ମୁମ୍ବାଇ: ଆଗାମୀ ମହାରାଷ୍ଟ୍ର ବିଧାନସଭା ନିର୍ବାଚନ ପାଇଁ ଭାରତୀୟ ଜନତା ପାର୍ଟି (ବିଜେପି) ରବିବାର ନିଜର ଇସ୍ତାହାର ଜାରି କରିଛି। କେନ୍ଦ୍ର ଗୃହମନ୍ତ୍ରୀ ଅମିତ ଶାହ ମୁମ୍ବାଇର ହୋଟେଲ ସୋଫିଟେଲରେ ଦଳର ଇସ୍ତାହାର ଉନ୍ମୋଚନ କରିଛନ୍ତି। 

ଏହି ଅବସରରେ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ସିଏମ ଦେବେନ୍ଦ୍ର ଫଡନାଭିସ କହିଛନ୍ତି ଯେ ଏହି ଇସ୍ତାହାର ବିକଶିତ ଭାରତ ଏବଂ ବିକଶିତ ମହାରାଷ୍ଟ୍ରର ରୋଡମ୍ୟାପ୍। ବିଜେପି ଯାହା କହୁଛି, ତାହା ପୂରଣ କରୁଛି। ଏହା ହେଉଛି ମହାରାଷ୍ଟ୍ରର ପୂର୍ବ ବିକାଶର ଇସ୍ତାହାର। ରାଜ୍ୟର ବିକାଶ ପାଇଁ ଆମେ ପ୍ରତିଶ୍ରୁତିବଦ୍ଧ। 

ନଭେମ୍ବର ୨୦ରେ ମହାରାଷ୍ଟ୍ରର ସମସ୍ତ ୨୮୮ ବିଧାନସଭା ଆସନପାଇଁ ମତଦାନ ହେବ। ନଭେମ୍ବର ୨୩ତାରିଖରେ ଭୋଟ୍ ଗଣତି ହେବ। ବିଜେପି ଏହି ନିର୍ବାଚନରେ ମହାଯୁତି ମେଣ୍ଟ ସହ ପ୍ରତିଦ୍ୱନ୍ଦ୍ୱିତା କରୁଛି। ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଶିବସେନା ଏବଂ ଅଜିତ ପାୱାରଙ୍କ ରାଷ୍ଟ୍ରବାଦୀ କଂଗ୍ରେସ ସହ ବିଜେପି ନିର୍ବାଚନ ଲଢୁଛି।

ଇସ୍ତାହାରରେ ବିଜେପିର ପ୍ରତିଶ୍ରୁତି

-ଚାଷୀଙ୍କ ଋଣ ଛାଡ଼ କରିବାକୁ ବିଜେପି ପ୍ରତିଶ୍ରୁତି ଦେଇଛି।

-ମହିଳାମାନଙ୍କୁ ମାସିକ ୨୧୦୦ ଟଙ୍କା ଦିଆଯିବ।

-ବାର୍ଦ୍ଧକ୍ୟ ଭତ୍ତା ୧୫୦୦ ଟଙ୍କାରୁ ୨୧୦୦ ଟଙ୍କାକୁ ବୃଦ୍ଧି କରାଯିବ।

-ମହାରାଷ୍ଟ୍ରରେ ୨୫ ଲକ୍ଷ ନିଯୁକ୍ତି ଦେବାକୁ ସଂକଳ୍ପ।

ଇସ୍ତାହାର ଉନ୍ମୋଚନ ପରେ କେନ୍ଦ୍ରମନ୍ତ୍ରୀ ଅମିତ ଶାହ କହିଛନ୍ତି ଯେ ମହାବିକାଶ ଆଘାଡିର ରାଜନୀତି ତୁଷ୍ଟୀକରଣ। ଗମ୍ଭୀର ସମସ୍ୟା ଅଧିକ ଦିନ ପର୍ଯ୍ୟନ୍ତ ରହିନଥାଏ। କ୍ଷମତା ଲୋଭ ପାଇଁ ଏମଭିଏର ଏହି ଘୋଷଣା କରାଯାଇଛି। ବିଜେପିର ଇସ୍ତାହାର ହେଉଛି ଲୋକଙ୍କ ଆଶାର ପ୍ରତିଶ୍ରୁତି। ଆମର ଇସ୍ତାହାର ହେଉଛି ପଥରରେ ଆଙ୍କିଥିବା ଏକ ରେଖା। ମହାବିକାଶ ଆଘାଡିର ନିର୍ବାଚନ ପ୍ରଚାରକୁ ନେଇ ପାରସ୍ପରିକ ବିରୋଧ ଘେରି ରହିଛି। କଂଗ୍ରେସ ନିଜର ପ୍ରତିଶ୍ରୁତି ପୂରଣ କରୁନାହିଁ।

ଅଧିକ ପଢ଼ନ୍ତୁ: ଯଦି କଂଗ୍ରେସ ଗ୍ରାମୀଣ ଭାରତକୁ ପ୍ରାଥମିକତା ଦେଇଥାନ୍ତା