ବ୍ରହ୍ମପୁର: ଏକ ବଡ଼ ଅପରାଧିକ ଷଡ଼ଯନ୍ତ୍ରକୁ ଭଣ୍ଡୁର କରିଛି ପୋଲିସ । ଏକ ନିର୍ମାଣାଧୀନ କୋଠାରୁ ବୋମା ଭର୍ତ୍ତି ବ୍ୟାଗ୍ ଜବତ ହୋଇଛି । ବ୍ରହ୍ମପୁର ଖଜୁରିଆ ନିକଟସ୍ଥ ଏକ କୋଠାରୁ ବୋମା ଭର୍ତ୍ତି ବ୍ୟାଗ୍ ମିଳିଛି । ବ୍ୟାଗରେ ୭ଟି ବୋମା ମିଳିଛି । ବୈଦ୍ୟନାଥପୁର ପୋଲିସ ପ୍ରାଟୋଲିଂ କରୁଥିବାବେଳେ ଘଟଣାର ପର୍ଦ୍ଦଫାସ କରିଛି । ତେବେ ଏହି ଘଟଣାରେ ଜଣକୁ ଅଟକ ରଖାଯାଇଛି । ଏ ନେଇ ସୂଚନା ଦେଇଛନ୍ତି ବ୍ରହ୍ମପୁର ଏସପି । 

ବ୍ରହ୍ମପୁରରେ କିଛି ଦିନ ହେବ ଅପରାଧିକ କାର‌୍ୟ୍ୟକଳାପ ବୃଦ୍ଧି ପାଉଥିଲା । ଦୁଇ ଦିନ ତଳେ ବୈଦ୍ୟନାଥପୁର ପୋଲିସ ପ୍ରାଟ୍ରୋଲିଂ କରୁଥିଲା । ଏହି ସମୟରେ ଏକ ନିର୍ମାଣାଧୀନ କୋଠାରେ ଚଢ଼ାଉ କରିଥିଲା । ପୋଲିସକୁ ଦେଖି କିଛି ଯୁବକ ଛତ୍ରଭଙ୍ଗ ଦେଇଥିଲେ । ପୋଲିସର ସନ୍ଦେହ ହେବାରୁ ଛାନଭିନ କରିଥିଲା । ଏହା ପରେ ଏକ ବୋମା ଭର୍ତ୍ତି ବ୍ୟାଗକୁ ଜବତ କରିଥିଲା । ସେଥିରେ ୭ଟି ବୋମା ଥିବା ଜଣାପଡ଼ିଥିଲା । 

ସମସ୍ତ ବୋମା ଗୁଡ଼ିକୁ ଜବତ କରି ନିଷ୍କ୍ରିୟ କରାଯାଇଛି । ବୋମା ଗୁଡ଼ିକ ହାତ ତିଆରି ସୁତୁଲି ବୋମା ହୋଇଥିବା ଜଣାପଡ଼ିଛି । ଘଟଣାରେ ସମ୍ପୃକ୍ତି ଥିବା ଅଭିଯୋଗରେ ଜଣେ ଯୁବକଙ୍କୁ ଅଟକ ରଖାଯାଇଛି । ଫେରାର ଥିବା ଆଉ ୩ ଯୁବକଙ୍କୁ ଖୁବ୍‌ଶୀଘ୍ର ଧରାଯିବ ବୋଲି କହିଛନ୍ତି ଏସ୍‌ପି ।