ଭୁବନେଶ୍ୱର: ବିଧାନସଭା ଘେରାଉ ବିଫଳ ହେବା ପରେ ପୁଣି ଥରେ ରାଜ୍ୟବ୍ୟାପୀ ଆନ୍ଦୋଳନର ଡାକରା ଦେଇଛି ରାଜ୍ୟ କଂଗ୍ରେସ । ଆସନ୍ତା ଏପ୍ରିଲ ୧୫ରେ ମଶାଲ ଶୋଭାଯାତ୍ରା କରିବ କଂଗ୍ରେସ । ଗୁରୁବାର ଏ ନେଇ ସମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ପିସିସି ସଭାପତି ଭକ୍ତ ଚରଣ ଦାସ । 

କଂଗ୍ରେସ ନାରୀ ନିର୍ଯ୍ୟାତନା ପ୍ରସଙ୍ଗରେ ରାଜ୍ୟ ବ୍ୟାପୀ ଆନ୍ଦୋଳନର ଡାକରା ଦେଇଛି । ପ୍ରଥମେ ଏପ୍ରିଲ ୧୫ରେ ରାଜ୍ୟବ୍ୟାପୀ କଂଗ୍ରେସର ମଶାଲ ଶୋଭାଯାତ୍ରା ଅନୁଷ୍ଠିତ ହେବ । ସମସ୍ତ ବ୍ଲକ ମୁଖ୍ୟାଳୟରେ ଦଳ ଶୋଭାଯାତ୍ରା କରିବ । ୩୧୫ ବ୍ଲକ ସମ୍ମୁଖରେ ପ୍ରଦିବାଦ କରିବ ଦଳ । ଏହା ପରେ ଏପ୍ରିଲ ୨୧ରେ ଜିଲ୍ଲାପାଳ ଅଫିସ୍ ଦଳ ଘେରାଉ କରିବ ବୋଲି ପିସିସି ସଭାପତି କହିଛନ୍ତି ।ପିସିସି ସଭାପତି ପଦଯାତ୍ରାରେ ସମସ୍ତ ନେତା ସାମିଲ ହେବାକୁ ପରାମର୍ଶ ଦେଇଛନ୍ତି । ଏହା ପରେ ଜିଲ୍ଲା କମିଟି ଗଠନ କରାଯିବ ବୋଲି ସେ କହିଛନ୍ତି ।  

ଏଠାରେ ଉଲ୍ଲେଖ ଯୋଗ୍ୟ, ଗତ ୨୭ ତାରିଖରେ କଂଗ୍ରେସ ନାରୀ ନିର୍ଯ୍ୟାତନା ପ୍ରସଙ୍ଗରେ ବିଧାନସଭା ଘେରାଉ ଡାକରା ଦେଇଥିଲା । ରାଜଧାନୀରେ ହଜାର ହଜାର ସଂଖ୍ୟାର କଂଗ୍ରେସ କର୍ମୀ ଏକାଠି ହୋଇଥିଲେ । ଏହି ସମୟରେ ବ୍ୟାପକ ବିଶୃଙ୍ଖଳା ପରିସ୍ଥିତି ସୃଷ୍ଟି ହୋଇଥିଲା । କଂଗ୍ରେସ କର୍ମୀମାନେ ବ୍ୟାରିକେଡ୍ ଭାଙ୍ଗିବା ସହିତ କାର୍ଯ୍ୟରତ ପୋଲିସ କର୍ମୀଙ୍କ ଉପରକୁ ଢେଲା, ପଥର, ଅଣ୍ଡା, ଟମାଟୋ ଏବଂ ଚେୟାର ମାଡ଼ କରିଥିଲେ । ଯାହାକୁ ନେଇ ପୋଲିସ ଶକ୍ତ ଆଭିମୁଖ୍ୟ ଗ୍ରହଣ କରିଥିଲା । ପୋଲିସ ପାଣି ଓ ଲୁହ ବୁହା ଗ୍ୟାସ ପ୍ରୟୋଗ କରିବା ପରେ ଲାଠି ଚାର୍ଜ କରିବାକୁ ବାଧ୍ୟ ହୋଇଥିଲା ପୋଲିସ ।