ନୂଆଦିଲ୍ଲୀ: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟ୍ ୨୦୨୫-୨୬ର ଫୋକସ୍ କ୍ଷେତ୍ରଗୁଡ଼ିକ ବିଷୟରେ ଉଲ୍ଲେଖ କରିଛନ୍ତି। ‌ସେ ଏହି ସବୁ କ୍ଷେତ୍ର ଉପରେ ଗୁରୁତ୍ବ ରହିବ ବୋଲି କହିଛନ୍ତି। ସେଗୁଡ଼ିକ ହେଲା-

କ) ଅଭିବୃଦ୍ଧିକୁ ତ୍ୱରାନ୍ୱିତ କରିବା

ଖ) ସୁରକ୍ଷିତ ସମାବେଶୀ ବିକାଶ

ଗ) ଘରୋଇ କ୍ଷେତ୍ରର ପୁଞ୍ଜିନିବେଶକୁ ପ୍ରୋତ୍ସାହିତ କରିବା

ଘ) ଘରୋଇ ବ୍ୟୟ ବୃଦ୍ଧି, ଏବଂ

ଉ) ଭାରତର ଉଦୀୟମାନ ମଧ୍ୟବିତ୍ତ ଶ୍ରେଣୀର ଖର୍ଚ୍ଚ ଶକ୍ତି ବୃଦ୍ଧି।

ଅର୍ଥମନ୍ତ୍ରୀ ସୀତାରମଣ କହିଛନ୍ତି ଯେ ବଜେଟରେ ଅଭିବୃଦ୍ଧିକୁ ତ୍ୱରାନ୍ୱିତ କରିବା ପାଇଁ ଆମ ସରକାରଙ୍କ ପ୍ରୟାସ ଜାରି ରହିଛି। ସରକାର ସାମଗ୍ରିକ ବିକାଶ ସୁରକ୍ଷିତ କରିବା ଏବଂ ଘରୋଇ କ୍ଷେତ୍ରର ପୁଞ୍ଜିନିବେଶକୁ ପ୍ରୋତ୍ସାହିତ କରିବା ପାଇଁ ପ୍ରୟାସ ଜାରି ରଖିଛନ୍ତି।

ଏହା ପୂର୍ବରୁ ସୀତାରମଣ କହିଥିଲେ, ସବୁ ପ୍ରମୁଖ ଅର୍ଥନୀତି ମଧ୍ୟରେ ଆମର ଅର୍ଥନୀତି ଦ୍ରୁତଗତିରେ ବୃଦ୍ଧି ପାଉଛି। ଗତ ୧୦ ବର୍ଷ ମଧ୍ୟରେ ଆମର ଅଭିବୃଦ୍ଧି ଟ୍ରାକ୍ ରେକର୍ଡ ଏବଂ ଢାଞ୍ଚାଗତ ସଂସ୍କାର ବିଶ୍ୱର ଦୃଷ୍ଟି ଆକର୍ଷଣ କରିଛି। ଏହି ସମୟ ମଧ୍ୟରେ ଭାରତର ସାମର୍ଥ୍ୟ ଓ ସମ୍ଭାବନା ଉପରେ ବିଶ୍ୱାସ ବୃଦ୍ଧି ପାଇଛି। ଆଗାମୀ ୫ ବର୍ଷକୁ ଆମେ ସମସ୍ତ କ୍ଷେତ୍ରରେ ଅନ୍ତର୍ଭୁକ୍ତ ଅଭିବୃଦ୍ଧି ଏବଂ ସନ୍ତୁଳିତ ବିକାଶକୁ ପ୍ରୋତ୍ସାହିତ କରିବାର ଏକ ଅନନ୍ୟ ସୁଯୋଗ ଭାବରେ ଦେଖୁଛୁ।

କେନ୍ଦ୍ର ଅର୍ଥମନ୍ତ୍ରୀ କହିଛନ୍ତି, ଏକ ବିକଶିତ ଭାରତ ପାଇଁ କେନ୍ଦ୍ର ସରକାର ଏହି ବଜେଟ୍ ଆଣିଛନ୍ତି। ଆମ ଅର୍ଥନୀତି ଦ୍ରୁତଗତିରେ ବୃଦ୍ଧି ପାଉଛି। ଗରିବ, ଯୁବକ, କୃଷକ ଓ ମହିଳାଙ୍କର ବିକାଶ ହେଉଛି। ଭାରତର ଅର୍ଥନୀତିକୁ ଏକ ନୂତନ ଗତି ମିଳିଛି।  ମେକ୍ ଇନ୍ ଇଣ୍ଡିଆକୁ ପ୍ରୋତ୍ସାହନ ମିଳୁଛି।