ରାଜ୍ୟରେ ଆଳୁ ସଙ୍କଟ ଦେଖାଦେଇଛି । ବେଲଗାମ ହୋଇ ପଡ଼ିଛି ଆଳୁ ଦର । ବଜାରରେ ଆଳୁ ଦର ୫୦ ଟଙ୍କା ଟପିଲାଣି । ପଶ୍ଚିମବଙ୍ଗ ଆଳୁ ବ୍ୟବସାୟୀଙ୍କ ଧର୍ମଘଟ ଯୋଗୁଁ ଏଭଳି ପରିସ୍ଥିତି ସୃଷ୍ଟି ହୋଇଥିବା ସୂଚନା ମିଳିଛି । ତେବେ ଖୁବ ଶୀଘ୍ର ସମସ୍ୟାର ସମାଧାନ ହେବ ବୋଲି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ସୂଚନା ଦେଇଛନ୍ତି ।
ପଶ୍ଚିମବଙ୍ଗରେ ଆଳୁ ଉତ୍ପାଦନ କମ ହୋଇଛି । ତେଣୁ ଅନ୍ୟ ରାଜ୍ୟଙ୍କୁ ଆଳୁ ଦେବା ପ୍ରତିବାଦରେ ବ୍ୟବସାୟୀମାନେ ଧର୍ମଘଟ କରିଛନ୍ତି । ପଶ୍ଚିମବଙ୍ଗ ସରକାରଙ୍କ କଟକଣା ଯୋଗୁଁ ପଶ୍ଚିମବଙ୍ଗ ଓ ଓଡ଼ିଶା ସୀମାରେ ଶହ ଶହ ଆଳୁ ବୋଝେଇ ଟ୍ରକ ଅଟକି ରହିଛି । ସୋନାକନିଆ ଚେକପୋଷ୍ଟ ନିକଟରେ ଅଟକି ରହିଛି ଶହ ଶହ ଆଳୁ ଟ୍ରକ। ପଶ୍ଚିମବଙ୍ଗ ପଟୁ ଆଳୁ ଟ୍ରକକୁ ଛାଡ଼ିବା ପାଇଁ ନିର୍ଦ୍ଦେଶ ମିଳିନାହିଁ । ବିଭିନ୍ନ ସ୍ଥାନରେ ନାକାବନ୍ଦୀ କରି ଟ୍ରକକୁ ଜଗି ରହିଛନ୍ତି ପୋଲିସ । କୌଣସି ଟ୍ରକକୁ ଓଡ଼ିଶା ସୀମାରେ ପ୍ରବେଶ ପାଇଁ ଅନୁମତି ଦିଆଯାଉ ନାହିଁ । ଫଳରେ ଆଳୁ ପାଇଁ ପଶ୍ଚିମବଙ୍ଗ ଉପରେ ନିର୍ଭର କରୁଥିବା ଓଡ଼ିଶା ବଜାରରେ ଏବେ ସଙ୍କଟ ଦେଖା ଦେଇଛି । ବଜାରରେ ଆଳୁ ଦର ୫୦ ଟଙ୍କା ଟପିଲାଣି ।
ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଭୁବନେଶ୍ୱର ଆଇଗିଣିଆ ଆଳୁ ଗୋଦାମକୁ ଯାଇ ସ୍ଥିତି ସମୀକ୍ଷା କରିବା ସହ ଆଲୋଚନା କରିଛନ୍ତି । ରାଜ୍ୟରେ ଯେତିକି ଆଳୁ ମହଜୁତ ରହିଛି ଆଗାମୀ ୭ ରୁ ୮ ଦିନ ଯାଏ ଚାହିଦା ପୂରଣ କରିବ ବୋଲି ମନ୍ତ୍ରୀ କହିଛନ୍ତି । ଉତ୍ତର ପ୍ରଦେଶରୁ ଆଳୁ ଅଣାଯିବ । ଅସାଧୁ ବେପାରୀଙ୍କୁ ଚିହ୍ନଟ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ତେବେ ଏ ନେଇ ଆଜି ଅପରାହ୍ନ ୩ଟାରେ ବୈଠକ ବସିବା ନେଇ ମନ୍ତ୍ରୀ ସୂଚନା ଦେଇଛନ୍ତି । ଖୁବ ଶୀଘ୍ର ସମସ୍ୟାର ସମାଧାନ ହେବ ବୋଲି ଖାଦ୍ୟ ଯୋଗାଣ ମନ୍ତ୍ରୀ କହିଛନ୍ତି ।