କଟକ: ମାନସିକା ଚାପରୁ ମୁକ୍ତ ହେବାକୁ ନିଶା ନିବାରଣ କେନ୍ଦ୍ରକୁ ଆସିଥିବା ଯୁବକ ଶେଷରେ ଶବ ହୋଇ ଫେରିଛନ୍ତି । ପୁଅକୁ ତଣ୍ଟି ଚିପି ହତ୍ୟା କରାଯାଇଥିବା ପରିବାର ଲୋକେ ଆଣିଛନ୍ତି ସଙ୍ଗୀନ ଅଭିଯୋଗ । କଟକ ସଦର ଥାନା ଉତ୍ତମାପୁରରେ ଥିବା ସଂପର୍କ ନିଶାମୁକ୍ତି କେନ୍ଦ୍ର ବିରୋଧରେ ଏଭଳି ଅଭିଯୋଗ ଆସିଛି । ମୃତ ଯୁବକ ଜଣକ ହେଲେ ଖୋର୍ଦ୍ଧା ଜିଲ୍ଲାର । 

ମୃତ ଯୁବକଙ୍କ ବାପାଙ୍କ କହିବା ମୁତାବକ, ତାଙ୍କ ପୁଅ ଜଣେ ଉଚ୍ଚ ଶିକ୍ଷିତ ଥିଲେ । ସେ ବମ୍ବେର ଚାକିରି କରୁଥିବାବେଳେ ୩ ମାସ ପୂର୍ବରୁ ଘରକୁ ପଳାଇଆସିଥିଲେ । ସେ ମାନସିକ ଚାପରେ ରହୁଥିଲେ ।  ସେଥିପାଇଁ ପରିବାର ଲୋକେ ତାଙ୍କ ୨ ମାସ ପୂର୍ବରୁ ସଂପର୍କ ନିଶା ମୁକ୍ତି କେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ମାନସିକ ଚାପରେ ରହୁଥିବା ବ୍ୟକ୍ତିଙ୍କ ୱାର୍ଡରେ ତାଙ୍କୁ ରଖାଯାଇଥିଲା । ସେ କୌଣସି ମଦ୍ୟପାନ କରନ୍ତି ନାହିଁ କିମ୍ବା ଆମିଷ ମଧ୍ୟ ଖାଆନ୍ତି ନାହିଁ । କେବଳ ମାନସିକ ଅବସାଦରୁ ତାଙ୍କୁ ଭଲ କରିବାକୁ ସେଠାରେ ରଖିଥିଲେ । 

ତେବେ ଗତକାଲି ରାତିରେ ତାଙ୍କର ମୃତ୍ୟୁ ହୋଇଥିବା ପରିବାର ଲୋକଙ୍କୁ ଖବର ଦିଆଯାଇଥିଲା । ପରିବାର ପୁଅର ମୃତ୍ୟୁକୁ ସହଜରେ ଗ୍ରହଣ କରିପାରିନଥିଲେ । ଅନ୍ୟ ଅନ୍ତେବାସୀ ଗାମୁଛାରେ ତାଙ୍କ ବେକକୁ ଚିପି ହତ୍ୟା କରିଥିବା ପରିବାର ଲୋକେ ଅଭିଯୋଗ କରିଛନ୍ତି । ସଦର ଥାନା ପୋଲିସ ମୃତ ଦେହକୁ ଜବତ କରିବା ସହିତ ୪ଜଣ ଅନ୍ତେବାସୀଙ୍କୁ ଅଟକ ରଖି ପଚରାଉଚରା କରିଛି ।