କଳାହାଣ୍ଡି ଜିଲ୍ଲାରେ ଲଗାଣ ବର୍ଷା ଜନଜୀବନକୁ ପ୍ରଭାବିତ କରିଛି। ଗତ ୨୪ ଘଣ୍ଟାରେ ସକାଳ ୮ଟା ୩୦ ପର୍ଯ୍ୟନ୍ତ ଓଡ଼ିଶାର ସର୍ବାଧିକ ବର୍ଷା କଳାହାଣ୍ଡିର ଗୋଲାମୁଣ୍ଡାରେ ୧୫୯ ମିଲିମିଟର ରେକର୍ଡ ହୋଇଛି। ଆଞ୍ଚଳିକ ପାଣିପାଗ କେନ୍ଦ୍ରର ତଥ୍ୟ ଅନୁସାରେ, ରାଜ୍ୟର ସର୍ବାଧିକ ବର୍ଷାପାତ ତାଲିକାରେ ପ୍ରଥମ ୬ଟି ସ୍ଥାନ ମଧ୍ୟରୁ ୫ଟି କଳାହାଣ୍ଡି ଜିଲ୍ଲାର ରହିଛି।

ଗୋଲାମୁଣ୍ଡା ପରେ ମଦନପୁର-ରାମପୁରରେ ୧୪୦ ମି.ମି., ଭବାନୀପାଟଣାରେ ୧୩୯.୮ ମି.ମି. ଏବଂ ଜୁନାଗଡ଼ରେ ୧୩୬.୮ ମି.ମି. ବର୍ଷା ହୋଇଛି। ଥୁଆମୂଳ-ରାମପୁରରେ ୧୧୭ ମି.ମି. ବର୍ଷା ରେକର୍ଡ ହୋଇଥିବାବେଳେ ମାଲକାନଗିରି ଜିଲ୍ଲାରେ ୧୨୬.୬ ମି.ମି. ବର୍ଷା ସହ ରାଜ୍ୟର ପଞ୍ଚମ ସର୍ବାଧିକ ବର୍ଷାପାତ ହୋଇଛି।

ପାଣିପାଗ ବିଭାଗ କହିଛି, ଏହି ସମୟରେ ରାଜ୍ୟର ୨୩ଟି ସ୍ଥାନରେ ପ୍ରବଳ ବର୍ଷା ରେକର୍ଡ ହୋଇଛି। ବିଶେଷ କରି ଦକ୍ଷିଣ ଓ ପଶ୍ଚିମ ଓଡ଼ିଶାରେ ବର୍ଷାର ପ୍ରଭାବ ଅଧିକ ଦେଖାଯାଇଛି।

ଆଜି ପାଇଁ କନ୍ଧମାଳ, ଗଞ୍ଜାମ, ରାୟଗଡ଼ା, ଗଜପତି, ବଲାଙ୍ଗିର, ନୂଆପଡ଼ା ଓ ମାଲକାନଗିରି ଜିଲ୍ଲାକୁ ଭାରି ବର୍ଷା ସତର୍କତା ଜାରି କରାଯାଇଛି। ଏହି ସବୁ ଜିଲ୍ଲାରେ ଘଡ଼ଘଡ଼ି ସହ ବର୍ଷା, ସ୍ଥାନୀୟ ଜଳଜମା ଓ ନଦୀ-ନାଳରେ ଜଳସ୍ତର ବୃଦ୍ଧିର ସମ୍ଭାବନା ଥିବାରୁ ଲୋକଙ୍କୁ ସତର୍କ ରହିବାକୁ ପାଣିପାଗ କେନ୍ଦ୍ର ପରାମର୍ଶ ଦେଇଛି।