ଶାଶ୍ୱତ ପ୍ରେମର ଅନନ୍ୟ ଉଦାହରଣ
Khabar Odisha:couple-toast-their-last-moments-together-after-67-years-of-marriage
ଇଂଲଣ୍ଡ, ମେ ୯(ଖବର ଓଡିଶା): ଇଂଲଣ୍ଡ ମୈନଚେଷ୍ଟର ଠାରେ ୯୦ ବର୍ଷୀୟ ବର୍ଟ ଓ ତାଙ୍କ ପତ୍ନୀ ବିଏଟ୍ରିଶ୍‌ ବାଇଟ୍‌ହେଡ୍‌ ବାସ କରନ୍ତି । ଦୀର୍ଘ ୬୭ ବର୍ଷ ହେବ ପ୍ରେମର ବନ୍ଧନରେ ବାନ୍ଧି ହୋଇ ରହିଥିବା ଏହି ଦମ୍ପତ୍ତି ଅନ୍ତିମ ସମୟରେ ବି ଅଲଗା ହୋଇ ନାହାନ୍ତି । ବିଏଟ୍ରିଶ୍‌ ଗତ ୬ ବର୍ଷ ହେଲା ଅସ୍ଥି କର୍କଟରେ ପୀଡିତ । କିନ୍ତୁ ନିଜେ ଅସୁସ୍ଥ ଥାଇ ମଧ୍ୟ ସ୍ୱାମୀ ବର୍ଟ ତାଙ୍କୁ ଏ ଅବସ୍ଥାରେ ଏକା ଛାଡିନାହାନ୍ତି।  
 
ଏହି ଦମ୍ପତ୍ତିଙ୍କ ବିବାହ ୧୯୫୦ ମସିହାରେ ହୋଇଥିଲା । ସେତେବେଳେ ବର୍ଟଙ୍କୁ ୧୭ ଓ ବିଏଟ୍ରିଶ୍‌ଙ୍କୁ ୧୫ ବର୍ଷ ହୋଇଥିଲା । ମାତ୍ର ଜୀବନର ଅପରାହ୍ନ ସମୟରେ ଆସି ଉଭୟ ପହଞ୍ଚି ସାରିଥିଲେ ମଧ୍ୟ ପରସ୍ପର ପ୍ରତି ଥିବା ଭଲପାଇବା ଓ ବିଶ୍ୱାସକୁ ଛାଡି ପାରିନାହାନ୍ତି । କର୍କଟରେ ପିଡୀତ ହୋଇ ଯେତେବେଳେ ବିଏଟ୍ରିଶ୍‌ ଡାକ୍ତରଖାନାରେ ଭର୍ତ୍ତି ହେଲେ ସେତେବେଳେ ବର୍ଟଙ୍କ ଶରୀର ମଧ୍ୟ ଅସୁସ୍ଥ ହୋଇଗଲା । ଉଭୟଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।
 
ଉଭୟ କେହି କାହାରିଠୁ ଅଲଗା ରହିବା ପାଇଁ ରାଜି ହୋଇନଥିଲେ । ତେଣୁ ଡାକ୍ତରଖାନାର କର୍ମଚାରୀ ଉଭୟଙ୍କ ବେଡ୍‌କୁ ଏକାଠି କରିଦେଲେ । ଏଥିରେ ଉଭୟ ଖୁସି ହୋଇ ଯାଇଥିଲେ । ଯାହାପରେ ସେମାନେ ପରସ୍ପରର ହାତ ଧରି ଅସୁସ୍ଥ ଶରୀରରେ ଡାକ୍ତରଖାନା ବେଡ୍‌ରେ ଶୋଇଲେ । ଉଭୟଙ୍କର ଚାରି ସନ୍ତାନ, ଚାରି ନାତି ଓ ପାଞ୍ଚ ଜଣ ଅଣନାତି ଅଛନ୍ତି । ଡାକ୍ତରଖାନାର କର୍ତ୍ତୃପକ୍ଷ କହିଛନ୍ତି ଆମେ ଶେଷ ସମୟ ଯାଏଁ ଉଭୟଙ୍କୁ ଏକାଠି ରଖିବାକୁ ଚେଷ୍ଟା କରିବୁ । ଆଜିର ଏ ସମାଜ ପାଇଁ ବର୍ଟ ଓ ବିଏଟ୍ରିଶ୍‌ ନିଶ୍ଚୟ ଏକ ଶାଶ୍ୱତ ପ୍ରେମର ଉଦାହରଣ ।
  • Tags:

Subscribe

National International State Sports Entertainment