ଶ୍ରୀମନ୍ଦିର ବିଶୃଙ୍ଖଳାକୁ ଆଗରୁ ହୋଇଛି ୪ଟି ବିଚାର ବିଭାଗୀୟ ତଦନ୍ତ ହେଲେ ଗୋଟିଏ ବି ରିପୋର୍ଟରେ ହୋଇନି କାର୍ଯ୍ୟାନୁଷ୍ଠାନ
Khabar Odisha:Ratna-Bhandar-Judicial-Enquiry-Puri-Jagannath-Temple

 ଜଗନ୍ନାଥ କେବଳ ଓଡିଆଙ୍କ ଆରାଧ୍ୟ ଦେବତା ନୁହନ୍ତି ବଂର ସାରା ଭାରତର ଅଗଣିତ ହିନ୍ଦୁମାନଙ୍କର ଆସ୍ଥାର ଭଗବାନ । ହେଲେ ପୁରୀ ଶ୍ରୀମନ୍ଦିରରେ ଯେତିକି ମାତ୍ରାରେ ବିଶୃଙ୍ଖଳା ହେଉଛି ବୋଧହୁଏ ଦେଶର ଅନ୍ୟ କୌଣସି ଧାର୍ମୀକସ୍ଥଳି ମାନଙ୍କରେ ହେଉନଥିବ । ଦିନକୁ ଦିନକୁ ବଢୁଛି ବିଶୃଙ୍ଖଳା । କେତେବେଳେ ବ୍ରହ୍ମ ଛୁଇଁବାକୁ ନେଇ ବିବାଦର କେତେବେଳେ ଜଗନ୍ନାଥ ଉପାସରେ ରହୁଛନ୍ତି । ସରକାର ଶ୍ରୀମନ୍ଦିରରେ ହେଉଥିବା ବିଶୃଙ୍ଖଳାକୁ ଶେଷ କରିବା ଭଳି ସେପରି କିଛି ଠୋସ ପଦକ୍ଷେପ ନେଉପାରୁନାହାନ୍ତି ।

ଏବେ ରତ୍ନଭଣ୍ଡାର ଚାବି ହଜିବାପରେ ବଢୁଥିବା ଜନଆକ୍ରୋଶକୁ ପ୍ରଶମିତ କରିବା ପାଇଁ ସରକାର ବିଚାର ବିଭାଗୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି । ହେଲେ ଏହି ବିଚାର ବିଭାଗୀୟ ତଦନ୍ତ କଣ ସତରେ ଚାବି ଖୋଜିପାରିବ ଏବଂ ଦୋଷିକୁ ଦଣ୍ଡ ଦେଇପାରିବ ତାକୁ ନେଇ ଉଠିଛି ପ୍ରଶ୍ନ । ଆଗରୁ ଶ୍ରୀଜଗନ୍ନାଥ ମନ୍ଦିରରେ ଘଟିଥିବା ବିଭିନ୍ନ ବିଭ୍ରାଟ ସଂକ୍ରାନ୍ତରେ ଗତ କିଛି ବର୍ଷ ମଧ୍ୟରେ ଅନ୍ୟୁନ ୫ଟି ତଦନ୍ତ କମିସନ୍‌ ବସିଲାଣି । କେଉଁଠି ରିପୋର୍ଟ ଉପରେ  କାର୍ୟ୍ୟାନୁଷ୍ଠାନ ହେଉନାହିଁ ତ  କେଉଁଠି ରତ୍ନଭଣ୍ଡାର ଚାବି ହଜିଲାଭଳି କମିସନ୍‌ଙ୍କ ରିପୋର୍ଟ ହଜିଯାଉଛି । ବେଳେ ବେଳେ ତଦନ୍ତ ଦାୟିତ୍ୱ ଗୋଟିଏ କମିଶନ ପରେ ଅନ୍ୟ ଏକ କମିସନ୍‌ଙ୍କୁ ଦିଆଗଲେ ବି ରିପୋର୍ଟ ନ ମିଳି ଘଟଣା ରହସ୍ୟମୟ ହୋଇ ରହିଯାଉଛି ।

୧୯୯୩ ମସିହାରେ ଶ୍ରୀମନ୍ଦିର ପରିସରରେ ନାଗାର୍ଜୁନ ବେଶ ଅବସରରେ ଘଟିଥିବା ଦଳାଚକଟାରେ ଯେଉଁଥିରେ ୩ ଜଣ ଲୋକଙ୍କ ଜିବନ ଯାଇଥିଲା ସେ ସଂକ୍ରାନ୍ତରେ ହୋଇଥିଲା ବିଚାର ବିଭାଗୀୟ ତଦନ୍ତ ଯାହାର ଦାୟିତ୍ବ ଦିଆଯାଇଥିଲା  ଅବସରପ୍ରାପ୍ତ ହାଇକୋର୍ଟ ବିଚାରପତି ଜୀବନ ମୋହନ ମହାପାତ୍ରଙ୍କୁ । ପ୍ରାୟ ୨ ବର୍ଷ ଧରି ତଦନ୍ତ କରିବା ପରେ ଜଷ୍ଟିସ୍‌ ମହାପାତ୍ର ତାଙ୍କ ତଦନ୍ତ ରିପୋର୍ଟ ମୁଖ୍ୟମନ୍ତ୍ରୀଙ୍କୁ ପ୍ରଦାନ କରିଥିଲେ । ଏହା ଉପରେ କାର୍ୟ୍ୟାନୁଷ୍ଠାନ ହେବା ତ ଦୂରର କଥା ଏବେ ସେ ରିପୋର୍ଟ ସଚିବାଳୟରେ ନାହିଁ ବୋଲି ବିଧାନସଭାରେ ସରକାର ମାନିଛନ୍ତି । 

