କୋଚି: କେରଳରେ ପର୍ଯ୍ୟଟନକୁ ପ୍ରୋତ୍ସାହିତ କରିବା ପାଇଁ ରବିବାର ସନ୍ଧ୍ୟାରେ କୋଚି ସହରର କୂଳରେ ଥିବା ବୋଲଗାଟି ୱାଟରଡ୍ରୋମରେ 'ଡି ହାଭିଲାଣ୍ଡ କାନାଡା' ସି-ପ୍ଲେନ୍ ଅବତରଣ କରିଛି। ରାଜ୍ୟ ପର୍ଯ୍ୟଟନ ମନ୍ତ୍ରୀ ପିଏ ମହମ୍ମଦ ରିୟାସ୍ ସୋମବାର ୧୭ ସିଟ୍ ବିଶିଷ୍ଟ ବିମାନର ପ୍ରଥମ ସେବାକୁ ମାଟୁପେଟିକୁ ପତାକା ଦେଖାଇ ଶୁଭାରମ୍ଭ କରିବେ। ଆଜି ଏହି ବିମାନର ପରୀକ୍ଷଣ କରାଯିବ।

ପର୍ଯ୍ୟଟନ ସଚିବ କେ ବିଜୁ, ବିମାନ ଚଳାଚଳ ସଚିବ ବିଜୁ ପ୍ରଭାକର, ଜିଲ୍ଲାପାଳ ଏନଏସକେ ଉମେଶ, ରାଜ୍ୟ ପର୍ଯ୍ୟଟନ ଅତିରିକ୍ତ ନିର୍ଦ୍ଦେଶକ ପି ବିଷ୍ଣୁରାଜ ଏବଂ ବିଭିନ୍ନ ପର୍ଯ୍ୟଟନ ସଂଘର ପ୍ରତିନିଧିମାନେ ବିମାନକୁ ସ୍ୱାଗତ କରିଥିଲେ। 

ବେସାମରିକ ବିମାନ ଚଳାଚଳ ମନ୍ତ୍ରଣାଳୟ (ଏମଓସିଏ)ର ଆଞ୍ଚଳିକ ଯୋଗାଯୋଗ ଯୋଜନା (ଆରସିଏସ)-ଉଡାନ ଅଧୀନରେ ଆସୁଥିବା ଏହି ସି-ପ୍ଲେନ୍ ସେବାର ଲକ୍ଷ୍ୟ ହେଉଛି କେରଳର ୪ଟି ବିମାନବନ୍ଦର ଏବଂ ବ୍ୟାକ୍ୱାଟରକୁ ଯୋଗାଯୋଗ ବଢ଼ାଇବା। ଏହି ପ୍ରକଳ୍ପ ଦ୍ୱାରା ୪ଟି ଅନ୍ତର୍ଜାତୀୟ ବିମାନବନ୍ଦର ଏବଂ ଆଭ୍ୟନ୍ତରୀଣ ଅଞ୍ଚଳ ମଧ୍ୟରେ ଯାତ୍ରା ସମୟ ଯଥେଷ୍ଟ ପରିମାଣରେ ସଞ୍ଚୟ ହେବ।

ଶିଳ୍ପମନ୍ତ୍ରୀ ପି ରାଜୀବ ବୋଲଗଟି ପ୍ୟାଲେସରେ ଏହି କାର୍ଯ୍ୟକ୍ରମରେ ଅଧ୍ୟକ୍ଷତା କରିବେ। ଜଳ ସମ୍ପଦ ମନ୍ତ୍ରୀ ରୋଶି ଅଗଷ୍ଟିନଙ୍କ ଉପସ୍ଥିତିରେ ଡି ହାଭିଲାଣ୍ଡ କାନାଡାର କ୍ରୁ ଏବଂ ଯାତ୍ରୀମାନଙ୍କୁ ଇଡୁକ୍କି ଜିଲ୍ଲାର ମାଟ୍ଟୁପେଟି ଡ୍ୟାମରେ ସ୍ୱାଗତ କରାଯିବ।

ଏହି ସେବାରେ ୯, ୧୫, ୧୭, ୨୦ ଓ ୩୦ ସିଟ୍ କ୍ଷମତା ବିଶିଷ୍ଟ ଛୋଟ ବିମାନ ବ୍ୟବହାର କରାଯିବ, ଯେଉଁଥିରେ ଯାତ୍ରୀମାନେ ଭାସୁଥିବା ୱାଟରଡ୍ରୋମରେ ଚଢ଼ିବେ।

କାନାଡାର ପାଇଲଟ ଡାନିଏଲ ମଣ୍ଟଗୋମେରୀ ଓ ରୋଜର ବ୍ରିଣ୍ଡର ଏହି ବିମାନକୁ ପାଇଲଟ ଭାବେ ନେଇ ଗତକାଲି ପୂର୍ବାହ୍ନ ୧୧ଟାରେ ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚିଥିଲେ। ଯୋଗେଶ ଗର୍ଗ, ସନ୍ଦୀପ ଦାସ, ସୟଦ କାମରାନ ହୁସେନ ଓ ମୋହନ ସିଂ ଏହି ଟିମ୍ ରେ ସାମିଲ ଥିଲେ।

ଅଧିକ ପଢ଼ନ୍ତୁ: ଅବସରପ୍ରାପ୍ତ ୱିଙ୍ଗକମାଣ୍ଡର ଏମ୍‌ବି ଓଝାଙ୍କ ଦେହାନ୍ତ