ଭୁବନେଶ୍ୱର: ଘିଅ, ଚା, ଡିଟରଜେଣ୍ଟ ପାଉଡର, ସାମ୍ପୁ, ତେଲ ଇତ୍ୟାଦି ପରେ ଏବେ ବଜାରରେ ମିଳୁଛି ନକଲି ଲୁହା ଛଡ଼ ବା ରଡ୍ । ଯଦି ଆପଣ ବ୍ରାଣ୍ଡେଡ୍ ଲୁହା ରଡ୍ କିଣିବାକୁ ମାର୍କେଟକୁ ଯାଉଛନ୍ତି, ତେବେ ସାବଧାନ ହୋଇ ଯାଆନ୍ତୁ । କାରଣ ବିଭିନ୍ନ ନାମୀ ଦାମୀ କମ୍ପାନୀକୁ ନକଲ କରି ବଜାରରେ ବିକ୍ରି ହେଉଛି ନକଲି ଲୁହା ରଡ୍ । ଏ ନେଇ ଆଜି ଗୃହରେ ଉତ୍ତର ରଖିଛନ୍ତି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର । 

ବିଧାୟକ ମଙ୍ଗୁ ଖିଲ ପଚାରିଥିବା ପ୍ରଶ୍ନରେ ମନ୍ତ୍ରୀ କହିଛନ୍ତି, କୋରାପୁଟ ଏବଂ ମାଲକାନଗିରିରେ ସେଲ୍, ଟାଇଗର, ସୃଷ୍ଟି, ଟାଟା ସ୍କାନ, ଜିନ୍ଦଲ, ପାନ୍ଥର୍ ଇତ୍ୟାଦି କମ୍ପାନୀର ଲୁହା ଛଡ଼ ବିକ୍ରି କରାଯାଉଛି । ଏହାର ମାନ ବିଭିନ୍ନ ପ୍ରକାରର ରହିଛି ଯଥା, ଟିଏମଟି, ଏମ୍ ଏସ୍, ହାଇ ଷ୍ଟ୍ରେନ୍ଥ, ଟ୍ୟୁଷ୍ଟେଡ୍ ଷ୍ଟିଲ୍ ଇତ୍ୟାଦି ଏବଂ ବିଭିନ୍ନ ଗ୍ରେଡ୍ ରେ ବଜାରରେ ଉପଲବ୍ଧ ହେଉଛି । କିନ୍ତୁ କୋରାପୁଚ ଓ ମାଲକାନଗିରିରେ ଏପରି କୌଣସି ଟିଏମଟି ବାର୍ କାରଖାନା ନାହିଁ, ଯେଉଁମାନେ ବିଆଇଏସ୍ ଲାଇସେନ୍ସ  ନେଇଛନ୍ତି । 

ଏହି ଦୁଇଟି ଜିଲ୍ଲାରେ ଲୁହା ଛଡ଼ରେ ବ୍ୟାପକ ଜାଲିଆତି କରାଯାଉଥିବା ଜଣାପଡ଼ିଛି । କୋରାପୁଟ ଜିଲ୍ଲାରେ ୩୨୪ଟି ଦୋକାନ ଉପରେ ଚଢ଼ାଉ କରାଯାଇ ୫୩ଟି ଖିଲାପକାରୀଙ୍କ ଠାରୁ ୧ ଲକ୍ଷ ୪୧ ହଜାର ଟଙ୍କା ଜରିମାନା ଆଦାୟ ହୋଇଛି । ମାଲକାନଗିରି ଜିଲ୍ଲାରେ ୧୨୬ ଟି ଦୋକାନ ଚଢ଼ାଉ କରାଯାଇ ୯ଟି ଖିଲାପକାରୀଙ୍କ ଠାରୁ ୧୬ ହଜାର ୫୦୦ ଟଙ୍କା ଜରିମାନା ଆଦାୟ ହୋଇଛି ବୋଲି ଲିଖିତ ଉତ୍ତର ରଖିଛନ୍ତି ଯୋଗାଣ ମନ୍ତ୍ରୀ ।