ବଲାଙ୍ଗୀର : ରାତି ଅଧରେ ଗାଁ ଦାଣ୍ଡରେ ବୁଲିଲା ଖଣ୍ଡା । ପଡ଼ୋଶୀଙ୍କ ଖଣ୍ଡା ଚୋଟରେ ଚାଲିଗଲା  ଯୁବକଙ୍କ ଜୀବନ  ଅନ୍ୟ ୨ ଜଣ ମଧ୍ୟ ଗୁରୁତର ଆହତ ହୋଇଛନ୍ତି । ଏଭଳି ଅଭାବନୀୟ ଘଟଣା ବଲାଙ୍ଗୀର ଜିଲ୍ଲା ମାଲଗୋଦାମ ପଡ଼ାରେ ଘଟିଛି । ମୃତକ ହେଲେ ନିରଜ ହରପାଳ। ଅନ୍ୟ ୨ ଜଣଙ୍କୁ ବୁର୍ଲା ମେଡିକାଲ ସ୍ଥାନାନ୍ତର କରାଯାଇଛି । 

ସୂଚନା ଅନୁଯାୟୀ ସୋମବାର  ରାତି ପ୍ରାୟ ୧୧ଟା ସମୟରେ ନିରଜ ଓ ତାଙ୍କର ଦୁଇ ସାଙ୍ଗଙ୍କ ସହିତ ପାନ ଦୋକାନକୁ ଯାଇଥିଲେ। ସେଠାରେ ଥିବା ଦୀପକ ପୂର୍ବ ଶତ୍ରୁତାକୁ ନେଇ ହଠାତ ନିରଜଙ୍କୁ ଗାଳିଗୁଲଜ କରିଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ଆରମ୍ଭ ହୋଇଥିଲା। ପରେ ଦୀପକ ନିଜ ପରିବାର ଲୋକଙ୍କୁ ଖବର ଦେଇଥିଲେ। ପରିବାର ଲୋକେ ଖଣ୍ଡା ସହ ଅସ୍ତ୍ରଶସ୍ତ୍ର ନେଇ ସେଠାରେ ପହଞ୍ଚି ନିରଜଙ୍କୁ ଖଣ୍ଡା ଓ ଧାରୁଆ ଅସ୍ତ୍ରରେ ଆକ୍ରମଣ କରିବା ସହ ନିରଜଙ୍କ ପାଖରେ ଥିବା ୨ ସାଙ୍ଗ ଏହାକୁ ଅଟକାଇଥିଲେ। ସେମାନେ ମଧ୍ୟ ଆକ୍ରମଣର ଶିକାର ହୋଇଥିଲେ। ପୁଲିସ ପହଞ୍ଚିବାପରେ ଉତ୍ତେଜନା ଥମିଥିଲା। ପରିବାର ଲୋକେ ନିରଜ ଓ ଦୁଇ ସାଙ୍ଗକୁ ଗୁରୁତର ଅବସ୍ଥାରେ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରେ ଡାକ୍ତର ନିରଜଙ୍କୁ ମୃତ ଘୋଷଣା କରିଥିଲେ।  ବର୍ତ୍ତମାନ ଅନ୍ୟ ୨ ଜଣ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି।

ପୁଲିସ ଏହି ଘଟଣାରେ ଦୀପକଙ୍କ ପରିବାରର ୪ ଜଣଙ୍କୁ ଗିରଫ କରି ଘଟଣାର ତଦନ୍ତ ଆରମ୍ଭ କରିଛି ।