ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୫ତମ କାର୍ଗିଲ ବିଜୟ ଦିବସ ଅବସରରେ ସହିଦ ଯବାନଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି। ଏହି କାର୍ଯ୍ୟକ୍ରମ ପାଇଁ ପ୍ରଧାନମନ୍ତ୍ରୀ ମୋଦୀ କାର୍ଗିଲ ଯୁଦ୍ଧ ସ୍ମାରକସ୍ଥଳୀରେ ପହଞ୍ଚି ୧୯୯୯ରେ ଭାରତ-ପାକିସ୍ତାନ ଲଢ଼େଇରେ ନିଜର ଜୀବନକୁ ଆହୁତି ଦେଇଥିବା ଯବାନଙ୍କୁ ମନେ ପକାଇଛନ୍ତି।
ପ୍ରଧାନମନ୍ତ୍ରୀ ମୋଦୀ ଆଜି ଶିଙ୍କୁ ଲା ସୁଡ଼ଙ୍ଗ ପ୍ରକଳ୍ପର ଶୁଭାରମ୍ଭ କରିବେ। ଗସ୍ତ ପୂର୍ବରୁ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଶିଙ୍କୁ ଲା ସୁଡ଼ଙ୍ଗ ପ୍ରକଳ୍ପ ପାଇଁ କାମ ଆରମ୍ଭ ହୋଇଯିବ। ଏହି ପ୍ରକଳ୍ପ ଖରାପ ପାଣିପାଗ ସମୟରେ ଲେହ ଠାରୁ ସଂଯୋଗୀକରଣକୁ ସ୍ବାଭାବିକ କରିବା ପାଇଁ ଗୁରୁତ୍ବପୂର୍ଣ୍ଣ। ତେଣୁ ଏହି ସୁଡଙ୍ଗ ଗୁରୁତ୍ବପୂର୍ଣ୍ଣ। ଏହି ସୁଡଙ୍ଗ ସୀମା ପର୍ଯ୍ୟସ୍ତ ଶୀଘ୍ର ପହଞ୍ଚାଇବାରେ ତୃତୀୟ ଓ ସବୁଠୁ ସୁରକ୍ଷିତ ବିକଳ୍ପ ହେବ। ବର୍ତ୍ତମାନ ସମୟରେ ଲଦ୍ଦାଖ ପାଇଁ ପ୍ରଥମ ବିକଳ୍ପ ଜୋଜିଲା ନିକଟ, ଯାହା ପାକିସ୍ତାନ ସୀମା କ୍ଷେତ୍ରକୁ ଲାଗି ରହିଛି। ଦ୍ବିତୀୟ ବିକଳ୍ପ ବାରାଳାଚା ନିକଟରେ, ଯାହା ଚୀନ ସମୀାକୁ ଲାଗି ରହିଛି।
ଏହି ଅବସରରେ ପ୍ରଧାନମନ୍ତ୍ରୀ ଶିଙ୍କୁ ଲା ଟନେଲ ପ୍ରକଳ୍ପ ପାଇଁ ପ୍ରଥମ ବ୍ଳାଷ୍ଟ କରିବେ। ୪.୧ କିମିର ଏହି ଯମଜ ଟନେଲ ସମୁଦ୍ର ଜଳପତ୍ତନ ଠାରୁ ୧୫,୮୦୦ ଫୁଟ ଉପରେ ନିର୍ମିତ ହେବ। ନିମୁ-ପାଦୁମ-ଦରଛା ରୋଡରେ ଏହା ଲେହକୁ ସଂଯୋଗ କରିବ। ଏହି ଟନେଲ ନିର୍ମାଣ ସରିଲା ପରେ ବିଶ୍ବର ସର୍ବୋଚ୍ଚ ଟନେଲ ହେବ। ଏହା ଦ୍ବାରା ଲଦ୍ଦାଖର ସାମାଜିକ ଓ ଆର୍ଥିକ ବିକାଶ ହେଇପାରିବ।
ସୂଚନାଯୋଗ୍ୟ, ଭାରତୀୟ ନିୟନ୍ତ୍ରଣ ରେଖା (ଏଲ୍ଓସି)ରେ କାର୍ଗିଲ ଯୁଦ୍ଧ ୧୯୯୯ ମସିହା ମେ ୩’ ମାସରୁ ଜୁଲାଇ ୨୬ ମଧ୍ୟରେ ଭାରତ ଓ ପାକିସ୍ତାନ ମଧ୍ୟରେ ହୋଇଥିଲା। ସ୍ବର୍ଗତ ଅଟଳ ବିହାରୀ ବାଜପେୟୀ ପ୍ରଧାନମନ୍ତ୍ରୀ ଥିବା ବେଳେ ଏହି ଯୁଦ୍ଧରେ ଭାରତ ବିଜୟୀ ହୋଇଥିଲା। କାର୍ଗିଲ ବିଜୟ ଦିବସର ରଜତ ଜୟନ୍ତୀ ମହୋତ୍ସବ ପାଳନ କରିବାକୁ ସାରା ଦେଶ ପ୍ରସ୍ତୁତ ହେଉଥିବା ବେଳେ କାର୍ଗିଲ ଯୁଦ୍ଧରେ ଭାରତୀୟ ସଶସ୍ତ୍ର ବାହିନୀର ବୀରତ୍ୱପୂର୍ଣ୍ଣ ବିଜୟକୁ ଉତ୍ତର କମାଣ୍ଡ ସମ୍ମାନିତ କରୁଛି। ଗତ ବର୍ଷକ ମଧ୍ୟରେ ଜମ୍ମୁ-କଶ୍ମୀରର ଜନସାଧାରଣ, ସ୍କୁଲ ପିଲା, ନାଗରିକ ବିଶିଷ୍ଟ ବ୍ୟକ୍ତି ଏବଂ ପୂର୍ବତନ ସୈନିକମାନଙ୍କୁ ସାମିଲ କରି ଦେଶ ପାଇଁ ସର୍ବୋଚ୍ଚ ବଳିଦାନ ଦେଇଥିବା ବୀର ଯବାନମାନଙ୍କୁ ସ୍ମରଣ ଏବଂ ଧନ୍ୟବାଦ ଦେବା ପାଇଁ ଏକାଧିକ କାର୍ଯ୍ୟକ୍ରମ କରାଯାଇଛି।