ହୋର୍ମୁଜ ପ୍ରଣାଳୀରେ ଦେଖାଦେଇଥିବା ସଙ୍କଟ ଯୋଗୁଁ ଗ୍ୟାସର ଅଭାବ ଦେଖାଦେଇଛି, ଯାହା ଭାରତର କାଚ ଶିଳ୍ପକୁ ଗୁରୁତର ଭାବେ ପ୍ରଭାବିତ କରିଛି। ବୋତଲ ଏବଂ ଫ୍ଲାସ୍କର ଉତ୍ପାଦନ କମିଯାଇଛି, ଯାହାଫଳରେ ଅନେକ କ୍ଷେତ୍ରରେ ଯୋଗାଣ ସମସ୍ୟା ଏବଂ ଖର୍ଚ୍ଚ ବୃଦ୍ଧି ଭଳି ପରିସ୍ଥିତି ସୃଷ୍ଟି ହୋଇଛି।

ମଧ୍ୟ-ପ୍ରାଚ୍ୟ (Middle East) ରେ ଚାଲିଥିବା ଉତ୍ତେଜନାର ପ୍ରଭାବ ଏବେ ଭାରତୀୟ ଶିଳ୍ପ ଉପରେ ସ୍ପଷ୍ଟ ଭାବେ ଦେଖିବାକୁ ମିଳୁଛି। ବିଶେଷ କରି କାଚ ଶିଳ୍ପ ବହୁଳ ଭାବେ ପ୍ରଭାବିତ ହୋଇଛି, ଯାହାଦ୍ୱାରା ଦେଶସାରା ବୋତଲ, ଫ୍ଲାସ୍କ ଏବଂ କାଚ ସାମଗ୍ରୀର ଅଭାବ ଦେଖାଦେଇଛି।

କଞ୍ଚାମାଲ ଅଭାବରୁ କମ୍ପାନୀଗୁଡ଼ିକ ଚିନ୍ତାରେ

ବେଙ୍ଗାଲୁରୁର ଷ୍ଟାର୍ଟଅପ୍ 'Mossant Craft Kombucha' ର ସହ-ପ୍ରତିଷ୍ଠାତା ଶିଶିର ସଥ୍ୟାନଙ୍କ କହିବା ଅନୁଯାୟୀ, ଗତ ମାସେ ହେବ ସେମାନଙ୍କର ପ୍ରିମିୟମ୍ ପାନୀୟ ପାଇଁ କାଚ ଫ୍ଲାସ୍କ ମିଳୁନାହିଁ। ବର୍ତ୍ତମାନ ବଜାରରେ କିଛି ବି କିଣିବାକୁ ଉପଲବ୍ଧ ନାହିଁ। ଖରାଦିନେ ପାନୀୟର ଚାହିଦା ବଢ଼ୁଥିବା ବେଳେ କାଚର ଅଭାବ କମ୍ପାନୀଗୁଡ଼ିକର ମୁସ୍କିଲ୍ ବଢ଼ାଇ ଦେଇଛି। ଉତ୍ପାଦନ ଖର୍ଚ୍ଚକୁ ସମ୍ଭାଳିବା ପାଇଁ ଅନେକ କମ୍ପାନୀ ଏବେ ମାର୍କେଟିଂ ଏବଂ ରିହାତି (Discount) ଉପରୁ ଖର୍ଚ୍ଚ କମାଇବାକୁ ଯୋଜନା କରୁଛନ୍ତି।

ଗ୍ରାହକଙ୍କୁ ମିଳିବ ଆଶ୍ବସ୍ତି, ମହଙ୍ଗା ପ୍ଲାନରୁ ମିଳିପାରେ ମୁକ୍ତି; କମ୍ପାନିକୁ ଆଣିବାକୁ ପଡ଼ିବ କଲ୍-SMS ପ୍ଲାନ

LPG-LNG ଅଭାବରୁ ଉତ୍ପାଦନ ବାଧାପ୍ରାପ୍ତ

ଭାରତରେ କାଚ ଶିଳ୍ପ ସମ୍ପୂର୍ଣ୍ଣ ରୂପେ ଗ୍ୟାସ୍ (LPG ଓ LNG) ଉପରେ ନିର୍ଭରଶୀଳ। କିନ୍ତୁ ମଧ୍ୟ-ପ୍ରାଚ୍ୟରୁ ଯୋଗାଣ ପ୍ରଭାବିତ ହେବା ପରେ ସରକାର ଘରୋଇ ଆବଶ୍ୟକତାକୁ ପ୍ରାଥମିକତା ଦେଇ ଗ୍ୟାସ୍ ଯୋଗାଣକୁ ଫ୍ୟାକ୍ଟ୍ରି ବଦଳରେ ଘର ମାନଙ୍କୁ ପଠାଉଛନ୍ତି। ଏହାର ସିଧାସଳଖ ପ୍ରଭାବ ଉତ୍ପାଦନ ଉପରେ ପଡ଼ିଛି। ଅନେକ କାଚ କାରଖାନା ନିଜର କ୍ଷମତାକୁ ୫୦% ପର୍ଯ୍ୟନ୍ତ କମାଇ ଦେଇଛନ୍ତି। ଏହା ସହିତ ଉତ୍ପାଦନ ଖର୍ଚ୍ଚ ବଢ଼ିବା କାରଣରୁ କାଚ ସାମଗ୍ରୀର ଦାମ ପ୍ରାୟ ୨୦% ବୃଦ୍ଧି ପାଇଛି।

