ଚେନ୍ନାଇ: ମାଡ୍ରାସ ହାଇକୋର୍ଟ ଏକ ମାମଲାର ଶୁଣାଣି କରି କହିଛନ୍ତି ଯେ ପ୍ରେମରେ ଥିବା ଯୁବକ ଓ ଯୁବତୀଙ୍କ ମଧ୍ୟରେ ଆଲିଙ୍ଗନ ଓ ଚୁମ୍ବନ ଏକ ସ୍ୱାଭାବିକ କଥା। ଯୌନ ନିର୍ଯାତନା ଅଭିଯୋଗର ସମ୍ମୁଖୀନ ହେଉଥିବା ଜଣେ ଯୁବକଙ୍କୁ ଆଶ୍ୱସ୍ତି ଦେଇ କୋର୍ଟ ଏହି ମନ୍ତବ୍ୟ ଦେଇଛନ୍ତି।

ଏହି ଆବେଦନର ଶୁଣାଣି କରି ଜଷ୍ଟିସ ଆନନ୍ଦ ଭେଙ୍କଟେଶ କହିଛନ୍ତି, ଆଇପିସିର ଧାରା ୩୫୪-ଏ(୧) (ଆଇ) ଅନୁଯାୟୀ କିଶୋର ଅବସ୍ଥାରେ ପ୍ରେମ ସମ୍ପର୍କରେ ଦୁଇ ଜଣଙ୍କ ମଧ୍ୟରେ ଆଲିଙ୍ଗନ କିମ୍ବା ଚୁମ୍ବନ ହେବା ସ୍ୱାଭାବିକ। ଏହା କୌଣସି ପ୍ରକାର ଅପରାଧ ନୁହେଁ।

ସଂଥନେଶ ନାମକ ଜଣେ ବ୍ୟକ୍ତି ତାଙ୍କ ବିରୋଧରେ ଜଣେ ମହିଳା ଥାନାରେ ରୁଜୁ କରିଥିବା ଏଫଆଇଆରକୁ ରଦ୍ଦ କରିବାକୁ ଦାବି କରି ଅଦାଲତରେ ପିଟିସନ୍ ଦାଖଲ କରିଥିଲେ। ୨୦୨୨ ନଭେମ୍ବର ୧୩ ତାରିଖରେ ଆବେଦନକାରୀ ଅଭିଯୋଗକାରୀଙ୍କ ସହ ମିଶି ତାଙ୍କୁ ଏକ ସ୍ଥାନକୁ ଡାକିଥିଲେ ବୋଲି ଅଭିଯୋଗ ହୋଇଥିଲା। ଏହାପରେ ଉଭୟଙ୍କ ମଧ୍ୟରେ କଥାବାର୍ତ୍ତା ହୋଇଥିଲା। ଏହାପରେ ଆବେଦନକାରୀ ଅଭିଯୋଗକାରୀଙ୍କୁ ଆଲିଙ୍ଗନ କରି ଚୁମ୍ବନ ଦେଇଥିଲେ।

ଘଟଣା ସମ୍ପର୍କରେ ଅଭିଯୋଗକାରୀ ତାଙ୍କ ପିତାମାତାଙ୍କୁ ଜଣାଇଥିଲେ। ଏହାପରେ ଆବେଦନକାରୀଙ୍କୁ ତାଙ୍କୁ ବିବାହ କରିବାକୁ କୁହାଯାଇଥିଲା, କିନ୍ତୁ ସେ ମନା କରିଦେଇଥିଲେ। ଏହାପରେ ଅଭିଯୋଗକାରୀଙ୍କ ପକ୍ଷରୁ ଏକ ମାମଲା (ଏଫଆଇଆର) ରୁଜୁ କରାଯାଇଥିଲା।

ମାମଲାର ଶୁଣାଣି କରି କୋର୍ଟ ଆବେଦନକାରୀଙ୍କୁ ଆଶ୍ୱସ୍ତି ଦେଇଛନ୍ତି। ଅଦାଲତ କହିଛନ୍ତି ଯେ, କରାଯାଇଥିବା ଅଭିଯୋଗକୁ ସତ ବୋଲି ଗ୍ରହଣ କରାଗଲେ ମଧ୍ୟ ଆବେଦନକାରୀଙ୍କ ବିରୋଧରେ କୌଣସି ଅପରାଧ ମାମଲା ରୁଜୁ ହେଉନାହିଁ। ଏଥିପାଇଁ କୌଣସି ଆଇନଗତ କାର୍ଯ୍ୟାନୁଷ୍ଠାନର ଆବଶ୍ୟକତା ନାହିଁ।

ଅଧିକ ପଢ଼ନ୍ତୁ: ଏସିଆରେ ଉଚ୍ଚଶିକ୍ଷା କ୍ଷେତ୍ରରେ ବଡ଼ ଅଗ୍ରଗତି କରୁଛି ଭାରତ