ନେପାଳ: ସକାଳୁ ସକାଳୁ ଭୂମିକମ୍ପରେ ଥରିଲା ନେପାଳ ଓ ସିକ୍କିମ୍ ସୀମାନ୍ତ ଅଞ୍ଚଳ। ଗୁରୁବାର ଭୋର ପ୍ରାୟ ୪ଟା ୩୦ ମିନିଟ୍‌ରେ ୪.୯ ତୀବ୍ରତାର ଏକ ମଧ୍ୟମ ଧରଣର ଭୂମିକମ୍ପ ଅନୁଭୂତ ହୋଇଛି। ଏହାର ଝଟ୍‌କା ପଶ୍ଚିମ ଓ ପୂର୍ବ ସିକ୍କିମ୍‌ର ବିଭିନ୍ନ ଅଞ୍ଚଳ ସମେତ ରାଜଧାନୀ ଗାଙ୍ଗଟକ୍‌ରେ ମଧ୍ୟ ଅନୁଭୂତ ହୋଇଥିଲା।

୭୩ କିଲୋମିଟର ଗଭୀରରେ ଭୂମିକମ୍ପର କେନ୍ଦ୍ର

ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର (NCS)ର ତଥ୍ୟ ଅନୁସାରେ, ଭୂମିକମ୍ପଟି ଭୋର ୪ଟା ୩୦ ମିନିଟ୍ ୨୯ ସେକେଣ୍ଡରେ ରେକର୍ଡ କରାଯାଇଥିଲା। ଏହାର କେନ୍ଦ୍ରସ୍ଥଳ ସିକ୍କିମ୍‌ର ୟୁକ୍ସମ୍‌ଠାରୁ ପ୍ରାୟ ୪୦ କିଲୋମିଟର ଉତ୍ତର-ପଶ୍ଚିମ ଦିଗରେ ନେପାଳ ଅଞ୍ଚଳରେ ରହିଥିଲା। ଭୂପୃଷ୍ଠଠାରୁ ୭୩ କିଲୋମିଟର ଗଭୀରରେ ଏହାର ଉତ୍ପତ୍ତି ହୋଇଥିବା ରେକର୍ଡ କରାଯାଇଛି।

ଲୋକେ ଆତଙ୍କିତ, କ୍ଷୟକ୍ଷତିର ନାହିଁ ଖବର 

ଭୋର ସମୟରେ ହଠାତ୍ ଭୂମି ଦୋହଲିବାରୁ ଅନେକ ଲୋକ ନିଦରୁ ଉଠିପଡ଼ିଥିଲେ। ତେବେ ପ୍ରାରମ୍ଭିକ ରିପୋର୍ଟ ଅନୁସାରେ, ଏହି ଭୂମିକମ୍ପରେ କୌଣସି ଜୀବନହାନି କିମ୍ବା ସମ୍ପତ୍ତି ନଷ୍ଟ ହୋଇଥିବା ଖବର ମିଳିନାହିଁ। ପରିସ୍ଥିତି ଉପରେ ସମ୍ପୃକ୍ତ କର୍ତ୍ତୃପକ୍ଷ ନଜର ରଖିଛନ୍ତି।

ଭୂମିକମ୍ପପ୍ରବଣ ଅଞ୍ଚଳ ନେପାଳ

ଉଲ୍ଲେଖଯୋଗ୍ୟ, ନେପାଳ ଏକ ଭୂମିକମ୍ପପ୍ରବଣ ଅଞ୍ଚଳ ହୋଇଥିବାରୁ ଏଠାରେ ସମୟ ସମୟରେ ଭୂକମ୍ପ ଅନୁଭୂତ ହୋଇଥାଏ। ତେଣୁ ଏଭଳି ଘଟଣା ପରେ ସ୍ଥାନୀୟ ପ୍ରଶାସନ ଓ ବିପର୍ଯ୍ୟୟ ପରିଚାଳନା ଟିମ୍‌ର ସତର୍କତା ଗୁରୁତ୍ୱପୂର୍ଣ୍ଣ ହୋଇପଡ଼ିଛି।