ନୂଆଦିଲ୍ଲୀ: ମୁଖ୍ୟ ନିର୍ବାଚନ କମିଶନର (CEC) ଜ୍ଞାନେଶ କୁମାରଙ୍କୁ ଦେଶର ସର୍ବୋଚ୍ଚ ନାଗରିକ ସମ୍ମାନ ‘ଭାରତ ରତ୍ନ’ ପ୍ରଦାନ କରାଯିବା ନେଇ ଚାଲିଥିବା ଚର୍ଚ୍ଚା ଉପରେ ଏନସିପିଆଇ  ସାଂସଦ ତଥା ପୂର୍ବତନ କ୍ରିକେଟର ଯୁସୁଫ ପଠାନ କ୍ଷୋଭ ପ୍ରକାଶ କରିଛନ୍ତି। ସେ ସ୍ପଷ୍ଟ କରିଛନ୍ତି ଯେ ସେ ଏପ୍ରକାର କୌଣସି ପତ୍ର ଲେଖି ନାହାନ୍ତି କିମ୍ବା କୌଣସି ବ୍ୟକ୍ତିବିଶେଷଙ୍କ ପାଇଁ ଏଭଳି ସୁପାରିଶ କରି ନାହାନ୍ତି।

‘ମୁଁ ଏଭଳି କୌଣସି ପତ୍ର ଲେଖି ନାହିଁ’

ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ପୋଷ୍ଟ ସେୟାର କରି ଯୁସୁଫ ପଠାନ କହିଛନ୍ତି ଯେ ପଶ୍ଚିମବଙ୍ଗ, ମୁର୍ଷିଦାବାଦ, ବହରମପୁର ସମେତ ସମଗ୍ର ଦେଶର ଜନସାଧାରଣ ଏବେ ସେମାନଙ୍କ ମତଦାନ ଅଧିକାର ପାଇଁ ସଂଘର୍ଷ କରୁଛନ୍ତି। ଏଭଳି ଏକ ସମ୍ବେଦନଶୀଳ ସମୟରେ ସେ କୌଣସି ବ୍ୟକ୍ତିବିଶେଷଙ୍କ ପାଇଁ ପୁରସ୍କାର ସୁପାରିଶ କରିବା କଳ୍ପନା ବାହାରେ ବୋଲି ସେ ଦର୍ଶାଇଛନ୍ତି।

ପ୍ରମାଣ ଦିଅନ୍ତୁ 

ୟୁସୁଫ ପଠାନ ଆହୁରି ମଧ୍ୟ କହିଛନ୍ତି ଯେ ଯେଉଁମାନେ ତାଙ୍କ ନାଁରେ ମିଥ୍ୟା କାହାଣୀ ପ୍ରଚାର କରୁଛନ୍ତି, ଯଦି ସେମାନଙ୍କ ପାଖରେ କୌଣସି ପ୍ରମାଣ ଅଛି, ତେବେ ସେହି ଚିଠିର କପିକୁ ସାର୍ବଜନୀନ କରନ୍ତୁ। ପ୍ରମାଣ ନଥାଇ ଏଭଳି ଭିତ୍ତିହୀନ ଖବର ପଛରେ କୌଣସି ସତ୍ୟତା ନାହିଁ ବରଂ ଏହା ତାଙ୍କ ନାଁର ଅପବ୍ୟବହାର ବୋଲି ସେ କହିଛନ୍ତି। ବର୍ତ୍ତମାନର ସମୟରେ ଅପପ୍ରଚାର ବଦଳରେ ଜନସାଧାରଣଙ୍କ ପ୍ରକୃତ ଅଧିକାର ଓ ସତ୍ୟକୁ ସାମ୍ନାକୁ ଆଣିବାର ଆବଶ୍ୟକତା ରହିଛି ବୋଲି ସେ ମତ ଦେଇଛନ୍ତି।

କ’ଣ ଥିଲା ପ୍ରକୃତ ମାମଲା ?

ମମତା ବାନାର୍ଜୀଙ୍କ ଦଳ ତୃଣମୂଳ କଂଗ୍ରେସ (TMC) ଛାଡ଼ି ନେସନାଲ ସିଟିଜନ୍ସ ପାର୍ଟି ଅଫ୍‌ ଇଣ୍ଡିଆ (NCPI)ରେ ଯୋଗଦେଇଥିବା ସାଂସଦ ୟୁସୁଫ ପଠାନଙ୍କ ଏହି ପ୍ରତିକ୍ରିୟା ଏନସିପିଆଇର ଜାତୀୟ ଅଧ୍ୟକ୍ଷ ଜ୍ୟୋତି ପ୍ରକାଶ ଚାଟାର୍ଜୀଙ୍କ ଦ୍ୱାରା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଲେଖାଯାଇଥିବା ଏକ ପତ୍ର ପରେ ସାମ୍ନାକୁ ଆସିଛି।

ଉକ୍ତ ପତ୍ରରେ ଜ୍ୟୋତି ପ୍ରକାଶ ଚାଟାର୍ଜୀ ୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନକୁ ଶାନ୍ତିପୂର୍ଣ୍ଣ ଭାବେ ପରିଚାଳନା କରିବାରେ ଜ୍ଞାନେଶ କୁମାରଙ୍କ ଭୂମିକାର ପ୍ରଶଂସା କରି ତାଙ୍କୁ ‘ଭାରତ ରତ୍ନ’ ଦେବାକୁ ଦାବି କରିଥିଲେ। ଏହି ଘଟଣାକୁ ନେଇ ଗଣମାଧ୍ୟମରେ ଯୁସୁଫ ପଠାନଙ୍କ ନାଁ ମଧ୍ୟ ଜଡ଼ିତ ହେଉଥିବା ଦେଖି ସେ ନିଜେ ଏହାର ଦୃଢ଼ ପ୍ରତିବାଦ କରିଛନ୍ତି।