ଜମ୍ମୁ: ଉତ୍ତର କଶ୍ମୀରର ବାନ୍ଦିପୋରାରେ ଶନିବାର ଜଣେ ସ୍ଥାନୀୟ ଆତଙ୍କବାଦୀଙ୍କୁ ଗିରଫ କରି ଟାର୍ଗେଟ କିଲିଂ ଘଟଣାକୁ ବିଫଳ କରିଛି ସୁରକ୍ଷାବାହିନୀ। ତାକୁ ପଚରାଉଚରା ଜାରି ରହିଛି। ସୂଚନା ଅନୁଯାୟୀ, କିଛି ଦିନ ତଳେ ଜଣେ ସ୍ଥାନୀୟ ଯୁବକ ଆତଙ୍କବାଦୀ ସଂଗଠନରେ ସକ୍ରିୟ ହୋଇଥିବା ବାନ୍ଦିପୋରା ପୁଲିସ ଜାଣିବାକୁ ପାଇଥିଲା। ବାନ୍ଦିପୋରାରେ ଟାର୍ଗେଟ କିଲିଂ ଘଟଣାକୁ ସେ ସମ୍ପାଦନ କରିପାରିବ ବୋଲି ଜାଣିପାରିଥିଲା। 

ପୁଲିସ ସମ୍ଭାବ୍ୟ ଆଶ୍ରୟସ୍ଥଳଉପରେ ନଜର ରଖିବା ଆରମ୍ଭ କରିଛି। ବାନ୍ଦିପୋରାର କିଛି ରାସ୍ତାରେ ସ୍ୱତନ୍ତ୍ର ବ୍ୟାରିକେଡ୍ ମଧ୍ୟ ଲଗାଯାଇଥିଲା। ସନ୍ଧ୍ୟା ସାତଟା ବେଳେ ନାକା ପାର୍ଟିରେ ଜଣେ ଯୁବକ ରାସ୍ତାରେ ବୁଲୁଥିବା ଦେଖିବାକୁ ମିଳିଥିଲା। ନାକା ପାର୍ଟି ତାଙ୍କୁ ଅଟକିବା ପାଇଁ ସଙ୍କେତ ଦେବା ପୂର୍ବରୁ ଯୁବକ ଜଣକ ରାସ୍ତା ବଦଳାଇ ସେଠାରୁ ଖସି ପଳାଇବାକୁ ଚେଷ୍ଟା କରିଥିଲେ।

ନାକା ପାର୍ଟି ତାଙ୍କୁ ଫେରାର ହେଉଥିବା ଦେଖି ତାଙ୍କୁ ପିଛା କରି ଗୁଳି ଚଳାଇବାର ସୁଯୋଗ ନଦେଇ ଧରିଥିଲା। ଗିରଫ ଅଭିଯୁକ୍ତ ୱାସିମ ଅହମ୍ମଦ ମଲିକ ବୋଲି ଜଣାପଡ଼ିଛି। ସେ ବାନ୍ଦିପୋରାର ରାମପୋରାର ଗୁଣ୍ଡପୋରାର ବାସିନ୍ଦା। ତା' ନିକଟରୁ ଗୋଟିଏ ପିସ୍ତଲ, ଗୋଟିଏ ହ୍ୟାଣ୍ଡ ଗ୍ରେନେଡ୍ ଓ ୧୫ଟି ଗୁଳି ଜବତ ହୋଇଛି।

ଉତ୍ତର କଶ୍ମୀରରେ ହିଜବୁଲ ମୁଜାହିଦ୍ଦିନ ଆତଙ୍କବାଦୀଙ୍କ ପାଇଁ ଅସ୍ତ୍ରଶସ୍ତ୍ର ଓ ଅର୍ଥ ବ୍ୟବସ୍ଥାରେ ସମ୍ପୃକ୍ତ ଥିବା ଦୁଇ ଓଭରଗ୍ରାଉଣ୍ଡ କର୍ମଚାରୀଙ୍କ ବିରୋଧରେ ଜାତୀୟ ତଦନ୍ତକାରୀ ଏଜେନ୍ସି (ଏନଆଇଏ) ଶନିବାର ଜମ୍ମୁର ଏକ ସ୍ୱତନ୍ତ୍ର ଅଦାଲତରେ ଚାର୍ଜସିଟ୍ ଦାଖଲ କରିଛି। ଅଭିଯୁକ୍ତ ୱାହିଦ-ଉଲ-ଜହୁର ଏବଂ ମୁବାଶିର ମକବୁଲ ମୀର ଇଣ୍ଟରନେଟ ସମେତ ବିଭିନ୍ନ ମାଧ୍ୟମରେ ଜମ୍ମୁ-କଶ୍ମୀରରେ ସକ୍ରିୟ ଥିବା ଆତଙ୍କବାଦୀ ଏବଂ ସେମାନଙ୍କ ହେଣ୍ଡଲରଙ୍କ ସହ ନିରନ୍ତର ଯୋଗାଯୋଗରେ ଥିଲେ।

ଅଧିକ ପଢ଼ନ୍ତୁ: ମୋହାଲିରେ କୋଠା ଭୁଶୁଡ଼ିବା ଘଟଣାରେ ଯୁବତୀଙ୍କ ମୃତ୍ୟୁ