ୱାଶିଂଟନ: ଆମେରିକାରେ ଡିଜିଟାଲ ବୈଷୟିକ ତ୍ରୁଟି ଉତ୍କଟ ରୂପ ଧାରଣ କରିଛି । ପ୍ରଥମେ ମାଇକ୍ରୋସପ୍ଟର ଆଉଟଲୁକ୍ ଅକାମୀ ହେବା ପରେ ବିମାନ ଚଳାଚଳରେ ବଡ଼ ସମସ୍ୟା ଉତ୍ପନ୍ନ ହୋଇଛି । ସୋମବାର ପ୍ରାୟ ୩୦୦ରୁ ଅଧିକ ବିମାନ ବାତିଲ ହୋଇଛି । ଦୁଇ ଦିନ ମଧ୍ୟରେ ୧୮,୦୦୦ରୁ ଅଧିକ ବିମାନ ବାତିଲ । ସେହିପରି ଦେଶର ବ୍ୟାଙ୍କ ସେବା ମଧ୍ୟ ଠପ୍ ହୋଇଯାଇଛି ।
ଡାଉନଡିଟେକ୍ଟର୍.କମ୍ ଅନୁସାରେ, ସୋମବାର ଦେଶରେ ଅନେକ ବଡ଼ ବ୍ୟାଙ୍କରେ ଟଙ୍କା ନେଣଦେଣ ସେବା ବାଧାପ୍ରାପ୍ତ ହୋଇଥିଲା । ଅନଲାଇନ୍ ଟଙ୍କା କାରବାରରେ ସମସ୍ୟା ଦେଖାଦେଇଥିଲା । ବ୍ୟାଙ୍କ ଅଫ୍ ଆମେରିକା, ଚେଜ୍, ଜେପି ମର୍ଗନ୍, ୟୁଏସ୍ ବ୍ୟାଙ୍କ, ୱେଲ୍ସ ଫାର୍ଗୋ ଏବଂ ଡିଜିଟାଲ୍ ପ୍ଲାଟଫର୍ମ ଜେଲେର ଗ୍ରାହକମାନେ ଏହି ଅସୁବିଧାର ସମ୍ମୁଖୀନ ହୋଇଥିଲେ । ଦେଶର ସବୁଠାରୁ ବଡ଼ ବ୍ୟାଙ୍କ ଜେପି ମର୍ଗନ ଚେଜ୍ ରେ ହାର୍ଡୱେୟାରରେ ତ୍ରୁଟି ଯୋଗୁଁ ନେଣଦେଣ ଠପ୍ ହୋଇଯାଇଥିଲା । ଯାହାର ପ୍ରଭାବ ବ୍ୟାଙ୍କ୍ ଅଫ୍ ଆମେରିକା, ସିଟିଗ୍ରୁପ ସହିତ ଅନ୍ୟାନ୍ୟ ଗ୍ରାହକଙ୍କ ଉପରେ ପଡ଼ିଥିଲା ।
ଆମେରିକାରେ ବିମାନ ସେବା ମଧ୍ୟ ବାଧାପ୍ରାପ୍ତ ହୋଇଛି । ଯୁକ୍ତରାଷ୍ଟ୍ର ଆମେରିକାର 'ଏୟାର ଟ୍ରାଫିକ୍ କଣ୍ଟ୍ରୋଲ୍' ବ୍ୟବସ୍ଥାରେ ଦେଖାଦେଇଥିବା ଏକ ବୈଷୟିକ ତ୍ରୁଟି ଯୋଗୁଁ ବିମାନ ସେବା ଉପରେ ପ୍ରଭାବ ଲଗାତାର ତୃତୀୟ ଦିନ ପାଇଁ ଜାରି ରହିଛି । ସୋମବାର ଦିନ ପ୍ରାୟ ୩୦୦ଟି ବିମାନ ଉଡ଼ାଣ ବାତିଲ କରିବାକୁ ପଡ଼ିଥିବା ବେଳେ ୧,୫୦୦ଟି ବିମାନ ବିଳମ୍ବିତ ହୋଇଥିଲା। ତେବେ, ପ୍ରଥମ ଦୁଇ ଦିନ ତୁଳନାରେ ପରିସ୍ଥିତିରେ କିଛି ସୁଧାର ଆସିଛି ଏବଂ ବିମାନ ଚଳାଚଳ କ୍ରମଶଃ ସ୍ୱାଭାବିକ ହେବାକୁ ଲାଗିଛି।
