ହେଲଥ୍ ଇନସ୍ୟୁରାନ୍ସ ଥାଇ ମଧ୍ୟ ହସ୍ପିଟାଲର ମାତ୍ରାଧିକ ବିଲ୍ ଏବଂ କ୍ଲେମ୍ ମିଳିବାରେ ବିଳମ୍ବ ଯୋଗୁଁ ହଇରାଣ ହେଉଥିବା ଲୋକଙ୍କ ପାଇଁ ଭଲ ଖବର। ବୀମା ନିୟାମକ କର୍ତ୍ତୃପକ୍ଷ IRDAI ଏକ ନୂଆ କମିଟି ଗଠନ କରିଛି। ଏହାର ଉଦ୍ଦେଶ୍ୟ ହେଉଛି ହସ୍ପିଟାଲଗୁଡ଼ିକର ମନଇଚ୍ଛା ଫି’ ଉପରେ ରୋକ ଲଗାଇବା, ବିଲିଂ ପ୍ରକ୍ରିୟାକୁ ସ୍ୱଚ୍ଛ କରିବା ଏବଂ କ୍ଲେମ୍ ପ୍ରକ୍ରିୟାକୁ ସହଜ କରିବା, ଯାହାଫଳରେ କଠିନ ସମୟରେ ସାଧାରଣ ଜନତାଙ୍କୁ ସାହାଯ୍ୟ ମିଳିପାରିବ।

ଲଗାତାର ବଢ଼ୁଥିବା ହେଲଥ୍ ଇନସ୍ୟୁରାନ୍ସ ପ୍ରିମିୟମ, କ୍ଲେମ୍ ପାସ୍ ହେବାରେ ଲାଗୁଥିବା ଦୀର୍ଘ ସମୟ ଏବଂ ହସ୍ପିଟାଲର ମନଇଚ୍ଛା ବିଲ୍‌କୁ ନେଇ ଗ୍ରାହକମାନେ ଅନେକ ସମୟରେ ଅସନ୍ତୋଷ ପ୍ରକାଶ କରିଥାନ୍ତି। ଏବେ ଏହି ବ୍ୟବସ୍ଥାରେ ଏକ ବଡ଼ ସକାରାତ୍ମକ ପରିବର୍ତ୍ତନର ଆଶା ଜଗିଛି। ଆଇଆରଡିଏଆଇ ଦ୍ୱାରା ଗଠିତ ଏହି ନୂଆ ସବ୍-କମିଟି (ଉପ-ସମିତି) ଆପଣଙ୍କ ହେଲଥ୍ ଇନସ୍ୟୁରାନ୍ସକୁ ପୂର୍ବ ଅପେକ୍ଷା ଅଧିକ ସହଜ ଏବଂ ସ୍ୱଚ୍ଛ କରିବା ଦିଗରେ କାର୍ଯ୍ୟ କରିବ।

ହସ୍ପିଟାଲର ମନମାନି ଉପରେ ଲାଗିବ ଲଗାମ

ସାଧାରଣତଃ ଅଭିଯୋଗ ହୁଏ ଯେ, ଯେତେବେଳେ ହସ୍ପିଟାଲ୍ ଜାଣିବାକୁ ପାଏ ଯେ ରୋଗୀଙ୍କର ହେଲଥ୍ ଇନସ୍ୟୁରାନ୍ସ ଅଛି, ସେତେବେଳେ ବିଲ୍‌ର ଅଙ୍କ ହଠାତ୍ ବଢ଼ିଯାଏ। ଏହି ନୂଆ କମିଟି ପ୍ରଥମେ ‘ହସ୍ପିଟାଲ୍ ଟାରିଫ୍’ ଏବଂ ବିଲିଂ ପ୍ରକ୍ରିୟାର ଯାଞ୍ଚ କରିବ। ଗୋଟିଏ ସହରରେ ଏକାଭଳି ରୋଗର ଚିକିତ୍ସା ପାଇଁ ଅଲଗା ଅଲଗା ହସ୍ପିଟାଲରେ ଖର୍ଚ୍ଚ କାହିଁକି ଅଲଗା ରହୁଛି, ତାହା ମଧ୍ୟ ଯାଞ୍ଚ କରାଯିବ। ଏହାଦ୍ୱାରା ଚିକିତ୍ସା ଖର୍ଚ୍ଚ ଯୌକ୍ତିକ ହେବ ଏବଂ ବିଲିଂ ବ୍ୟବସ୍ଥାରେ ସମାନତା ଆସିବ।

