ମୁମ୍ବାଇ: ଲୋକସଭା ନିର୍ବାଚନରେ ଝଟକା ମିଳିବାର କିଛି ସପ୍ତାହର ଅନ୍ତରାଳେ ମହାରାଷ୍ଟ୍ରରେ ଭାରତୀୟ ଜନତା ପାର୍ଟି (ବିଜେପି) ନେତୃତ୍ବ ଏନ୍ଡିଏକୁ ବଡ଼ ସଫଳତା ମିଳିଛି। ମହାବିକାଶ ଅଘାଡ଼ି (ମଭିଆ)କୁ ମହାରାଷ୍ଟ୍ର ବିଧାନ ପରିଷଦ ନିର୍ବାଚନରେ ପରାସ୍ତ କରି ବିଜେପି ରଣନୀତିର ସଂକେତ ଦେଇଛି। ବିଧାନ ପରିଷଦର ୧୧ ଆସନରେ ହୋଇଥିବା ନିର୍ବାଚନରେ ବିଜେପି ନେତୃତ୍ବ ଏନଡିଏର ୯ ଜଣ ପ୍ରାର୍ଥୀ ବିଜୟୀ ହୋଇଛନ୍ତି। ମଭିଆର ୩ ଜଣଙ୍କ ମଧ୍ୟରୁ ୨ ଜଣ ବିଜୟୀ ହୋଇଥିବା ବେଳେ ଅନ୍ୟ ଜଣେ ପରାସ୍ତ ହୋଇଛନ୍ତି। କଂଗ୍ରେସର କ୍ରସ ଭୋଟିଂ ହୋଇଥିବା ସନ୍ଦେହ କରାଯାଉଛି।
ମହାରାଷ୍ଟ୍ରରେ ମହାୟୁତିରେ ସାମିଲ ସମସ୍ତ ଦଳ ଏନ୍ଡିଏର ସଦସ୍ୟ ଅଟନ୍ତି। ଲୋକସଭା ନିର୍ବାଚନ ପରେ ବିଧାନ ପରିଷଦ ନିର୍ବାଚନ ଉପରେ ସମସ୍ତଙ୍କର ନଜର ଥିଲା। କାରଣ ଏହି ନିର୍ବାଚନରେ କ୍ଷମତା ପକ୍ଷ ଓ ବିରେଧୀ ପକ୍ଷର ଏକତା ଓ ରଣନୈତିକ କୁଶଳତା ପରଖା ଯାଉଥିଲା। କିନ୍ତୁ ବିରୋଧୀ ଦଳର ମେଣ୍ଟ ଉଭୟ ମୋର୍ଚ୍ଚାରେ ବିଫଳ ହୋଇଛନ୍ତି। ଏହି ନିର୍ବାଚନରେ ସମସ୍ତ ପ୍ରାର୍ଥୀଙ୍କୁ ବିଜୟ ପାଇଁ ଅତିକମରେ ୨୩-୨୩ ଜଣଙ୍କର ସମର୍ଥନ ଦରକାର କରୁଥିଲେ।
ବିଜେପି ନିଜର ସମସ୍ତ ପ୍ରାର୍ଥୀଙ୍କ ପାଇଁ ୨୬-୨୬ ଖଣ୍ଡ ଭୋଟ ଜୁଟାଇବା ପାଇଁ ସଫଳ ରହିଥିଲା। ସହଯୋଗୀ ଏନ୍ସିପି (ଅଜିତ)ଙ୍କ ୨ ଜଣ ପ୍ରାର୍ଥୀଙ୍କୁ ଯଥାକ୍ରମେ ୨୩ ଓ ୨୪ ଭୋଟ ମିଳିଥିଲା। ଶିବସେନା (ସିନ୍ଦେ)ଙ୍କ ୨ ପ୍ରାର୍ଥୀଙ୍କୁ ଯଥାକ୍ରମେ ୨୪ ଓ ୨୫ ଖଣ୍ଡ ଭୋଟ ମିଳିଥିଲା। ଅନ୍ୟକଟରେ ମହାବିକାଶ ଅଘାଡ଼ିରେ କଂଗ୍ରେସର ପ୍ରାର୍ଥୀ ଡ. ପ୍ରଜ୍ଞା ସାତୱଙ୍କୁ ୨୫ ଜଣ ଭୋଟ ଦେଇଥିଲେ। ଶିବସେନା (ଉଦ୍ଧବ)ର ମିଳିନ୍ଦ ନାର୍ଭେକରଙ୍କୁ ଅତିକମରେ ବିଜୟ ଠାରୁ ଗୋଟିଏ ଭୋଟ୍ କମ ଅର୍ଥାତ ୨୨ ଖଣ୍ଡ ଭୋଟ ମିଳିଥିଲା।