ଖବର ଓଡ଼ିଶା: ଆସନ୍ତା ଦିନେ କିମ୍ବା ଦୁଇ ଦିନ ଭିତରେ ରାଜ୍ୟରେ ଆଳୁ ସଙ୍କଟର ସ୍ଥିତି ସ୍ୱାଭାବିକ ହୋଇଯିବ । ଏ ନେଇ ରାଜ୍ୟ ସରକାର ପଶ୍ଚିମବଙ୍ଗ ଅଧିକାରୀଙ୍କ ସହ ଦ୍ୱିପାକ୍ଷିକ ଆଲୋଚନା କରିଛନ୍ତି । ଏ ନେଇ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ସୂଚନା ଦେଇଛନ୍ତି ।
ମନ୍ତ୍ରୀଙ୍କ କହିବା ମୁତାବକ, ପଶ୍ଚିମବଙ୍ଗରେ ଚାଲିଥିବା ଆନ୍ଦୋଳନ ବନ୍ଦ ହୋଇଛି । ତେଣୁ ଓଡ଼ିଶାକୁ ଆଳୁ ଗାଡ଼ି ଛାଡ଼ିବାକୁ କୁହାଯାଇଛି । ଆମେ ଆଲୋଚନା କରିଛୁ । ୨୧ରୁ ୨୪ ତାରିଖ ଯାଏଁ ସେଠାରେ ଆନ୍ଦୋଳନ ଚାଲି ଥିଲା । ଏବେ ପ୍ରତିବାଦ ବନ୍ଦ ହୋଇଛି । ଆସନ୍ତା ଦିନେ ଦୁଇଦିନ ଭିତରେ ଆଳୁ ଗାଡ଼ି ଓଡ଼ିଶା ଆସିବ ବୋଲି ମନ୍ତ୍ରୀ କହିଛନ୍ତି । ଏପଟେ ରାଜ୍ୟରେ ଆଗାମୀ ୭ ଦିନ ପାଇଁ ଆଳୁ ମହଜୁଦ ଅଛି । ବ୍ୟବସାୟୀମାନେ ଯଦି କିଲୋ ପିଛା ଆଳୁ ୩୨ ଟଙ୍କାରୁ ଅଧିକ ଦରରେ ବିକିବେ ତାହା ହେଲେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ମନ୍ତ୍ରୀ କଡ଼ା ନିର୍ଦ୍ଦେଶ ଦେଉଛନ୍ତି ।
ସୂଚନା ଯୋଗ୍ୟ, ଗତ ଦୁଇ ଦିନ ହେବ ରାଜ୍ୟରେ ଆଳୁ ସଙ୍କଟ ଦେଖାଦେଇଛି । ପଶ୍ଚିମବଙ୍ଗରେ ଆଳୁ ଉତ୍ପାଦନ କମ ହୋଇଛି । ତେଣୁ ଅନ୍ୟ ରାଜ୍ୟଙ୍କୁ ଆଳୁ ଦେବା ପ୍ରତିବାଦରେ ବ୍ୟବସାୟୀମାନେ ଧର୍ମଘଟ କରିଛନ୍ତି । ପଶ୍ଚିମବଙ୍ଗ ସରକାରଙ୍କ କଟକଣା ଯୋଗୁଁ ପଶ୍ଚିମବଙ୍ଗ ଓ ଓଡ଼ିଶା ସୀମାରେ ଶହ ଶହ ଆଳୁ ବୋଝେଇ ଟ୍ରକ ଅଟକି ରହିଛି । ସୋନାକନିଆ ଚେକପୋଷ୍ଟ ନିକଟରେ ଅଟକି ରହିଛି ଶହ ଶହ ଆଳୁ ଟ୍ରକ। ପଶ୍ଚିମବଙ୍ଗ ପଟୁ ଆଳୁ ଟ୍ରକକୁ ଛାଡ଼ିବା ପାଇଁ ନିର୍ଦ୍ଦେଶ ମିଳିନାହିଁ । ବିଭିନ୍ନ ସ୍ଥାନରେ ନାକାବନ୍ଦୀ କରି ଟ୍ରକକୁ ଜଗି ରହିଛନ୍ତି ପୋଲିସ । କୌଣସି ଟ୍ରକକୁ ଓଡ଼ିଶା ସୀମାରେ ପ୍ରବେଶ ପାଇଁ ଅନୁମତି ଦିଆଯାଉ ନାହିଁ । ଫଳରେ ଆଳୁ ପାଇଁ ପଶ୍ଚିମବଙ୍ଗ ଉପରେ ନିର୍ଭର କରୁଥିବା ଓଡ଼ିଶା ବଜାରରେ ଏବେ ସଙ୍କଟ ଦେଖା ଦେଇଛି । ବଜାରରେ ଆଳୁ ଦର ୫୦ ଟଙ୍କା ଟପିଲାଣି ।