ବିମାନ ଚଳାଚଳ ଉପରେ ନଜର ରଖୁଥିବା ୱେବସାଇଟ୍ 'ଫ୍ଲାଇଟ୍ଅୱେର୍' ଅନୁଯାୟୀ, ରବିବାର ଦିନ ୨,୩୦୦ରୁ ଅଧିକ ବିମାନ ଉଡ଼ାଣ ବାତିଲ ହୋଇଥିଲା ଏବଂ ପ୍ରାୟ ୧୧,୦୦୦ ବିମାନ ବିଳମ୍ବିତ ହୋଇଥିଲା। ଏହି ବୈଷୟିକ ତ୍ରୁଟି କାରଣରୁ, ଦୁଇ ଦିନ ମଧ୍ୟରେ ୧୮,୦୦୦ରୁ ଅଧିକ ବିମାନ ଉଡ଼ାଣ ବାତିଲ କରିବାକୁ ପଡ଼ିଥିଲା। ଗତ ୨୫ ବର୍ଷ ମଧ୍ୟରେ ଆମେରିକୀୟ ବିମାନ ଚଳାଚଳ ବ୍ୟବସ୍ଥାରେ ଘଟିଥିବା ସବୁଠାରୁ ବଡ଼ ବ୍ୟାଘାତଗୁଡ଼ିକ ମଧ୍ୟରୁ ଏହାକୁ ଅନ୍ୟତମ ବୋଲି ବିବେଚନା କରାଯାଉଛି।
ଏହି ସମସ୍ୟା ବିମାନ କମ୍ପାନୀଗୁଡ଼ିକ ବ୍ୟବସାୟ ଉପରେ ଗୁରୁତର ପ୍ରଭାବ ପକାଇଛି। ବ୍ରୋକରେଜ୍ ଫାର୍ମ 'ବର୍ନଷ୍ଟାଇନ୍'ର ଆକଳନ ଅନୁଯାୟୀ, ଆମେରିକାନ୍, ଡେଲ୍ଟା, ୟୁନାଇଟେଡ୍ ଏବଂ ସାଉଥୱେଷ୍ଟ ଏୟାରଲାଇନ୍ସଗୁଡ଼ିକ ମିଳିତ ଭାବେ ପ୍ରାୟ ୩୪୫ ନିୟୁତ ଡଲାରର କ୍ଷତି ସହିଛନ୍ତି। 'ବ୍ୟାଙ୍କ ଅଫ୍ ଆମେରିକା' ର ବିଶ୍ଳେଷକମାନେ ଦର୍ଶାଇଛନ୍ତି ଯେ 'ଜେଟ୍ବ୍ଲୁ' ସବୁଠାରୁ ଅଧିକ ପ୍ରଭାବିତ ହୋଇଛି । 'ଜେଟ୍ବ୍ଲୁ'ର ୨୮ ପ୍ରତିଶତ ବିମାନ ଉଡ଼ାଣ ବାତିଲ କରାଯାଇଥିବା ବେଳେ 'ଆମେରିକାନ୍ ଏୟାରଲାଇନ୍ସ'ର ୨୨ ପ୍ରତିଶତ ବିମାନ ଉଡ଼ାଣ ବାତିଲ ହୋଇଛି। ଡେଲ୍ଟା, ୟୁନାଇଟେଡ୍ ଏବଂ ସାଉଥୱେଷ୍ଟକୁ ଯଥାକ୍ରମେ ସେମାନଙ୍କର ୫ ପ୍ରତିଶତ, ୩ ପ୍ରତିଶତ ଏବଂ ୪ ପ୍ରତିଶତ ବିମାନ ଉଡ଼ାଣ ବାତିଲ କରିବାକୁ ପଡ଼ିଛି।
ଏହାର ପ୍ରଭାବ ଶେୟାର ବଜାରରେ ମଧ୍ୟ ଦେଖିବାକୁ ମିଳିଛି । 'ଜେଟ୍ବ୍ଲୁ'ର ଶେୟାର ମୂଲ୍ୟ ପ୍ରାୟ ୨ ପ୍ରତିଶତ ହ୍ରାସ ପାଇଥିବା ବେଳେ ଅନ୍ୟ ବିମାନ କମ୍ପାନୀଗୁଡ଼ିକର ଶେୟାର ମୂଲ୍ୟ ୧ ରୁ ୨ ପ୍ରତିଶତ ପର୍ଯ୍ୟନ୍ତ ଖସିଯାଇଛି।