ଶ୍ରୀନଗର: ଜମ୍ମୁ କଶ୍ମୀରର କୁପୱାଡାରେ ସୁରକ୍ଷାବାହିନୀ ଓ ଆତଙ୍କବାଦୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଦେଖିବାକୁ ମିଳିଛି। ସେନାର ସର୍ଚ୍ଚଅପରେଶନ ସମୟରେ ଶନିବାର ଭୋର ସକାଳୁ ଏହି ଏନ୍କାଉଣ୍ଟର ହୋଇଛି। ଆତଙ୍କବାଦୀଙ୍କ ଗୁଳିମାଡ଼ରେ ସେନାର ୩ ଜଣ ଯବାନ ଆହତ ହୋଇଥିବା ନେଇ ଜାତୀୟ ଗଣମାଧ୍ୟମର ରିପୋର୍ଟରୁ ଜଣାପଡ଼ିଛି। ଏହି ଅଞ୍ଚଳରେ ୮ ଜଣ ପାକିସ୍ତାନୀ ଆତଙ୍କବାଦୀ ଲୁଚିଥିବା ସୂଚନା ମିଳିବା ପରେ ସେନାର ଯବାନମାନେ ସର୍ଚ୍ଚଅପରେଶନ କରିଥିଲେ। ତେବେ ଗୁଳିମାଡ଼ କରି ଆତଙ୍କବାଦୀମାନେ ଜଙ୍ଗଲ ଭିତରକୁ ପ୍ରବେଶ କରିଥିବା ନେଇ ଆଶଙ୍କା କରାଯାଉଛି। ସେନାର ଯବାନମାନେ ତଲାଶୀ ଅଭିଯାନ ଜାରି ରଖିଛନ୍ତି। ଏହି ଅଞ୍ଚଳକୁ ଅତିରିକ୍ତ ଯବାନ ପଠାଯାଇଛି।
ଏହା ପୂର୍ବରୁ ଗତ ୨୪ ତାରିଖ ଦିନ ରାତିରେ ମଧ୍ୟ ସୁରକ୍ଷାବାହିନୀ ଓ ଆତଙ୍କବାଦୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଦେଖିବାକୁ ମିଳିଥିଲା। ଏହି ଏନ୍କାଉଣ୍ଟରରେ ଜଣେ ଆତଙ୍କବାଦୀ ନିପାତ ହୋଇଥିଲା। ତେବେ ଘଟଣାରେ ଜଣେ ଯବାନ ଆହତ ହୋଇଥିଲେ। ଆହତ ଯବାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ଯବାନଙ୍କ ଜୁଲାଇ ୨୫ ତାରିଖରେ ମୃତ୍ୟୁ ହୋଇଥିଲା।
ସୂଚନାଯୋଗ୍ୟ, ଜମ୍ମୁ ଅଞ୍ଚଳର ଯେଉଁଠିକୁ ଶାନ୍ତ ଓ ସୁରକ୍ଷିତ ସ୍ଥାନ କୁହାଯାଇଥାଏ, ସେଠାରେ ଆତଙ୍କବାଦୀମାନେ ଉପଦ୍ରବ ସୃଷ୍ଟି କରୁଛନ୍ତି। ଆତଙ୍କବାଦୀମାନେ ଏହି ଅଞ୍ଚଳକୁ ଟାର୍ଗେଟ କରୁଛନ୍ତି। ଜୁନ ୯ ତାରିଖ ଠାରୁ ଏପର୍ଯ୍ୟନ୍ତ ଏକାଧିକ ଘଟଣା ଘଟାଇସାରିଛନ୍ତି। ଅନ୍ୟପଟରେ ସେନା ୭୪୦କିମି ଦୀର୍ଘ ନିୟନ୍ତ୍ରଣ ରେଖାରେ ସତର୍କ ରହିଛି।