ସମ୍ବଲପୁର : ଧରା ପଡିଲା ଚୋର ।  ଜବତ ହେଲା ମୋଟ ୨୪ ଲକ୍ଷ ୬୦ ହଜାର ଟଙ୍କାର  ଗହଣା ଓ ନଗଦ ଟଙ୍କା । ଏନେଇ ସମ୍ବଲପୂର ଏସପି ମୁକେଶ କୁମାର ଭାମୁ ଜିଲ୍ଲା ପୋଲିସ ମୁଖ୍ୟାଳୟରେ ଗଣମାଧ୍ୟମକୁ ସୂଚନା ଦେଇଛନ୍ତି। ସୂଚନା ଅନୁଯାୟୀ ଗତ ୧୨ ତାରିଖରେ ବୁର୍ଲା ଥାନାରେ କିର୍ବା ଅଞ୍ଚଳର ଜଣେ ମହିଳା ଲିଖିତ ଅଭିଯୋଗ କରିଥିଲେ ଯେ ସେ ନିଜ ଝିଅ ବାହାଘର ପାଇଁ ଘରେ ରଖିଥିବା ୧୫  ଲକ୍ଷ ଟଙ୍କା ସହ ସୁନା ଓ ରୁପା ଗହଣା ଚୋରି ହୋଇଯାଇଛି। ଅଭିଯୋଗ ଅନୁସାରେ ବୁର୍ଲା ପୋଲିସ ଘଟଣାର ତଦନ୍ତ କରି କିର୍ବା ଅଞ୍ଚଳର ୩୨ ବର୍ଷିୟ ଇନ୍ଦ୍ର ବେହେରାଙ୍କୁ ଗିରଫ କରି  ୧୬ ଲକ୍ଷ ୪୦ ହଜାର ଟଙ୍କା ସହ ୮ ଲକ୍ଷ ୬୦ ହଜାର ଟଙ୍କା ମୁଲ୍ୟରେ ସୁନା ଓ ରୁପା ଗହଣାକୁ ଉଦ୍ଧାର କରିଛନ୍ତି ।

ଅଭିଯୁକ୍ତ ଠାରୁ ଉଦ୍ଧାର ହୋଇଥିବା ଟଙ୍କା ଓ ଗହଣା ଗୁଡିକର ମୋଟ ୨୪ ଲକ୍ଷ ୬୦ ହଜାର ଟଙ୍କା ହେବ ବୋଲି  ଏସପି କହିଛନ୍ତି । ଏଥିସହ ଏସପି ଲୋକଙ୍କୁ ନିଜ ଘରେ ସୁରକ୍ଷା ଦୃଷ୍ଟିକୋଣରୁ ଅଧିକ ପରିମାଣର ନଗଦ ଟଙ୍କା ନରଖି ବ୍ୟାଙ୍କ୍ ରେ ଜମା ରଖିବାକୁ ପରାମର୍ଶ ଦେଇଛନ୍ତି।