ଭୁବନେଶ୍ୱର: ଓଡ଼ିଶା ପ୍ରସିଦ୍ଧ କଟକ ଦହିବରା ଆଳୁଦମକୁ ଭୌଗୋଳିକ ପରିଚୟ ଦେବାକୁ ନେଇ ଆଜି ବିଧାନସଭାରେ ପ୍ରସଙ୍ଗ ଉଠିଛି । ଏହି ପ୍ରସଙ୍ଗ ଉଠାଇଛନ୍ତି କଟକ ବିଧାୟିକା ସୋଫିଆ ଫିର୍ଦ୍ଦୋସ୍ । ଯାହାର ଉତ୍ତର ରଖିଛନ୍ତି ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ।
ବିଧାୟିକ ସୋଫିଆ ଫିରଦୋସ୍ ପଚାରିଥିଲେ ଯେ, ଏସଏକ୍ୟୁ ୧୮୭ ତାରିଖ ୩୧ ଜୁଲାଇ ୨୦୨୪ ଅନୁଯାୟୀ, କଟକରୁ ଉତ୍ପନ୍ନ ଏବଂ ସାଂସ୍କୃତିକ ଏବଂ ଆର୍ଥିକ ଗୁରୁତ୍ୱ ବହନ କରୁଥିବା ଦହିବରା ଆଳୁଦମ୍କୁ ପ୍ରୋତ୍ସାହିତ କରିବା ପାଇଁ ସରକାର କ’ଣ ପଦକ୍ଷେପ ନେଉଛନ୍ତି । ଦହିବରା ଆଳୁଦମ୍ ବିକ୍ରୟରେ ସମ୍ପୃକ୍ତ ସ୍ଥାନୀୟ ବିକ୍ରେତାଙ୍କୁ ସମର୍ଥନ କରିବା ଏବଂ ସେମାନଙ୍କୁ ଆବଶ୍ୟକୀୟ ଭିତ୍ତିଭୂମି ଏବଂ ସୁବିଧା ଯୋଗାଇବା ପାଇଁ ସରକାର ପାଣ୍ଠି ବଣ୍ଟନ କରିବାକୁ ଯୋଜନା କରୁଛନ୍ତି କି? ସ୍ଥାନୀୟ କର୍ତ୍ତୃପକ୍ଷଙ୍କ ସହଯୋଗରେ ସରକାର ସ୍ଥାନୀୟ ବିକ୍ରେତାଙ୍କ ପାଇଁ ପର୍ଯ୍ୟଟନ ଏବଂ ଜୀବିକା ସୁଯୋଗ ବୃଦ୍ଧି କରିବା ପାଇଁ ସମର୍ପିତ ଦହିବରା ଆଳୁଦମ୍ ଜୋନ୍ ପ୍ରତିଷ୍ଠା କରିବେ କି? ଏହାର ଉତ୍ତରରେ ମନ୍ତ୍ରୀ କହିଛନ୍ତି, ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ ମନ୍ତ୍ରଣାଳୟ ପକ୍ଷରୁ ଜିଆଇ ଟ୍ୟାଗ୍ ପାଇଁ ସିଧାସଳଖ ଆବେଦନ କରାଯାଇ ପାରିବ ନାହିଁ । କିନ୍ତୁ ମନ୍ତ୍ରଣାଳୟ ଆବେଦନ କରାଯାଇଥିବା ତଥ୍ୟକୁ ପ୍ରୋତ୍ସାହିତ କରିପାରିବେ । ଏନେଇ ମନ୍ତ୍ରଣାଳୟ ତଥା ରାଜ୍ୟ ସରକାରଙ୍କ ପକ୍ଷରୁ ଉଦ୍ୟମ ଅବ୍ୟାହତ ଜାରି ରହିଛି ବୋଲି କହିଛନ୍ତି ମନ୍ତ୍ରୀ ।