ସେ ଜଗତର ନାଥ ଜଗନ୍ନାଥ । ତାଙ୍କ ପରିଚୟରେ ପରିଚୟ ଏ ଓଡ଼ିଆ ମାଟି ଓ ଓଡ଼ିଆ ଜାତି କହିଲେ ଅତ୍ୟୁକ୍ତି ହେବ ନାହିଁ । ଆଜି ପବିତ୍ର ଦେବସ୍ନାନ ପୂର୍ଣ୍ଣିମା କେବଳ ଶ୍ରୀକ୍ଷେତ୍ର ନୁହେଁ ରାଜ୍ଯର ସମସ୍ତ ଜଗନ୍ନାଥ ମନ୍ଦିରରେ ମହା ଆଡମ୍ବରରେ ପାଳନ କରାଯାଉଛି।
ଆଜି ରାୟଗଡ଼ାରେ ଅବସ୍ଥିତ ଜଗନ୍ନାଥ ମନ୍ଦିରରେ ମହାପ୍ରଭୁଙ୍କ ସ୍ନାନପର୍ବ ଅବସରରେ ବଡ଼ଭାଇ ବଳଭଦ୍ର ଓ ଭଉଣୀ ସୁଭଦ୍ରାଙ୍କ ସହ ସ୍ନାନ ମଣ୍ଡପରେ କାଳିଆ ଠାକୁର ବିଜେ ହୋଇ ଦିବ୍ୟସ୍ନାନ କରିଛନ୍ତି।
ଆଜି ସ୍ନାନପୂର୍ଣ୍ଣିମା ନୀତି ନିର୍ଘଣ୍ଟ ଅନୁଯାୟୀ ଦୈନନ୍ଦିନ ନିତିକାନ୍ତି ନିୟମାନୁସାରେ ପ୍ରଥମେ ଦ୍ଵାର ଫିଟା ନୀତି, ମଙ୍ଗଳ ଆଳତି, ତଡ଼ପ ନୀତି, ମଇଲମ ନୀତି, ଅବକାଶ ନୀତି, ସୂର୍ଯ୍ୟ ପୂଜା ଗୋପାଳ ବଲ୍ଲଭ ଭୋଗ କରାଯିବା ପରେ ତିନି ଠାକୁରଙ୍କୁ ରତ୍ନ ସିଂହାସନରୁ ଓହ୍ଲାଇ ସ୍ନାନ ମଣ୍ଡପ କୁ ନିଆଗଲା ସେଠାରେ ସମସ୍ତ ନୀତି ସାରି ପ୍ରତ୍ୟେକ ଠାକୁରଙ୍କୁ ୧୦୮ ମାଟି ହାଣ୍ଡିର ସୁଗନ୍ଧିତ ଜଳ ଦ୍ଵାରା ସ୍ନାନ କରି କାଳିଆ ଠାକୁର ଗଜାନନ ବେଶରେ ଭକ୍ତଙ୍କୁ ଦର୍ଶନ ଦେବା ପରେ ଅଣସର ଗୃହକୁ ପ୍ରବେଶ କରିଥିଲେ । ଏହି ଦେବକାର୍ଯ୍ୟ ସମୟରେ ରାଜ ପୁରୋହିତ ବିରଞ୍ଚି ନାରାୟଣ ଦାଶ, ବ୍ରଜ କିଶୋର ଦାଶ, ଭବାନୀ ଦାଶ, ରଞ୍ଜନ ରଥ, ସୁନିଲ ପଣ୍ଡା, ପ୍ରଶାନ୍ତ ତ୍ରିପାଠୀ, ମହେନ୍ଦ୍ର ରଥ ଆଦି ଉପସ୍ଥିତ ରହି ସୁଚାରୁରୂପେ ତିନି ଠାକୁରଙ୍କ ନିତିକାନ୍ତି ସମ୍ପାଦନା କରିଥିଲେ ।