ଭୁବନେଶ୍ୱର :  ଶ୍ରାବଣ ମାସରେ ରାଜ୍ୟରେ ପରିବା ଦର ଆକାଶ ଛୁଆଁ ହୋଇଛି । ରାଜ୍ୟରେ ବନ୍ୟା ସ୍ଥିତି ଯୋଗୁଁ ଶହ ଶହ ହେକ୍ଟର ପରିବା ଚାଷ ନଷ୍ଟ ହୋଇଛି । ଯାହା ଫଳରେ ପରିବା ଦର ବଢ଼ି ବଢ଼ି ଚାଲିଛି । ଯେକୌଣସି ପରିବା ଶହେ ଟଙ୍କା ତଳେ  ମିଳୁନି । ପ୍ରାୟ ପରିବା ଶତକ ମାରିସାରିଲାଣି । ପରିବା ମୂଲ୍ୟବୃଦ୍ଧି ଯୋଗୁଁ  ଗରିବ ଓ ମଧ୍ୟବିତ୍ତ ଶ୍ରେଣୀର ରୋଷେଇ ଘରେ ସତେ ଯେପରି ଚଡକ ପଡିଛି।  କଟକ ଛତ୍ରବଜାର ସମେତ ରାଜ୍ଯର ବିଭିନ୍ନ ବଡ ପରିବା ବଜାରରେ ମଧ୍ଯ ପରିବା ଦର ବୃଦ୍ଧି ପାଇଛି । 

ଚଳିତ  ଋତୁରେ କାଙ୍କଡ଼ ମୂଲ୍ଯ  ୨୪୦ ଟଙ୍କା  ଓ ଦେଶୀ ଫୁଲ କୋବି ୧୪୦ ଟଙ୍କାରେ ପହଞ୍ଚିଛି । କିଛିଦିନ  ହେବ ବାଇଗଣ, ଭେଣ୍ଡି, ଜହ୍ନି, ପୋଟଳ, କାକୁଡି ଆଦି  ପରିବା ମଧ୍ଯ  କିଲୋ ପ୍ରତି ୧୦୦ ଟଙ୍କାକୁ ଟପି ଯାଇଛି । ପୋଟଳ  ପିଛା ହୋଲସେଲ ଦର କିଲୋପିଛା ୮୦ ଟଙ୍କା ରହୁଥିବା  ବେଳେ ବେପାରୀମାନେ ତାହାକୁ ନେଇ ୧୨୦ ଟଙ୍କାରେ  ଖାଉଟିଙ୍କୁ ବିକ୍ରି କରୁଥିବା ଅଭିଯୋଗ ହେଉଛି । ସେହିପରି  ଟମାଟୋ କିଲୋପ୍ରତି ୩୦ ଟଙ୍କାରେ କିଣି ୫୦ ଟଙ୍କା ଓ  କୁନ୍ଦୁରି କିଲୋପ୍ରତି ୮୦ ଟଙ୍କାରେ ବିକ୍ରି ହେଉଛି । କଞ୍ଚାଲଙ୍କା  ୨୦୦ ଟଙ୍କାରେ ବିକ୍ରି କରୁଛନ୍ତି । ଫୁଲକୋବି ହୋଲସେଲ ଦାମ  କିଲୋପ୍ରତି ୮୦ ଟଙ୍କା ଥିବା ବେଳେ ୧୪୦ ଟଙ୍କାରେ ବିକ୍ରି  ହେଉଛି । ଆଳୁ କିଲୋପ୍ରତି ୮ ଟଙ୍କା ହୋଲସେଲ  ଦର ଥିବାବେଳେ ବଜାରରେ ୪୦ ଟଙ୍କା ବିକ୍ରି ହେଉଛି। ପରିବା ହୋଲସେଲ ଦର ଓ ବେପାରୀମାନେ ବିକ୍ରି କରୁଥିବା  ଦର ମଧ୍ୟରେ ଆକାଶପାତାଳ ତାରତମ୍ୟ ରହୁଥିବାରୁ  ଖାଉଟି ଅସନ୍ତୋଷ  ହେଉଛନ୍ତି।