ରୁଷରେ ଫସି ରହିଥିବା ୨୬ ଜଣ ଭାରତୀୟଙ୍କ ଆବେଦନ ଉପରେ ସୁପ୍ରିମକୋର୍ଟ କେନ୍ଦ୍ର ସରକାରଙ୍କଠାରୁ ଜବାବ ମାଗିଛନ୍ତି। ଏହି ଭାରତୀୟମାନେ ଛାତ୍ର କିମ୍ବା ପର୍ଯ୍ୟଟକ ଭିସାରେ ରୁଷ ଯାଇଥିଲେ, କିନ୍ତୁ ଏବେ ସେମାନଙ୍କୁ ଜବରଦସ୍ତ ୟୁକ୍ରେନ ଯୁଦ୍ଧରେ ଲଢ଼ିବା ପାଇଁ ବାଧ୍ୟ କରାଯାଉଛି। ଏହି ମାମଲାରେ ସୁପ୍ରିମକୋର୍ଟ ବିଦେଶ ମନ୍ତ୍ରାଳୟ ସମେତ ବିଭିନ୍ନ ରାଜ୍ୟ ସରକାରଙ୍କୁ ମଧ୍ୟ ନୋଟିସ୍ ଜାରି କରିଛନ୍ତି।

ସର୍ବୋଚ୍ଚ ଅଦାଲତ ଏହି ୨୬ଟି ରିଟ୍ ଆବେଦନ ଉପରେ ଜବାବ ରଖିବା ପାଇଁ ସରକାରଙ୍କୁ ୪ ସପ୍ତାହ ସମୟ ଦେଇଛନ୍ତି। ଆବେଦନରେ ଦର୍ଶାଯାଇଛି ଯେ, ଯେଉଁ ଭାରତୀୟ ନାଗରିକମାନେ ପାଠପଢ଼ା କିମ୍ବା ବୁଲିବା ପାଇଁ ରୁଷ ଯାଇଥିଲେ, ସେମାନଙ୍କୁ ସେଠାରେ ଅଟକ ରଖାଯାଇ ୟୁକ୍ରେନ ବିରୁଦ୍ଧରେ ଯୁଦ୍ଧ କରିବାକୁ ବାଧ୍ୟ କରାଯାଉଛି। 

'ଆମେ ନିଜ ଇଚ୍ଛା ବିରୁଦ୍ଧରେ ଯୁଦ୍ଧ ଲଢୁଛୁ'

ଆବେଦନକାରୀଙ୍କ ଓକିଲ କୋର୍ଟରେ କହିଛନ୍ତି ଯେ, ଫସି ରହିଥିବା ଭାରତୀୟମାନେ ଜଣାଇଛନ୍ତି ଯେ, ସେମାନେ ରୁଷରେ ବନ୍ଦୀ ଅବସ୍ଥାରେ ଅଛନ୍ତି ଏବଂ ନିଜ ଇଚ୍ଛା ବିରୁଦ୍ଧରେ ଏକ ବିଦେଶୀ ରାଷ୍ଟ୍ର ପାଇଁ ଯୁଦ୍ଧ ଲଢୁଛନ୍ତି।

ସଲିସିଟର ଜେନେରାଲ ତୁଷାର ମେହେଟ୍ଟା କହିଛନ୍ତି ଯେ, ସରକାର ଏହି ମାମଲାର ଯାଞ୍ଚ କରିବେ। ଏହା ଉପରେ ପ୍ରଧାନ ବିଚାରପତି (CJI) କହିଛନ୍ତି, "ଆମେ ସଲିସିଟର ଜେନେରାଲଙ୍କୁ ଏହି ମାମଲାକୁ ଗମ୍ଭୀରତାର ସହ ଦେଖିବାକୁ ଅନୁରୋଧ କରିଛୁ।"

ଶେଷ ସନ୍ଦେଶ ଓ ବିପଜ୍ଜନକ ସ୍ଥିତି:

ଆବେଦନରେ କୁହାଯାଇଛି ଯେ, ପରିବାର ଲୋକଙ୍କୁ ଶେଷ ସନ୍ଦେଶ (Message) ସେପ୍ଟେମ୍ବର ଏବଂ ଅକ୍ଟୋବର ୨୦୨୫ ମଧ୍ୟରେ ମିଳିଥିଲା। ଏଥିରୁ ଜଣାପଡ଼ିଛି ଯେ, ସେମାନଙ୍କୁ କୁପିୟାନସ୍କ, ସେଲିଦୋଭେ, ମାକିଭକା ଏବଂ ଚେଲ୍ୟାବିନ୍ସ୍କ ଭଳି ଭୟଙ୍କର ଯୁଦ୍ଧକ୍ଷେତ୍ରରେ ମୁତୟନ କରାଯାଇଛି। ସେମାନେ ନିଜ ଜୀବନ ପ୍ରତି ବିପଦ ଥିବା ନେଇ ଆଶଙ୍କା ପ୍ରକାଶ କରିବା ସହ ସେହି ଅଞ୍ଚଳରୁ ବାହାରିବା ଅସମ୍ଭବ ବୋଲି ଜଣାଇଛନ୍ତି। 

ସରକାରଙ୍କ ପଦକ୍ଷେପ:

ଭାରତ ସରକାର ପୂର୍ବରୁ ଏହି ପ୍ରସଙ୍ଗରେ ରୁଷ କର୍ତ୍ତୃପକ୍ଷଙ୍କ ସହ ଆଲୋଚନା କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ରୁଷ ଗସ୍ତ ସମୟରେ ମଧ୍ୟ ଏହି ପ୍ରସଙ୍ଗ ଉଠିଥିଲା ଏବଂ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଭାରତୀୟଙ୍କୁ ସେନା ମୁକ୍ତ କରି ସ୍ୱଦେଶ ଫେରାଇବାକୁ ପ୍ରତିଶ୍ରୁତି ଦେଇଥିଲେ।