ସଙ୍କଟର କେନ୍ଦ୍ର ପାଲଟିଛି ଫିରୋଜାବାଦ

ଉତ୍ତରପ୍ରାଦେଶର ଫିରୋଜାବାଦ, ଯାହା ଦେଶର ପ୍ରମୁଖ କାଚ ହବ୍ ଭାବେ ଜଣାଶୁଣା, ଏହି ସଙ୍କଟର ସବୁଠାରୁ ବଡ଼ କେନ୍ଦ୍ର ପାଲଟିଛି। ଏଠାରେ ଫ୍ୟାକ୍ଟ୍ରିଗୁଡ଼ିକ ପ୍ରାକୃତିକ ଗ୍ୟାସରେ ଚାଲେ ଏବଂ କ୍ରମାଗତ ଭାବେ ୧୫୦୦ ଡିଗ୍ରୀ ସେଲସିୟସ୍ ତାପମାତ୍ରାରେ କାମ କରେ। ଯଦି ଭାଟି (Furnace) ଥଣ୍ଡା ହୋଇଯାଏ, ତେବେ ତାକୁ ପୁଣି ଆରମ୍ଭ କରିବା ଅତ୍ୟଧିକ ବ୍ୟୟବହୁଳ ଏବଂ ସମୟସାପେକ୍ଷ ହୋଇଥାଏ। ଏଭଳି ସ୍ଥିତିରେ ଉତ୍ପାଦନ କମାଇବା ମଧ୍ୟ କମ୍ପାନୀଗୁଡ଼ିକ ପାଇଁ ଏକ ବଡ଼ ବିପଦ।

ବହୁ କ୍ଷେତ୍ରରେ ପ୍ରଭାବ ଓ ବଢୁଥିବା ଖର୍ଚ୍ଚ

କାଚର ଅଭାବ କେବଳ ପାନୀୟ ଶିଳ୍ପରେ ସୀମିତ ନାହିଁ। କ୍ଷୀର, ଔଷଧ, ପ୍ରସାଧନ ସାମଗ୍ରୀ (Cosmetics) ଏବଂ ଖାଦ୍ୟ ଶିଳ୍ପ ମଧ୍ୟ ଏହା ଦ୍ୱାରା ପ୍ରଭାବିତ ହେଉଛି। ମଦ ଏବଂ ପ୍ରସାଧନ କମ୍ପାନୀଗୁଡ଼ିକୁ ପ୍ୟାକେଜିଂ ପାଇଁ ପୂର୍ବ ଅପେକ୍ଷା ୨୦-୩୦% ଅଧିକ ଖର୍ଚ୍ଚ କରିବାକୁ ପଡ଼ୁଛି। ଅନେକ କମ୍ପାନୀ ନୂଆ ଅର୍ଡର ନେବା ବନ୍ଦ କରିଦେଇଛନ୍ତି।

ଶୀଘ୍ର ଆଶ୍ୱସ୍ତି ମିଳିବା ଆଶା କମ୍

ବିଶେଷଜ୍ଞଙ୍କ ମତରେ ପରିସ୍ଥିତି ଶୀଘ୍ର ସ୍ୱାଭାବିକ ହେବାର ସମ୍ଭାବନା କମ୍। ଭାରତ ନିଜର ଗ୍ୟାସ୍ ଆବଶ୍ୟକତା ପାଇଁ ବହୁ ପରିମାଣରେ ମଧ୍ୟ-ପ୍ରାଚ୍ୟ ଉପରେ ନିର୍ଭରଶୀଳ, ଯେଉଁଠାରୁ ଯୋଗାଣ ଏବେ ଅନିଶ୍ଚିତ ହୋଇ ରହିଛି। ଯଦି ଏହି ସ୍ଥିତି ଅଧିକ ଦିନ ଧରି ରହେ, ତେବେ କ୍ଷୁଦ୍ର ଓ ମଧ୍ୟମ ବର୍ଗର ବ୍ୟବସାୟୀଙ୍କ ପାଇଁ ଅସ୍ତିତ୍ୱର ସଙ୍କଟ ଦେଖାଦେବ ଏବଂ ସାଧାରଣ ଲୋକଙ୍କୁ ମଧ୍ୟ ମହଙ୍ଗା ସାମଗ୍ରୀର ବୋଝ ସହିବାକୁ ପଡ଼ିବ।