ଶିଳ୍ପ ପ୍ରତିଷ୍ଠା ହେବ, ଲୋକେ ନିଯୁକ୍ତି ପାଇବେ, କାରଖାନାରେ ରାଜ୍ୟର କଞ୍ଚାମାଲ ଲାଗିବ, ଚାଷୀ ଅଭାବୀ ବିକ୍ରିରୁ ବଞ୍ଚିବେ କହି ବର୍ଷ ବର୍ଷ ଧରି ରାଜ୍ୟବାସୀଙ୍କୁ ଭୁଆଁ ବୁଲାଇ ଆସୁଛନ୍ତି ରାଜ୍ୟ ସରକାର। ଶିଳ୍ପାୟନ ଓ ଚାଷୀଙ୍କ କଲ୍ୟାଣ ନାଁରେ ଏମିତି ଚାଷୀଙ୍କୁ ଓଲା ବନାଉଛନ୍ତି ରାଜ୍ୟ ସରକାର। ଆଉ ସରକାରଙ୍କୁ ଭରସା କରି କେମିତି ଲକ୍ଷ ଲକ୍ଷ ଲୋକ ଦୁର୍ଦ୍ଦଶା ଭୋଗୁଛନ୍ତି ତାର ପ୍ରମାଣ ହେଉଛନ୍ତି କେନ୍ଦ୍ରାପଡ଼ାର ନଳିତା ଚାଷୀ। କେନ୍ଦ୍ରାପଡ଼ା ଜିଲ୍ଲାର 30 ପ୍ରତିଶତ ଚାଷୀ ନଳିତା ଚାଷ ଉପରେ ନିର୍ଭରଶୀଳ । ମହାକାଳପଡ଼ା, ମାର୍ଶାଘାଇ, କେନ୍ଦ୍ରାପଡ଼ା, ପାଟକୁରା ପଟ୍ଟାମୁଣ୍ଡାଇ, ରାଜକନିକା ଆଦି ବ୍ଲକର 10ହଜାର 7ଶହ 40ହେକ୍ଟର ଜମିରେ ଏଥର ନଳିତା ଚାଷ ହେଉଛି । କିନ୍ତୁ ଝୋଟ ଅମଳ ପରେ ବିକ୍ରି ହେବା ମୁସ୍କିଲ ହୋଇପଡୁଛି । ଜିଲ୍ଲାରେ ଝୋଟ କଳ ନାହିଁ। ବାଧ୍ୟ ହୋଇ ଶାଗ ମାଛ ଦରରେ କଷ୍ଟ ଉପାର୍ଜିତ ଫସଲ ବିକ୍ରି କରୁଛନ୍ତି ନଳିତା ଚାଷୀ। ଚାଷୀଙ୍କଠାରୁ ଝୋଟ କିଣିବା ନେଇ ସରକାରଙ୍କ ପକ୍ଷରୁ କୌଣସି ବ୍ୟବସ୍ଥା ନାହିଁ। ଚାଷୀଙ୍କ ଅସହାୟତାର ସୁଯୋଗ ନେଇ ଚାଷୀଙ୍କୁ ଶୋଷଣ କରୁଛନ୍ତି ଦଲାଲ । 

    କେବଳ କେନ୍ଦ୍ରାପଡ଼ା ନୁହେଁ କୃଷି ଭିତ୍ତିକ ଶିଳ୍ପ ଅଭାବରୁ ଦୁର୍ଦ୍ଦଶା ଭୋଗୁଛନ୍ତି ସାରା ରାଜ୍ୟର ଚାଷୀ। ଶିଳ୍ପାୟନ ଦିଗରେ ବିଜେଡି ସରକାରର ବିଫଳତା ଫଳରେ ଯନ୍ତ୍ରଣାରେ ରାଜ୍ୟବାସୀ। ଖୋଦ୍ ମୁଖ୍ୟମନ୍ତ୍ରୀଙ୍କ ଜିଲ୍ଲା ଗଞ୍ଜାମରୁ ଯାଇ ବାହାର ରାଜ୍ୟରେ ଖଟୁଛନ୍ତି 5 ଲକ୍ଷ ଲୋକ । ଗଞ୍ଜାମ ଆସିକାରେ 15 ବର୍ଷ ହେଲା ବନ୍ଦ ହୋଇ ପଡ଼ିଛି ଆସିକା ସୂତାକଳ। କିନ୍ତୁ ଏହାର ପୁନରୁଦ୍ଧାର ନେଇ ଚୁପ ରହିଛନ୍ତି ବିଜେଡି ସରକାର । ସାରା ଦେଶରେ ଶିଳ୍ପାୟନ ଦୃଷ୍ଟିରୁ ତଳଆଡୁ 5 ନଂ ସ୍ଥାନରେ ରହିଛି ଓଡ଼ିଶା । ପ୍ରତିବର୍ଷ ରାଜ୍ୟରେ ହଜାର ହଜାର ଶିଳ୍ପାନୁଷ୍ଠାନରେ ଝୁଲୁଛି ତାଲା । ବର୍ଷକ ମଧ୍ୟରେ ରାଜ୍ୟରେ 7ଟି ବୃହତ୍ ଶିଳ୍ପ ମଧ୍ୟ ବନ୍ଦ ହୋଇଥିଲା । ଆଉ ବୃହତ ଶିଳ୍ପ ବନ୍ଦ ହେବା ପଛରେ କାରଣ କଞ୍ଚାମାଲର ଅଭାବ ବୋଲି ଦର୍ଶାଇଥିଲେ ସରକାର । ଗୋଟିଏ ପଟେ କଞ୍ଚାମାଲ ଅଭାବରୁ ଶିଳ୍ପ ବନ୍ଦ ହେଉଥିବା ଦର୍ଶାଉଛନ୍ତି ସରକାର ଅନ୍ୟପଟେ ଝୋଟର ଅଭାବୀ ବିକ୍ରି କରି ହତାଶ ହେଉଛନ୍ତି ରାଜ୍ୟର ନଳିତା ଚାଷୀ ।   

ଅଧିକ ପଢ଼ନ୍ତୁ : ୧୫୦ ବର୍ଷ ତଳର ମାଲଗୋଦାମ କଟକରୁ ଉଠିଯିବ