ନୂଆଦିଲ୍ଲୀ: ଏକ ବଡ଼ ଦୁର୍ଘଟଣାରୁ ବର୍ତ୍ତିଯାଇଛନ୍ତି ବଲିଉଡ୍ ଅଭିନେତା ନୱାଜଉଦ୍ଦୀନ ସିଦ୍ଦିକି । ଉତ୍ତର ପ୍ରଦେଶ କୋତବାଲୀ ସୁଟିଂ ସେଟରେ ତାଙ୍କ କାର୍ ଦୁର୍ଘଟଣାଗ୍ରସ୍ତ ହୋଇଛି । ଫଳରେ ତାଙ୍କର ଡ୍ରାଇଭରଙ୍କ ମୁଣ୍ଡରେ ଗଭୀର ଆଘାତ ଲାଗିଥିବାବେଳେ ନୱାଜଉଦ୍ଦୀନ ଅଳ୍ପକେ ରକ୍ଷାପାଇ ଯାଇଛନ୍ତି । ମର୍ଡର ମିଷ୍ଟ୍ରି ‘ରାତ୍ ଅକେଲୀ ହେ’ ପାର୍ଟ-୨ର ସୁଟିଂ ସେଟରେ ଏହି ଅଘଟଣ ଘଟିଥିବା ଜଣାପଡ଼ିଛି । 

ପ୍ରତ୍ୟକ୍ଷଦର୍ଶୀ କହିବା ମୁତାବକ, ମଙ୍ଗଳବାର ବିଳମ୍ବିତ ରାତି ୧ଟା ୪୫ରେ ଫିଲ୍ମର ସୁଟିଂ ଚାଲିଥିଲା । ଡ୍ରାଇଭର ଦ୍ରୁତ ଗତିରେ କାରଟିକୁ କୋତୱାଲି ଭିତରକୁ ନେଇଗଲେ ଏବଂ ଷ୍ଟିଅରିଂ ଉପରୁ ନିୟନ୍ତ୍ରଣ ହରାଇ ବସିଥିଲେ । କାରଟି ସିଧା ସଳକ ଯାଇ ଏକ କାନ୍ଥରେ ପିଟି ହୋଇ ଏକ ଭୟଙ୍କର ଶବ୍ଦ କରିଥିଲା । ଯାହାକୁ ଶୁଣିବା ମାତ୍ରେ ପ୍ରଡକ୍ସନ ୟୁନିଟର ସଦସ୍ୟମାନେ ଦୌଡ଼ି ଆସିଥିଲେ । ଡ୍ରାଇଭରଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ମେଡ଼ିକାଲରେ ଭର୍ତ୍ତି କରିଛନ୍ତି । ଏହା ପରେ ସୁଟିଂକୁ ଅଧାରୁ ବନ୍ଦ କରିବାକୁ ପଡିଥିଲା 

ହତ୍ୟା ରହସ୍ୟ ଉପରେ ଆଧାରିତ ଫିଲ୍ମ "ରାତ୍ ଅକେଲୀ ହୈ ପାର୍ଟ-୨"ର ସୁଟିଂ ରବିବାରଠାରୁ ଆରମ୍ଭ ହୋଇଛି । ପ୍ରଥମ ଦିନରେ ମେଥଡିଷ୍ଟ ସ୍କୁଲରେ ସୁଟିଂ କରାଯାଇଥିଲା । ସୋମବାର ଏବଂ ମଙ୍ଗଳବାର କୋତୱାଲିରେ ସୁଟିଂ ଆରମ୍ଭ ହୋଇଥିଲା । ଜାଜମାଉର ସିଦ୍ଧନାଥ ଘାଟ ସମେତ ଅନ୍ୟାନ୍ୟ ସ୍ଥାନରେ ମଧ୍ୟ ସୁଟିଂ ହେବ । 

ଅଭିନେତା ନୱାଜୁଦ୍ଦିନ ସିଦ୍ଦିକି, ଅଖିଳେନ୍ଦ୍ର ମିଶ୍ର, ଅଭିନେତ୍ରୀ ରାଧିକା ଆପ୍ଟେଙ୍କ ସମେତ ସହରର କନିଷ୍ଠ କଳାକାରମାନେ ଏହି ଚଳଚ୍ଚିତ୍ରରେ ଅଭିନୟ କରୁଛନ୍ତି । ପ୍ରଶଂସକଙ୍କ ଭିଡ଼କୁ ଦେଖି ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । କୌଣସି ପ୍ରଶଂସକ ଯେମିତି ଭିତରକୁ ନ ଯାଆନ୍ତି ସେଥିପାଇଁ ସୁଟିଂ ସ୍ଥଳରେ ପୋଲିସ ବ୍ୟାରିକେଡ୍ ବ୍ୟବସ୍ଥା କରାଯାଇଛି । 

୨୦୨୦ କୋରୋନା ମହାମାରୀ ସମୟରେ ଏହି ଫିଲ୍ମର ପ୍ରଥମ ଭାଗ ରିଲିଜ୍ ହୋଇଥିଲା । ଓଟିଟି ପ୍ଲାଟ୍ ଫର୍ମ ନେଟଫ୍ଲିକ୍ସରେ ଏହା ମୁକ୍ତି ଲାଭ କରିଥିଲା । ଦୀର୍ଘ ୫ ବର୍ଷ ପରେ ଏହାର ଦ୍ୱିତାୟ ଭାଗ ସୁଟିଂ ଆରମ୍ଭ ହୋଇଛି ।