ପୁରୀରେ IPLକୁ କେନ୍ଦ୍ର କରି ଚାଲୁଥିବା ବିଶାଳ ବେଟିଂ ରାକେଟକୁ ପୋଲିସ ଧରିଦେଇଛି। ଏହି ଅଭିଯାନରେ ମୁଖ୍ୟ ଅଭିଯୁକ୍ତ ପ୍ରସନ୍ନ ପୃଷ୍ଟି ସହ ମୋଟ ୪ ଜଣଙ୍କୁ ଗିରଫ କରାଯାଇଥିବାବେଳେ, ୨୫ ଲକ୍ଷ ୩୫ ହଜାର ଟଙ୍କା ଓ ୬ଟି ମୋବାଇଲ ଜବତ ହୋଇଛି। ‘ସ୍କାଏ ଏକ୍ସଚେଞ୍ଜ’ ନାମକ ଆପ୍‌ ମାଧ୍ୟମରେ ଏହି ଅବୈଧ କାରବାର ଚାଲୁଥିବା ଖୁଲାସା କରିଛି ପୋଲିସ।

ତଦନ୍ତରୁ ଜଣାପଡ଼ିଛି ଯେ, ଏହି ରାକେଟ ଏକ ନେଟୱାର୍କ ଭାବେ କାମ କରୁଥିଲା। ଲୋକମାନେ ଆପ୍‌ରେ ଟଙ୍କା ଜମା କରି ପଏଣ୍ଟ ନେଉଥିଲେ ଏବଂ ସେହି ପଏଣ୍ଟ ଦ୍ୱାରା ଆଇପିଏଲ ମ୍ୟାଚରେ ବେଟିଂ କରୁଥିଲେ। ସ୍ଥାନୀୟ ଅର୍ଗାନାଇଜରମାନଙ୍କୁ ମାସିକ ୨୨ ହଜାର ଟଙ୍କା ଦେଇ ଅଧିକ ଲୋକଙ୍କୁ ଏହି ଜାଲରେ ଆଣାଯାଉଥିଲା।

ପୋଲିସ ୧୦ଟି ବ୍ୟାଙ୍କ ଖାତାରେ ଥିବା ୩୧ ଲକ୍ଷ ୮୧ ହଜାର ଟଙ୍କାକୁ ଜବତ କରିଛି। ସବୁଠୁ ବଡ କଥା ହେଲେ, ସଦସ୍ୟମାନେ ହ୍ବାଟସଆପ୍‌ରେ ଗୋଟିଏ ଅଜଣା ବ୍ୟକ୍ତିକୁ ‘ବସ’ ବୋଲି ସମ୍ବୋଧନ କରୁଥିଲେ। ଏବେ ପ୍ରଶ୍ନ, କିଏ ସେ ‘ବସ’? ପୁରୀ ପୋଲିସ ଏହି ମାଷ୍ଟରମାଇଣ୍ଡକୁ ଧରିବା ପାଇଁ ତଦନ୍ତ ଜୋରଦାର କରିଛି।