କାରଗିଲ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର କେନ୍ଦ୍ରଶାସିତ ରାଜ୍ୟ ଲଦ୍ଦାଖର ଦ୍ରାସରେ ପହଞ୍ଚି କାର୍ଗିଲ ବିଜୟ ଦିବସ ଅବସରରେ ଯୁଦ୍ଧ ସ୍ମାରକୀରେ ପାକିସ୍ତାନ ବିରୋଧରେ ଲଢ଼େଇ କରି ସହିଦ ହୋଇଥିବା ବୀର ଯବାନଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି। ଏହି ଅବସରରେ ପାକିସ୍ତାନକୁ ଚେତାବନୀ ଦେଇ କହିଛନ୍ତି, ସେମାନଙ୍କର ଖରାପ ଚିନ୍ତାଧାରା ସଫଳ ହେବ ନାହିଁ। ୧୯୯୯ର ଯୁଦ୍ଧରେ ପାକିସ୍ତାନ ଉପରେ ଭାରତର ବିଜୟକୁ ମନେ ପକାଇ ଆଜି ଦେଶରେ କାର୍ଗିଲ ବିଜୟ ଦିବସ ପାଳନ କରାଯାଉଛି ବୋଲି ମୋଦୀ କହିଛନ୍ତି।
ସହିଦଙ୍କୁ ଶ୍ରଦ୍ଧାଞ୍ଜଳି ଦେବା ପରେ ଲୋକଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି, କାର୍ଗିଲ ବିଜୟ ଦିବସ ଆମକୁ କହୁଛି, ରାଷ୍ଟ୍ର ପାଇଁ ଦିଆଯାଇଥିବା ବଳିଦାନ ଅମର ହୋଇଥାଏ। ଦିନ, ମାସ ଓ ବର୍ଷ ବିତିଯାଏ। ଦଶନ୍ଧି ଅତିକ୍ରମ କରିଯାଏ ଓ ଶତାଦ୍ଦୀ ପୂରା ହୋଇଯାଏ। କିନ୍ତୁ ରାଷ୍ଟ୍ରର ରକ୍ଷା ପାଇଁ ନିଜ ଜୀବନକୁ ବାଜି ଲଗାଇଥିବା ଲୋକଙ୍କ ନାମ କେବେ ଲିଭି ନଥାଏ। କାର୍ଗିଲରେ ଆମେ ଯୁଦ୍ଧ ଜିତିବା ସହିତ ସତ୍ୟ, ସୟମ ଓ ସାମର୍ଥର ଅଦ୍ଭୁତ ପରିଚୟ ପାଇପାରିଛେ।
ପ୍ରଧାନମନ୍ତ୍ରୀ ମୋଦୀ କହିଛନ୍ତି, ମୋର ସୌଭାଗ୍ୟ ଯେ, କାର୍ଗିଲ ଯୁଦ୍ଧ ସମୟରେ ମୁଁ ଜଣେ ସାଧାରଣ ଦେଶବାସୀ ଭଳି ନିଜର ସୈନିକଙ୍କ ସହିତ ଥିଲି। ଆଜି ଯେତେବେଳେ କାର୍ଗିଲ ମାଟିରେ ପାଦ ରଖିଛି, ସ୍ବାଭାବିକ ଭାବେ କିଛି ଗର୍ବ ଅନୁଭବ ହେଉଛି। ଏତେ ଉଚ୍ଚ, ଏତେ କଠନି ଯୁଦ୍ଧ ଅପରେଶନକୁ ସଫଳ କରାଯାଇପାରିଥିଲା। ମୁଁ ସେହି ସହିଦଙ୍କୁ ପ୍ରଣାମ କରୁଛି, ଯେଉଁମାନେ କାର୍ଗିଲରେ ମାତୃଭୂମିର ରକ୍ଷା ପାଇଁ ନିଜର ସର୍ବୋଚ୍ଚ ବଳିଦାନ ଦେଇଥିଲେ।
ପ୍ରଧାନମନ୍ତ୍ରୀ ମୋଦୀ କହିଛନ୍ତି, ପାକିସ୍ତାନ ଆତଙ୍କବାଦୀମାନଙ୍କ ସମର୍ଥନ ଜଣାଉଛି। ପାକିସ୍ତାନ ନିଜର ଅତିତରେ ଯେତେ ଦୁଷ୍ପ୍ରୟାସ କରିଛି, କେବେ ସଫଳ ହୋଇପାରି ନାହିଁ। ତଥାପି ପାକିସ୍ତାନ ନିଜର ଅତିତରୁ କିଛି ଶିଖିପାରିଲା ନାହିଁ। ଆତଙ୍କବାଦୀକୁ ପ୍ରୋତ୍ସାହନ ଦେଉଛି। କିନ୍ତୁ ପାକିସ୍ତାନକୁ ମନେ ରଖିବାକୁ ହେବ ଯେ, ଖରପ ଚିନ୍ତାଧାରା କେବେ ସଫଳ ହେବ ନାହିଁ।