ବଲିଉଡ୍ ଅଭିନେତା ଗୋବିନ୍ଦା ଏବଂ ତାଙ୍କ ସ୍ତ୍ରୀ ସୁନୀତା ଆହୁଜା ଦୀର୍ଘ ଦିନ ହେବ ଚର୍ଚ୍ଚାରେ ରହିଛନ୍ତି। ସମ୍ପ୍ରତି ଗୋବିନ୍ଦାଙ୍କ ସ୍ତ୍ରୀ ଫ୍ୟାମିଲି କୋର୍ଟ ବାହାରେ ପୁଅଙ୍କ ସହ ଦେଖାଯାଇଥିଲେ, ଯାହା ପରେ ଜଣାପଡ଼ିଥିଲା ଯେ ସେ ଛାଡ଼ପତ୍ର ମାମଲା ପ୍ରତ୍ୟାହାର କରିନେଇଛନ୍ତି। ଅଭିନେତା ଦ୍ୱିତୀୟ ବିବାହ ପାଇଁ ଚିନ୍ତା କରୁଥିଲେ ଏବଂ ସେଥିପାଇଁ ସୁନୀତା ଏହି ପଦକ୍ଷେପ ନେଇଥିଲେ ବୋଲି ଚର୍ଚ୍ଚା ହେଉଥିଲା। କିନ୍ତୁ ଏହି ଖବରକୁ ଗୋବିନ୍ଦାଙ୍କ ମ୍ୟାନେଜର ଭୁଲ୍ ବୋଲି କହିବା ସହ ସୁନୀତାଙ୍କୁ ମଧ୍ୟ ଟାର୍ଗେଟ କରିଥିଲେ ଯେ ଯଦି କୋର୍ଟ କେସ୍ ପ୍ରତ୍ୟାହାର କରିବାର ଥିଲା, ତେବେ ମାମଲା ଦାୟର କରିଥିଲେ କାହିଁକି। ଏସବୁ ଭିତରେ ଗତକାଲି ଅଭିନେତା ଗୋବିନ୍ଦା ହସ୍ପିଟାଲ ବାହାରେ ଦେଖିବାକୁ ମିଳିଥିଲେ। ଏବେ ଜଣାପଡ଼ିଛି ଯେ ଗୋବିନ୍ଦା ମିଡିଆ ଆଉଟଲେଟ୍, ସୋସିଆଲ ମିଡିଆ ଆକାଉଣ୍ଟ ଏବଂ କଣ୍ଟେଣ୍ଟ କ୍ରିଏଟରମାନଙ୍କୁ କଡ଼ା ଚେତାବନୀ ଦେଇଛନ୍ତି। ଏଥିସହିତ ଏକ ପବ୍ଲିକ୍ ନୋଟିସ୍ ମଧ୍ୟ ଜାରି କରିଛନ୍ତି।

ଗୋବିନ୍ଦାଙ୍କ ପବ୍ଲିକ୍ ନୋଟିସ୍ରେ ପରିବାର ବିଷୟରେ ମିଛ, ମାନହାନିକର କିମ୍ବା ସତ୍ୟତା ଯାଞ୍ଚ ହୋଇନଥିବା ତଥ୍ୟ ପ୍ରକାଶ କରିବା କିମ୍ବା ସେୟାର କରିବାକୁ ବାରଣ କରାଯାଇଛି। ଏହି ନୋଟିସ୍ AI ଦ୍ୱାରା ପ୍ରସ୍ତୁତ କିମ୍ବା ବିକୃତ କରାଯାଇଥିବା କଣ୍ଟେଣ୍ଟ ପାଇଁ ମଧ୍ୟ ଲାଗୁ ହେବ। ଏପରି କରୁଥିବା ବ୍ୟକ୍ତିଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଅଭିନେତା ଚେତାବନୀ ଦେଇଛନ୍ତି। କେବଳ ସେତିକି ନୁହେଁ, ଯେଉଁମାନେ ଏଥିପାଇଁ ଦାୟୀ ସାବ୍ୟସ୍ତ ହେବେ, ସେମାନଙ୍କଠାରୁ ୧୦୦ କୋଟି ଟଙ୍କା ପର୍ଯ୍ୟନ୍ତ କ୍ଷତିପୂରଣ ମଧ୍ୟ ଦାବି କରାଯାଇପାରେ।

ଗୋବିନ୍ଦା ଜାରି କଲେ ନୋଟିସ୍

ବଲିଉଡ୍ ଅଭିନେତା ଗୋବିନ୍ଦାଙ୍କ ନୋଟିସ୍ରେ ବିଶେଷ କରି ସେହି ଲୋକ ଏବଂ କଣ୍ଟେଣ୍ଟକୁ ଚେତାବନୀ ଦିଆଯାଇଛି, ଯେଉଁଥିରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ବ୍ୟବହାର କରି ତିଆରି କରାଯାଇଥିବା କିମ୍ବା ପରିବର୍ତ୍ତିତ କରାଯାଇଥିବା ଫଟୋ, ଭିଡିଓ, ଅଡିଓ ରେକର୍ଡିଂ, ମର୍ଫ କରାଯାଇଥିବା ଇମେଜ୍, ଡିପ୍ଫେକ୍ ଏବଂ ଅନ୍ୟାନ୍ୟ କଣ୍ଟେଣ୍ଟ ସାମିଲ ଅଛି। ଏହା ସହିତ ଡିଜିଟାଲ୍ ପ୍ଲାଟଫର୍ମ ଜରିଆରେ ଗୋବିନ୍ଦାଙ୍କ ସ୍ୱର, ବ୍ୟକ୍ତିଗତ ଏବଂ ପାରିବାରିକ ସୂଚନାର ଅପବ୍ୟବହାର କରିବା ସହ ନାମ ଓ ଫଟୋ ସେୟାର କରିବାକୁ କାହାକୁ ବି ଅନୁମତି ନାହିଁ। ନୋଟିସ୍ ଅନୁଯାୟୀ, ଯେଉଁମାନେ ଏପରି କଣ୍ଟେଣ୍ଟ ପ୍ରକାଶ କିମ୍ବା ସେୟାର କରିବେ, ସେମାନଙ୍କ ଉପରେ ମାନହାନି, ପରିଚୟର ଅପବ୍ୟବହାର ଏବଂ ସାଇବର ଅପରାଧ ସହ ଜଡ଼ିତ ଆଇନ ଅନୁସାରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରେ।

ବାସ୍ତବରେ ଏହି ନୋଟିସ୍ରେ ଭାରତୀୟ ନାଗରିକ ସୁରକ୍ଷା ସଂହିତା, ୨୦୨୩ ଏବଂ ଇନଫରମେସନ୍ ଟେକ୍ନୋଲୋଜି ଆକ୍ଟ ୨୦୦୦ର ପ୍ରାବଧାନଗୁଡ଼ିକ ବିଷୟରେ ଉଲ୍ଲେଖ କରାଯାଇଛି। ଦୋଷୀ ସାବ୍ୟସ୍ତ ହେଲେ ସେମାନଙ୍କଠାରୁ ୧୦୦ କୋଟି ଟଙ୍କା ପର୍ଯ୍ୟନ୍ତ କ୍ଷତିପୂରଣ ଦାବି କରାଯାଇପାରେ।