ନୂଆଦିଲ୍ଲୀ/ଇମ୍ଫାଲ: ମଣିପୁରରେ ଦୀର୍ଘଦିନ ଧରି ଚାଲିଥିବା ଜାତିଗତ ସଂଘର୍ଷର ସମାଧାନ ଏବଂ ଶାନ୍ତି ଫେରାଇ ଆଣିବା ପାଇଁ ଗୃହ ମନ୍ତ୍ରାଳୟ ମଙ୍ଗଳବାର ନୂଆଦିଲ୍ଲୀରେ ମୈତେଇ, କୁକି ଏବଂ ନାଗା ସମ୍ପ୍ରଦାୟର ବିଧାୟକମାନଙ୍କୁ ନେଇ ଏକ ବୈଠକ ଡକାଇଛି। ଏକ ବର୍ଷରୁ ଅଧିକ ସମୟ ଧରି ରାଜ୍ୟରେ ଚାଲିଥିବା ହିଂସାକୁ ଶେଷ କରିବା ପାଇଁ ପ୍ରଥମ ଥର ପାଇଁ ଏଭଳି ପଦକ୍ଷେପ ନିଆଯାଇଛି।

ଜାତୀୟ ରାଜଧାନୀ ନୂଆଦିଲ୍ଲୀରେ ଆ‌େୟୋଜନ ହେବାକୁ ଥିବା ଏହି ବୈଠକରେ ୩ ଜଣ ନାଗା ବିଧାୟକ ଯୋଗ ଦେବେ, କିନ୍ତୁ ମେଇତେଇ ଓ କୁକି ସମ୍ପ୍ରଦାୟର କେତେ ବିଧାୟକ ଏଥିରେ ଯୋଗ ଦେବେ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ସଂଘର୍ଷକରୁଥିବା ସମୁଦାୟମାନଙ୍କ ମଧ୍ୟରେ ଆଲୋଚନା ଆରମ୍ଭ କରିବା ଏବଂ ସଙ୍କଟର ସମାଧାନ ଖୋଜିବା ପାଇଁ କେନ୍ଦ୍ରର ପ୍ରୟାସର ଏକ ଅଂଶ ହେଉଛି ଏହି ଆଲୋଚନା।

ମଣିପୁରରେ ୨୦୨୩ ମେ ମାସରେ ଆରମ୍ଭ ହୋଇଥିବା ଜାତିଗତ ହିଂସାରେ ଏପର୍ଯ୍ୟନ୍ତ ୨୦୦ରୁ ଅଧିକ ଲୋକ ପ୍ରାଣ ହରାଇଛନ୍ତି। ଏହି ବୈଠକରେ ନାଗା ସମ୍ପ୍ରଦାୟର ତିନି ଜଣ ବିଧାୟକ ଆୱାଙ୍ଗବୁ ନ୍ୟୁମାଇ, ଏଲ୍ ଡିକୋ ଏବଂ ରାମ ମୁଇଭା ଯୋଗଦେବେ। ମୁଇୱା ବର୍ତ୍ତମାନ ଏକ ଘରୋଇ ମାମଲାରେ ଜାତୀୟ ରାଜଧାନୀରେ ଅଛନ୍ତି। ଏହି ତିନି ଜଣ ବିଧାୟକ ରାଜ୍ୟରେ ଶାସକ ବିଜେପିର ସହଯୋଗୀ ଦଳ ନାଗା ପିପୁଲ୍ସ ଫ୍ରଣ୍ଟ (ଏନପିଏଫ)ର ସଦସ୍ୟ।

ମୈତେଇର କିଛି ବିଧାୟକ, ଯେଉଁମାନେ ସମସ୍ତେ ବିଜେପି ସଦସ୍ୟ, ନୂଆଦିଲ୍ଲୀ ଅଭିମୁଖେ ଯାତ୍ରା କରିଛନ୍ତି। ଇମ୍ଫାଲର ସ୍ଥାନୀୟ ଗଣମାଧ୍ୟମ ରିପୋର୍ଟ କରିଛି ଯେ ଆଲୋଚନାରେ ଅଂଶଗ୍ରହଣ କରିଥିବା ସମସ୍ତ ନାଗା, କୁକି ଏବଂ ମୈତେଇ ବିଧାୟକଙ୍କୁ ଗୃହ ମନ୍ତ୍ରଣାଳୟ ଚିଠି ଏବଂ ଟେଲିଫୋନ୍ ମାଧ୍ୟମରେ ବ୍ୟକ୍ତିଗତ ଭାବେ ନିମନ୍ତ୍ରଣ କରିଛି।

