ଅସମ୍ଭବକୁ ସମ୍ଭବ କରି ଦଖାଇଲେ ଆଇଟି କପଲ୍। ବେଙ୍ଗାଲୁରୁର ଦୁଇ ଯୁବ ଆଇଟି ପ୍ରଫେସନାଲ୍ ଡେନିଶ୍ ଅବ୍ଦି  ଏବଂ ଭ୍ରୁଶାଲି ପ୍ରସାଦେଙ୍କୁ ନେଇ ଏବେ ସମଗ୍ର ଦେଶରେ ଚର୍ଚ୍ଚା। କାରଣ ସେମାନେ କରିଦେଖାଇଛନ୍ତି ଏମିତି ଏକ କାମ, ଯାହା ଆଜି ପର୍ଯ୍ୟନ୍ତ କୌଣସି ଦମ୍ପତି କରିପାରିନଥିଲେ। ଶ୍ରୀଲଙ୍କାରୁ ଭାରତ ପର୍ଯ୍ୟନ୍ତ ଐତିହାସିକ ରାମ ସେତୁ ରୁଟ୍‌ରେ ସାଙ୍ଗେସାଙ୍ଗେ ଓପେନ୍‌ ଓଟର୍ ସ୍ୱିମ୍ କରି ଇତିହାସ ରଚିଛନ୍ତି ଏହି ଦମ୍ପତି।

ମେ ୭ ତାରିଖ ସକାଳ ପ୍ରାୟ ୪ଟା ୩୦ରେ ଶ୍ରୀଲଙ୍କାର ତାଲାଇମାନ୍ନାରରୁ ଆରମ୍ଭ ହୋଇଥିଲା ସେମାନଙ୍କ ଦୁସାହସିକ ଯାତ୍ରା। ଲକ୍ଷ୍ୟ ଥିଲା ଭାରତର ଧନୁଷ୍କୋଡି ପହଞ୍ଚିବା। ସାମ୍ନାରେ ଥିଲା ପ୍ରାୟ ୩୨ କିଲୋମିଟରର ଭୟଙ୍କର ସମୁଦ୍ର ପଥ। ଉଚ୍ଚ ତରଙ୍ଗ, ଭୟଙ୍କର ସମୁଦ୍ର ସ୍ରୋତ ଓ ପରିବର୍ତ୍ତନଶୀଳ ପବନ ସତ୍ତ୍ୱେ ଦୁହେଁ ହାର ମାନିନଥିଲେ। ପ୍ରାୟ ୧୦ ଘଣ୍ଟା ୪୫ ମିନିଟ୍‌ ଧରି ସମୁଦ୍ର ସହ ସଂଘର୍ଷ କରି ଶେଷରେ ଅପରାହ୍ନ ୩ଟା ୧୫ରେ ସେମାନେ ତାମିଲନାଡୁର ଧନୁଷ୍କୋଡି ତଟରେ ପହଞ୍ଚିଥିଲେ।

ସୋସିଆଲ୍ ମିଡିଆରେ ଭାଇରାଲ୍ ହୋଇଥିବା ଭିଡିଓଗୁଡ଼ିକରେ ଏହି ଦୁସାହସିକ ଯାତ୍ରାର ଅନେକ ଝଲକ ଦେଖିବାକୁ ମିଳିଛି। କେଉଁଠି ଡେନିଶ୍ ସୂର୍ଯ୍ୟୋଦୟ ପୂର୍ବରୁ ଅନ୍ଧକାର ସମୁଦ୍ରକୁ ଝାପ ଦେଉଛନ୍ତି, ତ କେଉଁଠି ଦୁହେଁ ବିଶାଳ ତରଙ୍ଗ ମଧ୍ୟରେ ଘଣ୍ଟାଧରି ପହଁରୁଛନ୍ତି। ଏହି ଅଭିଯାନ ସମୟରେ ସୁରକ୍ଷା ପାଇଁ ସେମାନଙ୍କ ସହ ସପୋର୍ଟ ବୋଟ୍, ପାରାମେଡିକ୍ସ ଟିମ୍ ଓ ଭାରତୀୟ କୋଷ୍ଟଗାର୍ଡ ନିୟୋଜିତ ଥିଲେ।

ଇନ୍‌ଷ୍ଟାଗ୍ରାମରେ ଦମ୍ପତି ଲେଖିଥିଲେ, “ଶ୍ରୀଲଙ୍କାରୁ ଭାରତ ପର୍ଯ୍ୟନ୍ତ ପହଁରି ଏହା କରିବାରେ ପ୍ରଥମ ଦମ୍ପତି ହେବା ଆମ ସ୍ୱପ୍ନ ଥିଲା। ଏହି ଯାତ୍ରା ଆମ ପ୍ରସ୍ତୁତି ଓ ଧୈର୍ଯ୍ୟର ସବୁଠୁ ବଡ଼ ପରୀକ୍ଷା ଥିଲା।” 

ସେମାନଙ୍କ ଏହି ଅଦମ୍ୟ ସାହସ, ପ୍ରେମ ଓ ଦୃଢ ଇଚ୍ଛାଶକ୍ତିର କାହାଣୀ ଏବେ ଲକ୍ଷ ଲକ୍ଷ ଲୋକଙ୍କ ପାଇଁ ପ୍ରେରଣା ପାଲଟିଛି। 

 

 

 

 

View this post on Instagram

 

 

 

 

 

 

 

 

 

 

 

A post shared by Vrushali & Danish | Fit Couple • Sea Swimmers • Triathletes (@our.life.in.miles)