ଭୁବନେଶ୍ୱର: ବଙ୍ଗୀୟ ଗାୟକ ସୌରିନ ଭଟ୍ଟଙ୍କ ପାଇଁ ଅଡ଼ୁଆ ବଢ଼ିଛି । ଯୁବତୀଙ୍କୁ ବିବାହ ପ୍ରଲୋଭନ ଦେଖାଇ ନିର୍ଯାତନା ଦେବା ମାମଲାରେ ଓଡ଼ିଶା ହାଇକୋର୍ଟ ସୌରିନଙ୍କ ଅନ୍ତରୀଣ ସୁରକ୍ଷାକୁ ପ୍ରତ୍ୟାହାର କରିଛନ୍ତି । ଫଳରେ ସୌରିନଙ୍କ ପାଇଁ ଗିରଫଦାରୀ ଭୟ ବଢ଼ିଛି । 

ମହିଳାଙ୍କୁ ବିବାହ ପ୍ରଲୋଭନ ଦେଖାଇ ନିର୍ଯ୍ୟାତନା ଦେବା ଏବଂ ଲକ୍ଷାଧିକ ଟଙ୍କା ଠକି ନେଇଯିବା ଅଭିଯୋଗରେ କଟକ ମହିଳା ଥାନାରେ ଅଭିଯୋଗ ହୋଇଥିଲା । ସୌରିନ ହାଇକୋର୍ଟଙ୍କ ଦ୍ୱାରସ୍ଥ ହୋଇ ଆଗୁଆ ଜାମିନ ପାଇଁ ଆବେଦନ କରିଥିଲେ । ହାଇକୋର୍ଟଙ୍କ ତାଙ୍କୁ ଅନ୍ତରୀଣ ସୁରକ୍ଷା ପ୍ରଦାନ କରିଥିଲେ । ମାତ୍ର ସୌରିନଙ୍କୁ ବାରମ୍ବାର ପୋଲିସ ନୋଟିସ୍ ଜାରି କରିବା ସତ୍ତ୍ୱେ ସେ ହାଜର ହୋଇନଥିଲେ । ଏପରିକି ପଶ୍ଚିମବଙ୍ଗରେ ତାଙ୍କ ବାସଭବନରେ ନୋଟିସ୍ କରାଯାଇଥିଲା । ଦୀର୍ଘ ଦିନ ପରେ ସେ କଟକ ମହିଳା ଥାନାରେ ହାଜର ହୋଇନଥିଲେ । ଏହା ପରେ ହାଇକୋର୍ଟ ତାଙ୍କ ଅନ୍ତରୀଣ ଜାମିନ ସୁରକ୍ଷାକୁ ପ୍ରତ୍ୟାହାର କରିନେଇଛନ୍ତି । ଯଦ୍ୱାରା ସୌରିନଙ୍କ ଗିରଫଦାରୀ ସମ୍ଭାବନା ବଢ଼ି ଯାଇଛି । 

ଉଲ୍ଲେଖ ଯୋଗ୍ୟ, ୨୦୨୩ରେ ଜଣେ ମହିଳା ବ୍ୟାଙ୍କ କର୍ମଚାରୀ ସୌରିନଙ୍କ ବିରୁଦ୍ଧରେ ଶାରିରୀକ ନିର୍ଯ୍ୟାତନା ଏବଂ ୯ ଲକ୍ଷ ଟଙ୍କା ଠକି ନେଇଥିବା ଅଭିଯୋଗ କରିଥିଲେ । ମହିଳା ଜଣକ ମଧ୍ୟ ଗୀତ ଗାଆନ୍ତି । ଏକ କାର୍ଯ୍ୟକ୍ରମରେ ଉଭୟଙ୍କ ମଧ୍ୟରେ ସାକ୍ଷାତ ହୋଇଥିଲା ଏବଂ ପରେ ଘନିଷ୍ଠତା ବଢ଼ିଥିଲା । ପରେ ବିବାହ ପର୍ଯ୍ୟନ୍ତ କଥା ଯାଇଥିବା ସମ୍ପୃକ୍ତ ଯୁବତୀ ଅଭିଯୋଗ କରିଥିଲେ ।