ବୈଦେଶିକ ସଚିବ ହର୍ଷବର୍ଦ୍ଧନ ଶ୍ରିଙ୍ଗଲା ଦୁଇ ଦିନିଆ ଗସ୍ତରେ ଗୁରୁବାର ନେପାଳରେ ପହଞ୍ଚିଛନ୍ତି। ସେଠାରେ ପହଞ୍ଚି ସେ କହିଛନ୍ତି ଯେ ଭାରତ-ନେପାଳ ସମ୍ପର୍କ ଦୃଢ ଏବଂ ଭାରତ ଦ୍ୱିପାକ୍ଷିକ ସମ୍ପର୍କକୁ ମଜବୁତ କରିବା ହେଉଛି ମୁଖ୍ୟ ଲକ୍ଷ୍ୟ ।

ବୈଦେଶିକ ସଚିବ କାଠମାଣ୍ଡୁର ତ୍ରିଭୁବନ ଅନ୍ତର୍ଜାତୀୟ ବିମାନବନ୍ଦରରେ ସକାଳ ୧୧ଟାରେ ପହଞ୍ଚିବା ପରେ ସେଠାରେ ତାଙ୍କୁ ସ୍ୱାଗତ କରାଯାଇଥିଲା।  ବିମାନବନ୍ଦରରେ  ଶ୍ରିଙ୍ଗଲା କହିଛନ୍ତି ଯେ ବୈଦେଶିକ ସଚିବ ହେବା ପରେ ଏହା ତାଙ୍କର ପ୍ରଥମ ନେପାଳ ଗସ୍ତ  । ତେବେ ସେ କାଠମାଣ୍ଡୁ ପରିଦର୍ଶନ କରିବାକୁ ଚାହୁଁଛନ୍ତି କିନ୍ତୁ କରୋନା ମହାମାରୀ ହେତୁ ତାହା ଯାଇହେବନାହିଁ। ତଥାପି ସେ ଏଠାରେ ଥିବାରୁ ବହୁତ ଖୁସି ଅଛନ୍ତି। ଆଗାମୀ ଦିନରେ ପ୍ରୟାସ ଦୁଇ ଦେଶ ମଧ୍ୟରେ ସମ୍ପର୍କକୁ ଆଗକୁ ନେବା ଉପରେ ଧ୍ୟାନ ଦିଆଯିବ  ।

ଆତିଥ୍ୟ ପାଇଁ ନେପାଳ ସରକାରଙ୍କୁ ଧନ୍ୟବାଦ ଜଣାଇ ସେ କହିଛନ୍ତି ଯେ କାଠମାଣ୍ଡୁରେ ନେତୃତ୍ୱାଧିକାରୀଙ୍କ ସହ ଆଲୋଚନା କରିବେ। ସେ ପ୍ରଥମେ ବୈଦେଶିକ ସଚିବ ଏବଂ ପରେ ବୈଦେଶିକ ମନ୍ତ୍ରୀ ପ୍ରଦୀପ ଗୟାୱାଲୀଙ୍କୁ ଭେଟିବେ।

ନେପାଳର ବୈଦେଶିକ ମନ୍ତ୍ରଣାଳୟ ଅନୁଯାୟୀ  ଶ୍ରିଙ୍ଗଲା ଆଜି ପ୍ରଧାନମନ୍ତ୍ରୀ କେ.ପି ଶର୍ମା ଓଲି ଏବଂ ରାଷ୍ଟ୍ରପତି ବିଦ୍ୟା ଦେବୀ ଭଣ୍ଡାରୀଙ୍କୁ ଭେଟିବାର କାର୍ଯ୍ୟକ୍ରମ ରହିଛି। ଶୁକ୍ରବାର ଦିନ ସେ କାଠମାଣ୍ଡୁର ଏକ ହୋଟେଲରେ ଭାରତ-ନେପାଳ ସମ୍ପର୍କ ଉପରେ ଏକ ଅଭିଭାଷଣ ପ୍ରଦାନ କରିବେ ଏବଂ ତା’ପରେ ଭାରତୀୟ ସହାୟତାରେ ନିର୍ମିତ ବିଦ୍ୟାଳୟ ପରିଦର୍ଶନ କରିବେ।