ମୁମ୍ବାଇ: 'କାଣ୍ଟା ଲଗା' ଫେମ୍ ଏବଂ 'ବିଗ୍ ବସ୍ ୧୩' ପ୍ରତିଯୋଗୀ ଶେଫାଳି ଜାରିୱାଲାଙ୍କ ୪୨ ବର୍ଷ ବୟସରେ ମୃତ୍ୟୁ ଘଟିଛି। ମୃତ୍ୟୁର କାରଣ ହୃଦଘାତ ବୋଲି କୁହାଯାଉଛି। ତାଙ୍କ ଶରୀର ବର୍ତ୍ତମାନ ମୁମ୍ବାଇର କୁପର ହସ୍ପିଟାଲରେ ଅଛି।

ଜାତୀୟ ଗଣମାଧ୍ୟମ ହସ୍ପିଟାଲର ରିସେପ୍ସନିଷ୍ଟଙ୍କୁ ଉଦ୍ଧୃତ କରି କହିଛି ଯେ ୨୭ ତାରିଖ ରାତିରେ ଅଭିନେତ୍ରୀଙ୍କୁ ହୃଦଘାତ ହୋଇଥିଲା ଏବଂ ସେ ଆଉ ନାହାନ୍ତି। ରିପୋର୍ଟ ଅନୁଯାୟୀ, ତାଙ୍କ ସ୍ୱାମୀ ଏବଂ ଅଭିନେତା ପରାଗ ତ୍ୟାଗୀ ତାଙ୍କୁ ତୁରନ୍ତ ହସ୍ପିଟାଲକୁ ନେଇଯାଇଥିଲେ ଯେଉଁଠାରେ ତାଙ୍କୁ ମୃତ ଘୋଷଣା କରାଯାଇଥିଲା। ଶେଫାଳିଙ୍କ ହଠାତ୍ ଦୁନିଆ ଛାଡି ଯିବା ପରେ ମନୋରଞ୍ଜନ ଜଗତରେ ଶୋକର ଛାୟା ଖେଳିଯାଇଛି।

କୁପର ହସ୍ପିଟାଲରୁ ଶେଫାଳି ଜାରିୱାଲାଙ୍କ ସ୍ୱାମୀଙ୍କର ଏକ ଭିଡିଓ ଆସିଛି ଯେଉଁଥିରେ ସେ ଗାଡ଼ିରେ ବସି ଭାଙ୍ଗି ପଡ଼ିଥିବା ଦେଖାଯାଇଛି। ଗାଡ଼ି ଭିତରେ ବସିଥିବା ପରାଗ ତାଙ୍କ ଦୁଃଖିତ ମୁହଁକୁ ହାତ ଦେଇ ଘୋଡ଼ାଇବାକୁ ଚେଷ୍ଟା କରୁଥିବା ଦେଖାଯାଇଛି।

ଗାୟକ ରାହୁଲ ବୈଦ୍ୟ ତାଙ୍କ ଇନଷ୍ଟା ଷ୍ଟୋରୀରେ ଅଭିନେତ୍ରୀଙ୍କ ଫଟୋ ପୋଷ୍ଟ କରି ଶ୍ରଦ୍ଧାଞ୍ଜଳି ଦେଇଛନ୍ତି। ସେ ଲେଖିଛନ୍ତି, 'ଶାନ୍ତିରେ ରୁହ ଶେଫାଲି, ତୁମେ ଆମକୁ ବହୁତ ଶୀଘ୍ର ଛାଡି ଚାଲିଗଲ।' ଗାୟକ ମିକା ସିଂହ ମଧ୍ୟ ଶ୍ରଦ୍ଧାଞ୍ଜଳି ଦେଇଛନ୍ତି ଏବଂ ଲେଖିଛନ୍ତି, 'ମୁଁ ବହୁତ ମର୍ମାହତ ଏବଂ ଦୁଃଖିତ, ଆମର ପ୍ରିୟ ଷ୍ଟାର ଏବଂ ଜଣେ ଭଲ ବନ୍ଧୁ ଆମକୁ ଛାଡି ଚାଲିଗଲେ।

ସୂଚନାଯୋଗ୍ୟ, ଶେଫାଳି ଜରିୱାଲା ୨୦୦୨ ମସିହାରେ ଆସିଥିବା 'କାଣ୍ଟା ଲଗା' ଗୀତ ସହିତ ପ୍ରତ୍ୟେକ ଘରେ ନିଜର ଛାପ ସୃଷ୍ଟି କରିଥିଲେ। ଲୋକମାନେ ଏହି ରିମିକ୍ସ ଗୀତକୁ ଏବେ ବି ଶୁଣନ୍ତି। ଏହା ପରେ, ଶେଫାଲି ୨୦୦୪ ମସିହାରେ ଅକ୍ଷୟ କୁମାର ଏବଂ ସଲମାନ ଖାନଙ୍କ ସହିତ ଫିଲ୍ମ 'ମୁଝସେ ଶାଦୀ କରୋଗୀ'ରେ ମଧ୍ୟ ନଜର ଆସିଛନ୍ତି। ଅଭିନେତ୍ରୀ ସଲମାନ ଖାନଙ୍କ ଲୋକପ୍ରିୟ ଶୋ 'ବିଗ୍ ବସ୍'ର ୧୧ତମ ସିଜିନରେ ପ୍ରତିଯୋଗୀ ଭାବରେ ମଧ୍ୟ ଦେଖାଦେଇଛନ୍ତି। ସିଦ୍ଧାର୍ଥ ଶୁକ୍ଲା ମଧ୍ୟ ଏହି ସିଜିନରେ ଥିଲେ ଏବଂ ସେ ମଧ୍ୟ ତାଙ୍କ ପ୍ରଶଂସକମାନଙ୍କୁ ଦୁଃଖ ଦେଇଥିଲେ।

ଅଧିକ ପଢ଼ନ୍ତୁ: ବିଳମ୍ବରେ ଗଡ଼ିଲା ନନ୍ଦିଘୋଷ