ନୂଆଦିଲ୍ଲୀ: ବିଶ୍ୱ ରାଜନୀତିର ତିନି ପ୍ରମୁଖ ଶକ୍ତି ଆମେରିକା, ରୁଷିଆ ଓ ଚୀନ୍ର ରାଷ୍ଟ୍ରମୁଖ୍ୟଙ୍କ ମଧ୍ୟରେ ଏକ ଐତିହାସିକ ତ୍ରିପାକ୍ଷିକ ଶିଖର ବୈଠକ ଶେଷ ହୋଇଛି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ୍ ଏବଂ ଚୀନ୍ର ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ଗୁରୁବାର ଚୀନ୍ର ସେନଜେନ୍ରେ ଏହି ବୈଠକ ଅନୁଷ୍ଠିତ ହୋଇଥିଲା। ପ୍ରାୟ ଦେଢ଼ ଘଣ୍ଟା ଧରି ଚାଲିଥିବା ଏହି ଆଲୋଚନାରେ ବିଶ୍ୱ ସୁରକ୍ଷା, ପରମାଣୁ ଅସ୍ତ୍ର, ଇରାନ ଏବଂ ୟୁକ୍ରେନ୍ ଯୁଦ୍ଧ ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ସ୍ଥାନ ପାଇଥିଲା।
ବୈଠକ ପରେ ତିନି ଦେଶର ରାଷ୍ଟ୍ରମୁଖ୍ୟଙ୍କ ପକ୍ଷରୁ ଏକ ମିଳିତ ଶାନ୍ତି ଘୋଷଣାନାମା ଜାରି କରାଯାଇଛି। ଏଥିରେ ଅନ୍ତର୍ଜାତୀୟ ଶାନ୍ତି ଓ ସୁରକ୍ଷା ବଜାୟ ରଖିବା ସହ ଜାତିସଂଘର ସଂସ୍କାର, ଶକ୍ତି ଯୋଗାଣ ଏବଂ ପରମାଣୁ ବିପଦ ହ୍ରାସ ଉପରେ ଗୁରୁତ୍ୱ ଦିଆଯାଇଛି।
ଚୀନ୍ ବିଦେଶ ମନ୍ତ୍ରଣାଳୟ ଜାରି କଲା ମିଳିତ ଘୋଷଣା
ଗୁରୁବାର (୧୯ ନଭେମ୍ବର, ୨୦୨୬) ଚୀନ୍ର ବିଦେଶ ମନ୍ତ୍ରଣାଳୟ ଏହି ଶିଖର ବୈଠକ ସମ୍ପର୍କିତ ମିଳିତ ଘୋଷଣା ପ୍ରକାଶ କରିଛି। ଏଥିରେ ଟ୍ରମ୍ପ ଓ ପୁଟିନ୍ ଐତିହାସିକ ବୈଠକ ଆୟୋଜନ କରିଥିବାରୁ ଚୀନ୍କୁ ଧନ୍ୟବାଦ ଜଣାଇଥିବା ଉଲ୍ଲେଖ ରହିଛି। ତିନି ରାଷ୍ଟ୍ରମୁଖ୍ୟ ବର୍ତ୍ତମାନର ଅନ୍ତର୍ଜାତୀୟ ପରିସ୍ଥିତି ଉପରେ ନିଜ ନିଜର ମତ ରଖିବା ସହ ବିଶ୍ୱରେ ରଣନୈତିକ ସ୍ଥିରତା ଓ ସୁରକ୍ଷା ବଜାୟ ରଖିବା ନେଇ ପ୍ରତିବଦ୍ଧତା ପ୍ରକାଶ କରିଛନ୍ତି।
ଜାତିସଂଘରେ ସଂସ୍କାର ପାଇଁ ତିନି ଦେଶ ଏକମତ
ମିଳିତ ବିବୃତିରେ ଜାତିସଂଘ ସୁରକ୍ଷା ପରିଷଦ (UNSC)ର ସ୍ଥାୟୀ ସଦସ୍ୟ ଭାବେ ତିନି ଦେଶ ଜାତିସଂଘର କାର୍ଯ୍ୟପ୍ରଣାଳୀରେ ସଂସ୍କାର ଆଣିବା ଉପରେ ସହମତି ପ୍ରକାଶ କରିଛନ୍ତି। ବିଶ୍ୱ ସାମ୍ନା କରୁଥିବା ବିଭିନ୍ନ ଆହ୍ୱାନର ମୁକାବିଲା ପାଇଁ ଜାତିସଂଘକୁ ଅଧିକ ପ୍ରଭାବଶାଳୀ କରିବା ଏହାର ମୁଖ୍ୟ ଉଦ୍ଦେଶ୍ୟ। ଅନ୍ତର୍ଜାତୀୟ ଶାନ୍ତି ଓ ସୁରକ୍ଷା ରକ୍ଷା କରିବାରେ ଜାତିସଂଘ ଯେପରି ନିଜର ମୂଳ ଦାୟିତ୍ୱ ସଠିକ୍ ଭାବେ ତୁଲାଇପାରିବ, ସେଥିପାଇଁ ତିନି ଦେଶ ମିଳିତ ଭାବେ କାମ କରିବାକୁ ରାଜି ହୋଇଛନ୍ତି।
ପେଟ୍ରୋଲିୟମ୍ ଉତ୍ପାଦର ଯୋଗାଣ ବଢ଼ାଇବା ଉପରେ ଗୁରୁତ୍ୱ
ବିଶ୍ୱ ଶକ୍ତି ବଜାରର ସ୍ଥିରତାକୁ ନେଇ ମଧ୍ୟ ତିନି ଦେଶ ଆଲୋଚନା କରିଛନ୍ତି। ରିଫାଇନ୍ଡ ପେଟ୍ରୋଲିୟମ୍ ଉତ୍ପାଦର ଉତ୍ପାଦନ ଓ ଯୋଗାଣ ବୃଦ୍ଧି କରିବା ପାଇଁ ଯୋଜନା ଉପରେ ସହମତି ହୋଇଥିବା ଚୀନ୍ ବିଦେଶ ମନ୍ତ୍ରଣାଳୟର ବିବୃତିରେ କୁହାଯାଇଛି। ବିଶ୍ୱର ବିଭିନ୍ନ ଦେଶକୁ ନିରବଚ୍ଛିନ୍ନ ଭାବେ ଶକ୍ତି ଯୋଗାଣ ହେବା ଆବଶ୍ୟକ ବୋଲି ତିନି ନେତା ମତ ଦେଇଛନ୍ତି। ଶକ୍ତି କ୍ଷେତ୍ରରେ ସ୍ଥିରତା ରହିଲେ ବିଶ୍ୱ ଅର୍ଥନୀତି ଉପରେ ମଧ୍ୟ ଏହାର ସକାରାତ୍ମକ ପ୍ରଭାବ ପଡ଼ିବ।