ସେହିପରି ୨୦୦୬ ମସିହାରେ ଶ୍ରୀଜଗନ୍ନାଥ ମନ୍ଦିର ପରିସରରେ ହୋଇଥିବା ଅନ୍ୟ ଏକ ଦଳାଚକଟା ଘଟଣାରେ ରାଜ୍ୟ ସରକାର ଅବସରପ୍ରାପ୍ତ ହାଇକୋର୍ଟ ବିଚାରପତି ପି କେ ମହାନ୍ତିଙ୍କ ଅଧ୍ୟକ୍ଷତାରେ ଏକ କମିସନ ବସାଇଥିଲେ । ସେହିପରି ପୁରୁଣା ନାଗାର୍ଜୁନବେଶ ଦଳଚକଟା ଘଟଣାରେ ଜଷ୍ଟିସ୍‌ ମହାପାତ୍ର କମିସନ୍‌ ରିପୋର୍ଟ ହଜିବା ସଂକ୍ରାନ୍ତରେ ବି ତଦନ୍ତ ଲାଗି ଜଷ୍ଟିସ୍‌ ମହାନ୍ତି କମିସନ୍‌ଙ୍କୁ କୁହାଯାଇଥିଲା । ଜଷ୍ଟିସ୍‌ ମହାନ୍ତି କମିସନ୍‌ ବାବଦରେ ପ୍ରାୟ ୪୬ ଲକ୍ଷ ଟଙ୍କା ଖର୍ଚ୍ଚ ହେଲା ଓ ରିପୋର୍ଟ ବି ୨୦୦୯ରେ ସରକାରଙ୍କ ହସ୍ତଗତ ହେଲା । କିନ୍ତୁ ଜଷ୍ଟିସ୍‌ ମହାପାତ୍ର ତଦନ୍ତ କମିସନ୍‌ ରିପୋର୍ଟ ବି ଅନ୍ଧାରରେ ରହିଗଲା । 

ସେହିପରି ନବକଳେବର ସମୟରେ ବ୍ରହ୍ମ ପରିବର୍ତ୍ତନ ବିଭ୍ରାଟ ଅଭିଯୋଗର ତଦନ୍ତ ୨୦୧୫ ମସିହାରେ ଶ୍ରୀମନ୍ଦିରର ତତ୍‌କାଳୀନ ମୁଖ୍ୟ ପ୍ରଶାସକ ଆରମ୍ଭ କରିଥିଲେ । ତିନି ବର୍ଷ ପରେ ୨୦୧୮ରେ ରିପୋର୍ଟ ଶ୍ରୀମନ୍ଦିର ପରିଚାଳନା କମିଟିକୁ ମିଳିଛି । ହେଲେ ଏହାକୁ ସରକାର ଏବେ ସୁଦ୍ଧା ଏହାକୁ ସାର୍ବଜନିନ କରିନାହାନ୍ତି ।

ପୁରୀ ଶ୍ରୀମନ୍ଦିରରେ ଲାଗି ରହିଥିବା ଅବ୍ୟବସ୍ଥା ପ୍ରସଙ୍ଗରେ ସଂସ୍କାର ନିମନ୍ତେ ଅବସରପ୍ରାପ୍ତ ହାଇକୋର୍ଟ ବିଚାରପତି ବିମଳ ପ୍ରସାଦ ଦାସଙ୍କ ଅଧ୍ୟକ୍ଷତାରେ ୨୦୧୬ ମସିହାରେ ଏକ କମିସନ୍‌ ଗଠନ କରାଯାଇଥିଲା । ଏହି କମିସନ୍‌ ଇତି ମଧ୍ୟରେ ୨ଟି ଅନ୍ତରୀଣ ରିପୋର୍ଟ ଦେଇଛନ୍ତି । ତେବେ ଜଷ୍ଟିସ୍‌ ଦାସ କମିସନ୍‌ଙ୍କ କାର୍ୟ୍ୟକାଳ ବୃଦ୍ଧି ସଂକ୍ରାନ୍ତୀୟ ପ୍ରସ୍ତାବ ସରକାରଙ୍କ ସକ୍ରିୟ ବିଚାରାଧୀନ ଥିବାରୁ ବସ୍ତୁତଃ ଏହି କମିସନ୍‌ ଅଚଳ ହୋଇପଡ଼ିଛି । ଏହି କମିସନ୍‌ ବାବଦରେ ରାଜକୋଷରୁ ୯୪ ଲକ୍ଷ ଟଙ୍କା ଖର୍ଚ୍ଚ ସରିଥିବା କଥା ସରକାର ସ୍ୱୀକାର କରିଛନ୍ତି ।

ଚାରି ଚାରିଟି ତଦନ୍ତ ସରିଥିବା ବେଳେ ଗୋଟିଏ ବି ରିପୋର୍ଟରେ ସରକାର କାର୍ୟ୍ୟାନୁଷ୍ଠାନ ନେଇପାରିନଥିବାବେଳେ ଏବେ ରତ୍ନଭଣ୍ଡାର ଚାବି ହଜିବାର ରିପୋର୍ଟ ଆସିଲା ପରେ କାର୍ୟ୍ୟାନୁଷ୍ଠାନ ନେଇପାରିବ କି ନାହିଁ ତାହା ସମୟ କହିବ  ସରକାର ଏହି ତଦନ୍ତ କମିଶନକୁ ୩ ମାସ ଭିତରେ ତଦନ୍ତ ସାରିବା ପାଇଁ ସମୟ ସୀମା ନିର୍ଦ୍ଧାରଣ କରିଛନ୍ତି ।

Subscribe

National International State Sports Entertainment