ଇମ୍ଫାଲ ବିମାନବନ୍ଦରରେ ସାମ୍ବାଦିକମାନଙ୍କୁ ଆୱାଙ୍ଗବୁ ନ୍ୟୁମାଇ କହିଛନ୍ତି, ଆମକୁ କିଛି ବିଷୟରେ ଆଲୋଚନା କରିବା ପାଇଁ ଦିଲ୍ଲୀ ଆସିବାକୁ କୁହାଯାଇଛି। ମୁଁ ଏପର୍ଯ୍ୟନ୍ତ ସଠିକ୍ କାର୍ଯ୍ୟସୂଚୀ ଜାଣିନାହିଁ। ଶାନ୍ତି ଫେରାଇ ଆଣିବା ପାଇଁ ଆମେ ସମସ୍ତ ଉପାୟ ଉପରେ ବିଚାର କରୁଛୁ। ସମସ୍ତ ସମ୍ପ୍ରଦାୟ ଏବଂ ଲୋକ ଏଥିରେ ସାମିଲ ନ ହେଲେ ମଣିପୁରରେ ଶାନ୍ତି ଆଣିବା କଷ୍ଟକର ହେବ ବୋଲି ଡାଇକୋ କହିଛନ୍ତି।

ଗୃହ ମନ୍ତ୍ରାଳୟର ଏହି ପଦକ୍ଷେପ ଏକ ଭଲ ସଙ୍କେତ ଏବଂ ମୁଁ ଆଶା କରୁଛି ଏହା ଘଟିବ। ମୁଁ ବୈଠକରେ ଯୋଗ ଦେବାକୁ ଚାହେଁ ଏବଂ ଦେଖିବାକୁ ଚାହେଁ ଯେ ଆମେ ଏହି ପଦକ୍ଷେପ ସହିତ କେତେ ଦୂର ଯାଇପାରିବା। ରାଜ୍ୟ କଂଗ୍ରେସ ସଭାପତି କେ ମେଘଚନ୍ଦ୍ର କହିଛନ୍ତି ଯେ ସମାଧାନ ପାଇଁ କୌଣସି ପଦକ୍ଷେପ ନେବା ଭଲ କଥା, କିନ୍ତୁ ବିରୋଧୀ ଦଳକୁ ନିମନ୍ତ୍ରଣ କରାଯାଇନାହିଁ।

ଗତ ଅକ୍ଟୋବର ୭ ତାରିଖରେ ବିଷ୍ଣୁପୁର ଜିଲ୍ଲାରେ ମିଳିତ ଅପରେସନ୍ ରେ ଗୋଟିଏ କାର୍ବାଇନ୍ ମେସିନ୍, ଗୋଟିଏ ଏକେ-୪୭ ରାଇଫଲ୍, ୧୨ ବୋର ସିଙ୍ଗଲ୍ ବ୍ୟାରେଲ ରାଇଫଲ୍, ୧୨ ବୋର ପିସ୍ତଲ, ୨.୫ କେଜି ଆଇଇଡି), ଗୁଳି, ଗ୍ରେନେଡ୍ ଓ ଗୋଳାବାରୁଦ ଜବତ କରାଯାଇଥିଲା। ଚୁରାଚାନ୍ଦପୁର ଜିଲ୍ଲାରୁ ୨ଟି ମୋର୍ଟାର୍ (ପମ୍ପେ), ୨ଟି ପିସ୍ତଲ, ଗ୍ରେନେଡ୍ ଓ ଗୁଳି ଜବତ ହୋଇଛି। ଅକ୍ଟୋବର ୮ ରେ ଆସାମ ରାଇଫଲ୍ସ ଏବଂ ମଣିପୁର ପୁଲିସ ଇମ୍ଫାଲ ପଶ୍ଚିମର ଖେଲୋଙ୍ଗରୁ ଏକ ୭.୬୨ ମିଲିମିଟର ଏସଏଲଆର ରାଇଫଲ, ଗୋଟିଏ .୩୦୩ ରାଇଫଲ, ଏକ ୯ ଏମଏମ ପିସ୍ତଲ, ଗ୍ରେନେଡ ଏବଂ ଅନ୍ୟାନ୍ୟ ଯୁଦ୍ଧାସ୍ତ୍ର ଜବତ କରିଥିଲେ। ଗତ ଅକ୍ଟୋବର ୯ ତାରିଖରେ ଇମ୍ଫାଲ ପୂର୍ବ ଜିଲ୍ଲାର ଚମ୍ଫାଇ, ସାଗୋଲମାଙ୍ଗରୁ ଗୋଟିଏ ଏମ-୧୬ ରାଇଫଲ, ୨ଟି ଏସଏଲଆର, ଗୋଟିଏ .୨୨ ରାଇଫଲ, ଗୋଟିଏ ଦେଶୀ ବନ୍ଧୁକ, ୨ଟି କାର୍ବାଇନ୍, ୮ଟି ୯ ମିଲିମିଟର ଦେଶୀ ପିସ୍ତଲ, ଗୁଳିଗୋଳା, ଗ୍ରେନେଡ୍ ଓ ଯୁଦ୍ଧାସ୍ତ୍ର ଜବତ କରାଯାଇଥିଲା।

ଅଧିକ ପଢ଼ନ୍ତୁ: ଉଦ୍ଧବ ଠାକରେ ମେଡ଼ିକାଲରେ ଭର୍ତ୍ତି