ବଲାଙ୍ଗିର: ବିଦ୍ୟାଳୟ ଗୃହ ନିର୍ମାଣ ପାଇଁ ରାଜରାସ୍ତାରେ ବସି ଭିକ୍ଷା ମାଗିଲେ ଛାତ୍ରଛାତ୍ରୀ । କୋଠା ନିର୍ମାଣ ପାଇଁ ମାଗିଲେ ଦାନ, କଲେ ରାସ୍ତା ଅବରୋଧ । ଯେଉଁ ହାତରେ କଲମ ଧରିବା କଥା, ସେହି ହାତରେ ଦାନ ବାକ୍ସ ଧରି ବସିଲେ । ଏଭଳି ଏକ ଅଭିନବ ଉପାୟରେ ପ୍ରତିବାଦ କରିଛନ୍ତି ବଲାଙ୍ଗିର ଜିଲ୍ଲା ପାଟଣାଗଡ ବ୍ରହ୍ମପୁରା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଛାତ୍ରଛାତ୍ରୀ । ବିଦ୍ୟାଳୟରେ ପାଠ ପଢ଼ିବାକୁ ଆବଶ୍ୟକ ଶ୍ରେଣୀ ଗୃହ ନ ଥିବାରୁ ଆନ୍ଦୋଳନକୁ ଓହ୍ଲାଇଛନ୍ତି ପିଲା । 

ବଲାଙ୍ଗିର ଜିଲ୍ଲା ପାଟଣାଗଡ ସହର ବ୍ରହ୍ମପୁରା ଉଚ୍ଚ ପ୍ରାଥମିକ ବିଦ୍ୟାଳୟର ଶ୍ରେଣୀ ଗୃହ ଭାଙ୍ଗିରୁଜି ଗଲାଣି । ଯାହା ଫଳରେ ଛାତ୍ରଛାତ୍ରୀ ମାନେ ଖରା,ବର୍ଷା, ଶୀତରେ ନାହିନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ପୁର୍ବରୁ ବିଦ୍ୟାଳୟରେ ପୁରୁଣା କୋଠା ଥିବା ବେଳେ ତାକୁ ଭାଙ୍ଗି ନୂଆ କୋଠା ନିର୍ମାଣ ପାଇଁ ୨୦୨୨-୨୩ ରେ ତତକାଳୀନ ବିଧାୟକ ଅନୁଦାନ ଦେଇଥିଲେ । ହେଲେ ତିନି ବର୍ଷ ବିତିଯାଇଥିଲେ ବି କୋଠା ନିର୍ମାଣ ହେଉନଥିବାରୁ ଗତ ବର୍ଷ ବିଦ୍ୟାଳୟ ଛାତ୍ରଛାତ୍ରୀ ଓ ଅଭିଭାବକ କୋଠା ନିର୍ମାଣ ପାଇଁ ଧାରଣା ଦେଇଥିଲେ । ସେତେବେଳେ ପ୍ରଶାସନିକ ଅଧିକାରୀ  ତୁରନ୍ତ କୋଠା ନିର୍ମାଣର ପ୍ରତିଶୃତି ଦେଇଥିଲେ ବି ଆଜି ପର୍ଯ୍ୟନ୍ତ ସେହି ପ୍ରତିଶ୍ରୁତି ପୂରଣ ହୋଇ ପାରି ନାହିଁ  । ଫଳରେ ବାଧ୍ୟ ହୋଇ ଛାତ୍ରଛାତ୍ରୀ ଆନ୍ଦୋଳନକୁ ଓହ୍ଲାଇଛନ୍ତି । ଅସନ୍ତୁଷ୍ଟ ଅଭିଭାବକ ଓ ଛାତ୍ରଛାତ୍ରୀ କୋଠା ନିର୍ମାଣ ପାଇଁ ଦାନ ଭିକ୍ଷା କରିବା ସହ ପାଟଣାଗଡ କଣ୍ଟାବାଞ୍ଜି ରାସ୍ତା ଅବରୋଧ କରିଛନ୍ତି । ଫଳରେ ଉକ୍ତ ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଥିଲା । ଖବର ପାଇ ପାଟଣାଗଡ ଉପଜିଲ୍ଲାପାଳ, ଉପଖଣ୍ଡ ଆରକ୍ଷୀ ଅଧିକାରୀ ଧାରଣା ସ୍ଥଳରେ ପହଞ୍ଚି ପିଲାମାନଙ୍କୁ ବୁଝାସୁଝା କରିବାପରେ ଆନ୍ଦୋଳନ ହଟିଛି । ତୁରନ୍ତ ବୈଠକ କରି ସମସ୍ୟାର ସମାଧାନ କରାଯିବ ବୋଲି କହିଛନ୍ତି ଉପଜିଲ୍ଲାପାଳ ।