ବିଶ୍ୱର ସବୁଠାରୁ ଚର୍ଚ୍ଚିତ ଗୁପ୍ତଚର ସଂସ୍ଥା ମଧ୍ୟରେ CIAର ନାମ ଶୀର୍ଷରେ ଆସେ। ଫିଲ୍ମ ଏବଂ ୱେବ୍ ସିରିଜ୍‌ରେ ଆପଣ ଏହାର ଏଜେଣ୍ଟମାନଙ୍କୁ ଗୁପ୍ତ ମିଶନରେ ଯାଉଥିବାର ଦେଖିଥିବେ। କିନ୍ତୁ ପ୍ରକୃତ ଜୀବନରେ ଏହି ସଂସ୍ଥାର ଅଂଶ ହେବା ଏକ କଠିନ ପରିଶ୍ରମ ଏବଂ ଅତି କଠୋର ଯାଞ୍ଚ ପ୍ରକ୍ରିୟା ଦେଇ ଗତି କରିଥାଏ।

କିଏ ହୋଇପାରିବେ CIA ଏଜେଣ୍ଟ?

ଜଣେ CIA ଏଜେଣ୍ଟ ହେବା ପାଇଁ କିଛି ପ୍ରାଥମିକ ସର୍ତ୍ତ ରହିଛି:

ଆବେଦନକାରୀ ଜଣେ ଆମେରିକୀୟ ନାଗରିକ ହୋଇଥିବା ଆବଶ୍ୟକ। ଯଦି କାହା ପାଖରେ ଦ୍ୱୈତ ନାଗରିକତା ଅଛି, ତେବେ ମଧ୍ୟ ସେ ଆବେଦନ କରିପାରିବେ, କିନ୍ତୁ ପ୍ରାଥମିକ ନାଗରିକତା ଆମେରିକାର ହୋଇଥିବା ଜରୁରୀ।

ପ୍ରାର୍ଥୀଙ୍କ ବୟସ ଅତିକମରେ ୧୮ ବର୍ଷ ହେବା ଆବଶ୍ୟକ।

ଅଧିକାଂଶ ପଦବୀ ପାଇଁ ସ୍ନାତକ  ଡିଗ୍ରୀ ବାଧ୍ୟତାମୂଳକ। ବିଶେଷ କରି ଆନ୍ତର୍ଜାତୀୟ ସମ୍ପର୍କ, ଫାଇନାନ୍ସ, ଇଞ୍ଜିନିୟରିଂ ଏବଂ ସୁରକ୍ଷା ଅଧ୍ୟୟନ ଭଳି ବିଷୟ ପଢ଼ିଥିବା ପ୍ରାର୍ଥୀଙ୍କୁ ଗୁରୁତ୍ୱ ଦିଆଯାଏ।

କେଉଁ ଦକ୍ଷତା ସୁଯୋଗ ବଢ଼ାଇଥାଏ?

• ଭାଷା ଜ୍ଞାନ: ଯେଉଁମାନଙ୍କୁ ବିଦେଶୀ ଭାଷା ଯଥା ଆରବୀ, ରୁଷୀୟ କିମ୍ବା କୋରିଆନ୍ ଭାଷା ଜଣାଥାଏ, ସେମାନଙ୍କୁ ଅଗ୍ରାଧିକାର ମିଳିଥାଏ।

• ଅଭିଜ୍ଞତା: ଯଦି କାହାର ସେନା କିମ୍ବା ସୁରକ୍ଷା କ୍ଷେତ୍ରରେ ପୂର୍ବ ଅଭିଜ୍ଞତା ଅଛି, ତେବେ ତାଙ୍କ ପାଇଁ ସୁଯୋଗ ଅଧିକ ରହିଥାଏ। ସଂସ୍ଥା ମାନସିକ ସ୍ତରରେ ଶକ୍ତିଶାଳୀ ଏବଂ ଚାପ ମଧ୍ୟରେ କାମ କରିପାରୁଥିବା ଲୋକଙ୍କୁ ଖୋଜିଥାଏ।

ଚୟନ ପ୍ରକ୍ରିୟା କିଭଳି ହୁଏ?

CIA ସିଧାସଳଖ ଭାବେ 'ଗୁପ୍ତଚର' ପଦବୀ ପାଇଁ ବିଜ୍ଞାପନ ବାହାର କରେ ନାହିଁ। ଏହାର ଚୟନ ପ୍ରକ୍ରିୟା ଅତି ଜଟିଳ: ୧. ଅନଲାଇନ୍ ଆବେଦନ: ପ୍ରଥମେ ଅନଲାଇନ୍ ଆବେଦନ କରିବାକୁ ପଡ଼େ। ୨. ବ୍ୟାକଗ୍ରାଉଣ୍ଡ ଯାଞ୍ଚ: ପ୍ରାର୍ଥୀଙ୍କ ପୂର୍ବ ରେକର୍ଡ, ସମ୍ପର୍କ, ପରିବାର ଏବଂ ବିଦେଶ ଭ୍ରମଣ ଇତ୍ୟାଦିର ଗଭୀର ଯାଞ୍ଚ କରାଯାଏ। ୩. ପରୀକ୍ଷା: ମେଡିକାଲ୍ ଟେଷ୍ଟ ସହିତ ସବୁଠାରୁ ଗୁରୁତ୍ୱପୂର୍ଣ୍ଣ ପଲିଗ୍ରାଫ୍ ଟେଷ୍ଟ (ମିଛ ଧରା ପରୀକ୍ଷା) ଦେବାକୁ ପଡ଼ିଥାଏ। ୪. ତାଲିମ: ଚୟନ ପରେ ୱାଶିଂଟନ୍ ଡି.ସି. ଅଞ୍ଚଳରେ ପ୍ରଶିକ୍ଷଣ ଓ କାମ କରିବାକୁ ପଡ଼େ।

ଦରମା ଏବଂ ସୁବିଧା ସୁଯୋଗ

CIA ରେ ପଦବୀ ଏବଂ ଅଭିଜ୍ଞତା ଅନୁସାରେ ଦରମା ଭିନ୍ନ ଭିନ୍ନ ହୋଇଥାଏ:

• ପ୍ରାରମ୍ଭିକ ଦରମା: ଜଣେ ଡାଟା ଆନାଲିଷ୍ଟ ବା ଏଣ୍ଟ୍ରି ଲେଭଲ୍ କର୍ମଚାରୀଙ୍କୁ ଭଲ ଦରମା ମିଳିଥାଏ।

• ବାର୍ଷିକ ଦରମା: ରିପୋର୍ଟ ଅନୁଯାୟୀ, ଜଣେ କର୍ମଚାରୀଙ୍କ ଦରମା ବାର୍ଷିକ ୬୦,୦୦୦ ଡଲାରରୁ ୧,୮୦,୦୦୦ ଡଲାର ପର୍ଯ୍ୟନ୍ତ ହୋଇଥାଏ।

• ଅନ୍ୟାନ୍ୟ ସୁବିଧା: ସରକାରୀ ବୀମା, ଅବସର ଯୋଜନା ଏବଂ ସ୍ପେଶାଲ ଟ୍ରେନିଂ ଭଳି ସୁବିଧା ମଧ୍ୟ ମିଳେ।