ପ୍ୟାରିସ୍: ଫ୍ରାନ୍ସର ରାଜଧାନୀ ପ୍ୟାରିସରେ ଶୁକ୍ରବାର ରାତି ୧୧ଟାରେ ଅଲିମ୍ପିକ୍ସ-୨୦୨୪ ରଂଗାରଂଗ ସାଂସ୍କୃତିକ କାର୍ଯ୍ୟକ୍ରମର ସହିତ ଉଦ୍ଘାଟିତ ହୋଇଯାଇଛି। ପ୍ରଥମ ଥର ଅଲିମ୍ପିକ୍ସ ଷ୍ଟାଡିୟମ ପରିସରରେ ଆୟୋଜନ ନହୋଇ ଏହି କ୍ରୀଡ଼ା ମହାକୁମ୍ଭ ଜଳରେ ଆୟୋଜନ ହୋଇଛି। ଏଥି ସହିତ ଅଲିମ୍ପିକ୍ସ-୨୦୨୪ ଇତିହାସ ପୃଷ୍ଠାରେ ଲିପିବଦ୍ଧ ହୋଇଯାଇଛି।
ଉଦ୍ଘାଟନୀ ସମାରୋହ ପାଇଁ ପ୍ୟାରିସ୍ର ଜୀବନରେଖା କୁହାଯାଉଥିବା ୬କିମି ପର୍ଯ୍ୟନ୍ତ ସେନ୍ ନଦୀରେ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ପ୍ରାୟ ୧୦୦ ଭବ୍ୟ ଡଙ୍ଗାରେ ୧୦୦୦୦ରୁ ଅଧିକ କ୍ରୀଡ଼ାବିତ୍ ସେନ୍ ନଦୀ ଦେଇ ବାହାରିଥିଲେ। ଏହାରି ମଧ୍ୟରେ କ୍ରୀଡ଼ାବିତ୍ମାନେ ପ୍ୟାରିସର କିଛି ପ୍ରତିଷ୍ଠିତ ସ୍ଥାନ ଦେଇ ଅତିକ୍ରମ କରିଥିଲେ। ଏଥିରେ ନୋଟ୍ରୋ ଡ୍ୟାମ୍, ପୋର୍ଟ ଡେସ ଆର୍ଟସ, ପୋଣ୍ଟ ନ୍ୟୁଫ ସାମିଲ ରହିଛି। ଭାସମାନ ଡଙ୍ଗାରେ ଡେସ ପ୍ଲାଣ୍ଟେସର ପାର୍ଶ୍ବରେ ଥିବା ଆଷ୍ଟରିଟ୍ଜ ଠାରୁ ଆରମ୍ଭ ହୋଇଥିବା ପରେଡ ଟ୍ରୋକାଡେରୋ ଠାରେ ସମାପ୍ତ ହୋଇଥିଲା।
ଭାରତର ବ୍ୟାଡମିଣ୍ଟନ ଷ୍ଟାର ପିଭି ସିନ୍ଧୁ ଓ ନିଜର ନିଜର ୫ମ ଅଲିମ୍ପିକ୍ସ ଖେଳିବାକୁ ଯାଉଥିବା ଟେବୁଲ ଟେନିସ୍ ତାରକା ଅଞ୍ଚତ ଶରତ କମଲ ଉଦ୍ଘାଟନୀ ସମାରୋହ ଅବସରରେ ଭାରତୀୟ ଦଳର ନେତୃତ୍ବ ନେଇଥିଲେ। ଉଭୟ ଖେଳାଳି ନିଜ-ନିଜ କ୍ରୀଡ଼ାର ଉଦ୍ଘାଟନୀ ସମାରୋହରେ ଭାରତର ଧ୍ବଜାବାହକ ହୋଇଥିଲେ। ସେନ୍ ନଦୀର ଜଳରେ ଡଙ୍ଗାରେ ଛିଡ଼ା ହୋଇ ତ୍ରିରଙ୍ଗାକୁ ଉଡାଇଥିଲେ।
ଭାରତୀୟ ହକି ଦଳ ଅଲିମ୍ପିକ୍ସରେ ଶନିବାର ନ୍ୟୁଜିଲାଣ୍ଡ ବିପକ୍ଷରୁ ଅଭିଯାନ ଆରମ୍ଭ କରିବ। ଏହି ମ୍ୟାଚ୍ ପୂର୍ବରୁ ଅଧିନାୟକ ହର୍ମନପ୍ରୀତ୍ ସିଂହ ଭରପୂର ଆତ୍ମବିଶ୍ବାସରେ ଅଛନ୍ତି। ଦୁଇ ସପ୍ତାହ ପୂର୍ବରୁ ୟୁରୋପରେ ଅବତରଣ କରିବା ପରଠୁ ଭାରତୀୟ ଦଳ ସ୍ବିଜରଲାଣ୍ଡରେ ତିନି ଦିନିଆ ମେଣ୍ଟାଲ କଣ୍ଡିସନିଂ ଶିବିର ଆୟୋଜନ କରିଥିଲା। ପରେ ମାଲେସିଆ, ନେଦରଲାଣ୍ଡ୍ସ, ଜର୍ମାନି ଓ ଗ୍ରେଟ୍ ବ୍ରିଟେନ୍ ବିପକ୍ଷରେ ଅଭ୍ୟାସ ମ୍ୟାଚ୍ ଖେଳିସାରିଛି। ଅଲିମ୍ପିକ୍ସର ପୁଲ୍ ବି’ରେ ସ୍ଥାନିତ ହୋଇଥିବା ଭାରତୀୟ ଦଳର ପ୍ରମୁଖ ପ୍ରତିଦ୍ବନ୍ଦ୍ବୀ ରହବେ ବିଜେତା ବେଲଜିୟମ୍, ଆର୍ଜେଣ୍ଟିନା, ଅଷ୍ଟ୍ରେଲିଆ, ଆୟର୍ଲାଣ୍ଡ ଓ ନ୍ୟୁଜିଲାଣ୍ଡ। ତେଣୁ ଏକ ଚମତ୍କାର ଆରମ୍ଭ କରି ଭାରତୀୟ ଦଳ ପ୍ରଥମରୁ ଦୃଢ଼ ମନୋବଳ ସହ ଆଗକୁ ବଢ଼ିବାକୁ ଚାହିବ।