଜାଣିନାହିଁ। କିଛି ନିଶ୍ଚିତ ନାହିଁ। ମୁଁ କିଛି ଜିନିଷ ଚାହୁଁଛି, ତାହା ହେଉଛି ଅସ୍ତ୍ର ବିରତି।"

ଯଦି ବୈଠକ ଭଲ ନ ହୁଏ, ତେବେ ମୁଁ ଘରକୁ ଯିବି - ଟ୍ରମ୍ପ

ଟ୍ରମ୍ପ ସ୍ପଷ୍ଟ କରିଦେଇଛନ୍ତି ଯେ ପର୍ଯ୍ୟନ୍ତ ରୁଷ-ୟୁକ୍ରେନ ଯୁଦ୍ଧ ବନ୍ଦ ନହୁଏ, ସେପର୍ଯ୍ୟନ୍ତ କୌଣସି ବାଣିଜ୍ୟ ହେବ ନାହିଁ। "ମୁଁ ଏହା ନିଜ ପାଇଁ କରୁନାହିଁ। ମୋତେ ଏହାର ଆବଶ୍ୟକତା ନାହିଁ। ମୁଁ ମୋ ଦେଶ ଉପରେ ଧ୍ୟାନ ଦେବାକୁ ଚାହୁଁଛି। ମୁଁ ଅନେକ ଲୋକଙ୍କ ଜୀବନ ବଞ୍ଚାଇବା ପାଇଁ ଏହା କରୁଛି। ଯଦି ବୈଠକ ଭଲ ହୁଏ ନାହିଁ, ତେବେ ମୁଁ କାହାକୁ ଡାକିବି ନାହିଁ, ମୁଁ ସିଧା ଘରକୁ ଚାଲିଯିବି। ତଥାପି, ଯଦି ବୈଠକ ଭଲ ହୁଏ, ତେବେ ମୁଁ ୟୁକ୍ରେନୀୟ ରାଷ୍ଟ୍ରପତି ଜେଲେନସ୍କି ଏବଂ ୟୁରୋପୀୟ ନେତାମାନଙ୍କୁ ଡାକିବି।" 

ଜେଲେନସ୍କି ଯଥାଶୀଘ୍ର ଯୁଦ୍ଧବିରତି ଚାହାନ୍ତି ଏବଂ ୟୁକ୍ରେନକୁ ସୁରକ୍ଷାକୁ ସୁନିଶ୍ଚିତ କରାଯିବା ଉଚିତ। ଆମେରିକୀୟ ଚ୍ୟାନେଲ ଫକ୍ସ ନ୍ୟୁଜର ଏକ ରିପୋର୍ଟ ଅନୁଯାୟୀ, ଟ୍ରମ୍ପ କହିଛନ୍ତି ଯେ ଆମେରିକା ୟୁରୋପୀୟ ଦେଶମାନଙ୍କ ସହିତ ୟୁକ୍ରେନକୁ ସୁରକ୍ଷା ଗ୍ୟାରେଣ୍ଟି ଦେଇପାରିବେ ବୋଲି ସମ୍ଭାବନା ଅଛି। କିନ୍ତୁ ଏହା ନାଟୋ ରୂପରେ କରାଯାଇପାରିବ ନାହିଁ। ସେ କହିଛନ୍ତି ଯେ ଶାନ୍ତି ଚୁକ୍ତି ଅନୁଯାୟୀ, ୟୁକ୍ରେନକୁ ନିଷ୍ପତ୍ତି ନେବାକୁ ପଡିବ ଯେ ରୁଷକୁ ଜମି ଦିଆଯିବ କି ନାହିଁ। ଟ୍ରମ୍ପ ସ୍ପଷ୍ଟ କରିଛନ୍ତି ଯେ ସେ ୟୁକ୍ରେନ ପାଇଁ ଆଲୋଚନା କରିବାକୁ ସେ ଆସି ନାହାନ୍ତି ବରଂ ପୁଟିନଙ୍କୁ ଆଲୋଚନା ଟେବୁଲକୁ ଆଣିବା ପାଇଁ ଆଲାସ୍କା ଆସିଛନ୍ତି।