ମୁୁମ୍ବାଇ: ରଣବୀର କପୁରଙ୍କ ବହୁ ପ୍ରତୀକ୍ଷିତ ଫିଲ୍ମ ‘ରାମାୟଣ’ର ରିଲିଜ୍ ତାରିଖ ଘୋଷଣା ହୋଇଛି । ନିର୍ମାତା ନୀତେଶ ତିୱାରୀ ସାମାଜିକ ଗଣମାଧ୍ୟମରେ ଫିଲ୍ମର ପ୍ରଥମ ଲୁକ୍ ପୋଷ୍ଟର ଜାରି କରି ଫିଲ୍ମ ଦୁଇଟି ପାର୍ଟରେ ରିଲିଜ୍ ହେବ ବୋଲି ସୂଚନା ଦେଇଛନ୍ତି । ସେ କହିଛନ୍ତି, ଫିଲ୍ମର ପ୍ରଥମ ଭାଗ ଆସନ୍ତା ବର୍ଷ ଦୀପାବଳିରେ ସିନେମାଘରକୁ ଆସିବ । ଆଉ ଦ୍ୱିତୀୟ ଭାଗ ୨୦୨୭ ଦୀପାବଳିରେ ରିଲିଜ୍ ହେବ । 

ନୀତେଶ ତିୱାରୀଙ୍କ ସହିତ ଫିଲ୍ମର ନିର୍ମାତା ନମିତ ମାଲହୋତ୍ରା ମଧ୍ୟ ଫିଲ୍ମର ପୋଷ୍ଟର ସେୟାର କରିଛନ୍ତି । ନମିତ କହିଛନ୍ତି, ମୁଁ ଏକ ଦଶନ୍ଧିରୁ ଅଧିକ ସମୟ ପୂର୍ବରୁ ଏହି ମହାକାବ୍ୟକୁ ବଡ ପରଦାରେ ଆଣିବାକୁ ଉଦ୍ୟମ କରିଥିଲି । ଆଜି ଏହି ଛୋଟ ଉଦ୍ୟମକୁ ଫିଲ୍ମରେ ପରିଣତ ହେଉଥିବା ଦେଖି ବହୁତ ଖୁସି ଲାଗୁଛି । ଆମର କେବଳ ଗୋଟିଏ ଉଦ୍ଦେଶ୍ୟ, ନିଜର ଇତିହାସ, ନିଜର ସତ୍ୟତା ଓ ନିଜର ସଂସ୍କୃତିର ସବୁଠୁ ବଡ ମହାକାବ୍ୟ ରାମାୟଣକୁ ସମଗ୍ର ଦୁନିଆରେ ଉପସ୍ଥାପନ କରିବ ।

ଫିଲ୍ମରେ ଭଗବାନ ରାମଙ୍କ ମା କୌଶଲ୍ୟା ଚରିତ୍ରରେ ଅଭିନୟ କରିଥିବା ଅଭିନେତ୍ରୀ ଇନ୍ଦିରା କୃଷ୍ଣନ କହିଥିଲେ ଫିଲ୍ମର ସୁଟିଂ ପୂରା ହୋଇଛି । ଏକ ୟୁଟ୍ୟୁବ ଚ୍ୟାନେଲ ସହ ସାକ୍ଷାତକାର ସମୟରେ ସେ କହିଥିଲେ, ଫିଲ୍ମରେ ରଣବୀର କପୁର ଭଗବାନ ରାମ, ସାଇ ପଲ୍ଲବୀ ମାତା ସୀତା, ୟଶ ରାବଣ ଭୂମିକାରେ, ଅରୁଣ ଗୋଭିଲ ରାଜା  ଦଶରଥ, ରବି ଦୁବେ ଲକ୍ଷ୍ମଣ ଚରିତ୍ରରେ ଅଭିନୟ  କରୁଛନ୍ତି ।