ମୁମ୍ବାଇ: ବଲିଉଡ ନିର୍ଦ୍ଦେଶକ ଆଦିତ୍ୟ ଧରଙ୍କ ନିର୍ଦ୍ଦେଶିତ ଚଳଚ୍ଚିତ୍ର 'ଧୁରନ୍ଧର ୨'  ବକ୍ସ ଅଫିସରେ ନିଆଁ ଲଗାଇ ଦେଇଛି। ଏହି ଫିଲ୍ମଟି ପ୍ରତିଦିନ ନୂଆ ନୂଆ ରେକର୍ଡ ସୃଷ୍ଟି କରୁଥିବା ବେଳେ ଏବେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଫିଲ୍ମର ବଡ଼ ସଫଳତା ଏବଂ କୋଟି କୋଟି ଟଙ୍କାର କମାଇ ମଧ୍ୟରେ, ଲିଆରି  ଅଞ୍ଚଳର ଲୋକମାନେ ଆଦିତ୍ୟ ଧରଙ୍କ ପାଖରେ ଏକ ଅଜବ ଦାବି ରଖିଛନ୍ତି। ସେମାନେ କହିଛନ୍ତି, "୫୦୦ କୋଟି ଆମକୁ ଦିଅ.."।

କଣ ପାଇଁ ହେଉଛି ଏହି ଦାବି?

ସୂଚନା ଅନୁଯାୟୀ, 'ଧୁରନ୍ଧର ୨' ଚଳଚ୍ଚିତ୍ରର କିଛି ଗୁରୁତ୍ୱପୂର୍ଣ୍ଣ ଦୃଶ୍ୟ ଏବଂ କାହାଣୀର ପୃଷ୍ଠଭୂମି ଲିଆରି ସହିତ ଜଡ଼ିତ। ଫିଲ୍ମଟି ବ୍ୟବସାୟିକ ଭାବେ ଅତ୍ୟନ୍ତ ସଫଳ ହୋଇଥିବାରୁ ସ୍ଥାନୀୟ ଲୋକେ ଅନୁଭବ କରୁଛନ୍ତି ଯେ ସେମାନଙ୍କ ଅଞ୍ଚଳର ପରିଚୟ ବ୍ୟବହାର କରି ଫିଲ୍ମଟି ଏତେ ଟଙ୍କା ରୋଜଗାର କରିଛି। ତେଣୁ ସେମାନେ ଦାବି କରିଛନ୍ତି ଯେ, ଲାଭର ଏକ ବଡ଼ ଅଂଶ ଅର୍ଥାତ୍ ୫୦୦ କୋଟି ଟଙ୍କା ଲିଆରିର ବିକାଶ ଏବଂ ସେଠାକାର ଲୋକଙ୍କ କଲ୍ୟାଣ ପାଇଁ ଖର୍ଚ୍ଚ କରାଯାଉ।

ସୋସିଆଲ ମିଡିଆରେ ଭାଇରାଲ୍

ଏହି ଦାବି ବର୍ତ୍ତମାନ ସୋସିଆଲ ମିଡିଆରେ ବେଶ୍ ଭାଇରାଲ୍ ହେବାରେ ଲାଗିଛି। ଲିଆରିର ଯୁବପିଢ଼ି ଏବଂ ସ୍ଥାନୀୟ ବାସିନ୍ଦା ଭିଡିଓ ସେୟାର କରି ଆଦିତ୍ୟ ଧରଙ୍କୁ ଟ୍ୟାଗ୍ କରୁଛନ୍ତି। ସେମାନଙ୍କ କହିବା କଥା ହେଉଛି, ଯେତେବେଳେ ଜଣେ ନିର୍ଦ୍ଦେଶକ କୌଣସି ଏକ ନିର୍ଦ୍ଦିଷ୍ଟ ସ୍ଥାନର କାହାଣୀ ଦେଖାଇ ଶହ ଶହ କୋଟି ରୋଜଗାର କରନ୍ତି, ସେତେବେଳେ ସେହି ସ୍ଥାନର ଉନ୍ନତି ପାଇଁ ମଧ୍ୟ କିଛି ଯୋଗଦାନ ଦେବା ଉଚିତ୍।

ଆଦିତ୍ୟ ଧରଙ୍କ ପ୍ରତିକ୍ରିୟା

ଏପର୍ଯ୍ୟନ୍ତ ନିର୍ଦ୍ଦେଶକ ଆଦିତ୍ୟ ଧର କିମ୍ବା ଫିଲ୍ମର ପ୍ରଯୋଜନା ସଂସ୍ଥା ପକ୍ଷରୁ ଏହି ଦାବି ଉପରେ କୌଣସି ଆଧିକାରିକ ବୟାନ ଆସିନାହିଁ। ତେବେ ଫିଲ୍ମର ସଫଳତାକୁ ନେଇ ସେ ବେଶ୍ ଉତ୍ସାହିତ ଅଛନ୍ତି। 'ଧୁରନ୍ଧର ୨' ପୂର୍ବ ଭାଗ ଅପେକ୍ଷା ଅଧିକ ଆକ୍ସନ୍ ଏବଂ ରୋମାଞ୍ଚରେ ଭରପୂର ହୋଇଥିବାରୁ ଦର୍ଶକଙ୍କୁ ବେଶ୍ ପସନ୍ଦ ଆସୁଛି।

ବକ୍ସ ଅଫିସରେ ଧମାକା

'ଧୁରନ୍ଧର ୨' ମାତ୍ର କିଛି ଦିନ ମଧ୍ୟରେ ଅନ୍ତର୍ଜାତୀୟ ସ୍ତରରେ ବଡ଼ ବ୍ୟବସାୟ କରିଛି। ଫିଲ୍ମର ଷ୍ଟାର୍ କାଷ୍ଟ ଏବଂ ଦମଦାର୍ ସଂଳାପ ଯୋଗୁଁ ଏହା ୨୦୨୬ର ଅନ୍ୟତମ ବ୍ଲକବଷ୍ଟର ଫିଲ୍ମ ହେବାକୁ ଯାଉଛି।