ନୂଆଦିଲ୍ଲୀ: ବହୁଚର୍ଚ୍ଚିତ ୱାକଫ ସଂଶୋଧନ ବିଧେୟକ ସୋମବାର ବିଳମ୍ବିତ ରାତ୍ରିରେ ଲୋକସଭାରେ ପାରିତ ହୋଇଛି । ଏହି ବିଧେୟକ ଗୃହୀତ ହେବା ମାତ୍ରେ ଭାରତୀୟ ରାଜନୀତି ଅଧିକ ସରଗରମ ହୋଇ ଉଠିଛି । କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ ଗୁରୁବାର ୱାକଫ ବିଧେୟକ ଉପରେ ଖୁବ୍ ବର୍ଷିଛନ୍ତି । ସେ କହିଛନ୍ତି ଏହି ବିଧେୟକ ସମାଜକୁ ଖଣ୍ଡ ଖଣ୍ଡ କରୁଥିବା ଓ ସମ୍ବିଧାନକୁ ଅନ୍ତ ଆଡକୁ ନେଉଥିବା ଭାରତୀୟ ଜନତା ପାର୍ଟିର ରଣନୀତିର ଏକ ଅଂଶ ବିଶେଷ ।

କଂଗ୍ରେସର ସଂସଦୀୟ କମିଟିକୁ ସମ୍ବୋଧିତ କରି କଂଗ୍ରେସ ନେତ୍ରୀ କହିଛନ୍ତି, ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାର ଦେଶକୁ ରସାତଳ ଆଡକୁ ନେଇ ଯାଉଛନ୍ତି । ଯଦି ଏମିତି ଜାରି ରହେ ତେବେ ସମ୍ବିଧାନ କେବଳ କାଗଜକଲମରେ ସୀମିତ ରହିଯିବ । ବିଜେପିର ଉଦ୍ଦେଶ୍ୟ ସମ୍ବିଧାନକୁ ଧ୍ୱଂସ କରିବା । ବିଜେପି ଲୋକସଭାରେ ଏହି ବିଧେୟକକୁ ବୁଲଡୋଜର ଜରିଆରେ ପାରିତ କରାଇଛି । ଆମ ପାର୍ଟିର ଆଭିମୁଖ୍ୟ ସ୍ପଷ୍ଟ ଏହି ବିଧେୟକ ସମ୍ବିଧାନ ଉପରେ ଆକ୍ରମଣ କରିଛି । ଏଥିରେ ଆମର ସମାଜ ଏକ ସ୍ଥାୟୀ ଧ୍ରୁବୀକରଣ ଆଡକୁ ଆଗକୁ ବଢିବ । 

ସୋନିଆ କହିଛନ୍ତି ସଂସଦରେ କଂଗ୍ରେସ ସାଂସଦକୁ ନିଜର ମତ ରଖିବାକୁ ନ ଦେବା ଏହା ଅଧିକ ଚିନ୍ତାର ବିଷୟ । ବିଡମ୍ବନାର କଥା ବିରୋଧୀ ଦଳର ସଦସ୍ୟଙ୍କୁ ଗୃହରେ ନିଜର କଥା ରଖିବାକୁ ଦିଆଯାଉ ନାହିଁ । ରାଜ୍ୟସଭାରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେଙ୍କୁ ମଧ୍ୟ କହିବାକୁ ଅନୁମତି ଦିଆଯାଉ ନାହିଁ । ଗୃହ ବିରୋଧୀ ନୁହେଁ ଶାସକ ଦଳର ମନମୁଖୀ କାମ ଯୋଗୁଁ ଚାଲି ପାରୁନି । ଏହା ସରକାରୀ ଦଳର ଏକ ତରିକା ଯାହା ଜରିଆରେ ସଂସଦରେ ବିରୋଧୀଙ୍କ ସ୍ୱର ଚପାଇ ଦିଆଯିବ ।