କ୍ଲେମ୍ ସେଟେଲମେଣ୍ଟ ପାଇଁ ଆଉ ଅପେକ୍ଷା କରିବାକୁ ପଡ଼ିବନି

କ୍ଲେମ୍ ସେଟେଲମେଣ୍ଟରେ ଅଯଥା ବିଳମ୍ବ ଏବଂ ସ୍ୱଚ୍ଛତାର ଅଭାବ ଯୋଗୁଁ ଗ୍ରାହକଙ୍କ ଭରସା ବ୍ୟବସ୍ଥା ଉପରୁ କମିବାରେ ଲାଗିଛି। ଏହାକୁ ଦୂର କରିବା ପାଇଁ ନିୟାମକ ନ୍ୟାସନାଲ୍ ହେଲଥ୍ କ୍ଲେମ୍ ଏକ୍ସଚେଞ୍ଜ (NHCX) ଭଳି ଡିଜିଟାଲ୍ ପ୍ଲାଟଫର୍ମକୁ ବ୍ୟାପକ ଭାବେ ଲାଗୁ କରିବାକୁ ଯୋଜନା କରୁଛି। ଏହା ସହିତ ଫ୍ରଡ୍ ରୋକିବା ପାଇଁ ମଧ୍ୟ କଠୋର ପଦକ୍ଷେପ ନିଆଯିବ।

ବୀମା କମ୍ପାନୀ ଏବଂ ହସ୍ପିଟାଲଗୁଡ଼ିକ ମଧ୍ୟରେ ଏକ ‘ଜଏଣ୍ଟ କୋଡ୍ ଅଫ୍ କଣ୍ଡକ୍ଟ’ (ସଂଯୁକ୍ତ ଆଚରଣ ସଂହିତା) ଲାଗୁ କରିବାକୁ ପ୍ରସ୍ତାବ ରହିଛି। ଯଦି ଏହା ସଫଳତାର ସହ ଲାଗୁ ହୁଏ, ତେବେ ହସ୍ପିଟାଲରୁ ଡିସଚାର୍ଜ ପ୍ରକ୍ରିୟା ଅତି ସହଜ ଏବଂ ଦ୍ରୁତ ହୋଇଯିବ।

ପଲିସି ଉପରେ କ’ଣ ହେବ ପ୍ରଭାବ?

ଏହି ନୂଆ ନିୟମର ଦୁଇଟି ମୁଖ୍ୟ ଲକ୍ଷ୍ୟ ରହିଛି। ପ୍ରଥମତଃ, ଅଧିକରୁ ଅଧିକ ଲୋକଙ୍କ ପାଖରେ ହେଲଥ୍ ଇନସ୍ୟୁରାନ୍ସ ପହଞ୍ଚାଇବା ଏବଂ ଦ୍ୱିତୀୟରେ, ଏହାକୁ ଉପଭୋକ୍ତାଙ୍କ ପାଇଁ ସରଳ କରିବା। ଭବିଷ୍ୟତରେ ଏଭଳି ‘ବେସିକ୍ ପ୍ରଡକ୍ଟ’ ତିଆରି କରିବାକୁ ଲକ୍ଷ୍ୟ ରଖାଯାଇଛି, ଯାହାକୁ କୌଣସି ସାଧାରଣ ବ୍ୟକ୍ତି ବିନା ଏଜେଣ୍ଟ ସାହାଯ୍ୟରେ ବୁଝିପାରିବେ। ଏହାଦ୍ୱାରା ଇନସ୍ୟୁରାନ୍ସ ପୋର୍ଟାବିଲିଟି  ମଧ୍ୟ ସହଜ ହେବ ଏବଂ ପ୍ରିମିୟମ ମୂଲ୍ୟ ସ୍ଥିର ରହିବ।